Elimizde baılanys sapasyn qadaǵalap, azamattardyń quqyqtaryn qorǵaıtyn qor qurylady

ASTANA. KAZINFORM – Qazaqstanda «Telekommýnıkatsııalar týraly» jańa zań jobasy aıasynda baılanys sapasyn arttyrý jáne azamattardyń quqyqtaryn qorǵaý qory qurylmaq. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııa komıtetiniń tóraǵasy Damır Seısembekov aıtyp berdi. 

– Bul qor qazirgi zańda qarastyrylmaǵan. Biraq keıbir operatorlarda ámbebap baılanys qyzmetteri týraly túsinik bar. Olar telekommýnıkatsııany jańǵyrtý men damytýǵa baǵyttalǵan qosymsha salyqtyq júkteme alǵan, – dedi Damır Seısembekov «Astana habta» ótken strategııalyq talqylaýda.

Onyń aıtýynsha, baılanys salasyndaǵy jabdyqtar men basqa da elementterdi únemi jańartyp otyrý qajet, alaıda bul saladaǵy qarjylandyrý jetkiliksiz deńgeıde qalyp otyr.

– Qazirgi ýaqytta bul qarajat qosymsha salyq túrinde respýblıkalyq bıýdjetke túsedi, biraq respýblıkalyq bıýdjetten tikeleı ınvestıtsııa alý múmkin emes. Keıin qarajatty jalpy erejeler boıynsha respýblıkalyq bıýdjetten suraýǵa týra keledi. Bul salada ınvestıtsııanyń jetkiliksizdigin baıqap otyrmyz. Qor dál osy máseleni sheshýge arnalǵan, – dep túsindirdi komıtet basshysy. 

Sonymen birge, ol aýyldyq eldimekenderdegi baılanys qyzmetterin sýbsıdııalaý týraly aıtty.

– Bizdiń elimizdiń aýmaǵy úlken, aýyldardyń arasy alys. Kóptegen spıkerler aýyldardaǵy qyzmetti kommertsııalyq túrde kórsetý asa tıimdi emes ekenin aıtty. Biz retteýshi organ retinde, operatorlardy túrli tásildermen yntalandyramyz, salyqtyq jeńildikter, tikeleı sýbsıdııalar qarastyrylǵan. Bul aýyl turǵyndarynyń telekommýnıkatsııalyq qyzmetterdi qala turǵyndarymen teń dárejede alýyn qamtamasyz etý úshin jasalyp otyr, – dep qorytyndylady D. Seısembekov.

Buǵan deıin D. Seısembekov Qytaıdyń Shanghai Spacecom Satellite spýtnıktik kompanııasymen memorandýmǵa qol qoıý josparlanǵanyn aıtqan edi. 

Sondaı-aq QR Prezıdentiniń keńesshisi Qýanyshbek Esekeev zań qabyldaýda keshikpeý keregin tilge tıek etti.