Elimizde baspanany jekeshelendirý tártibi qandaı

PETROPAVL. KAZINFORM – Memleketten berilgen nemese qyzmettik páterdi jekeshelendirip alýǵa múmkindik bar.

Baspanany jekeshelendirý quqyǵy kimde bar?

«Elektrondy úkimet» portalyndaǵy málimetke súıensek, memlekettik qyzmetker, bıýdjettik uıym ókili, áskerı qyzmetshi, ǵaryshker jáne ǵaryshkerlikke úmitkerler nemese memlekettik saılanbaly tulǵa qaldyq quny boıynsha turǵyn úıdi jekeshelendire alady.

Eger memlekettik qyzmette, bıýdjettik uıymdarda nemese memlekettik kásiporynda on jyldan kem emes jumys isteseńiz, sondaı-aq uıymnyń taratylýyna, qyzmetkerler sanynyń nemese shtatynyń qysqartylýy boıynsha nemese syrqatqa baılanysty odan ári jumys isteý múmkin bolmasa, zeınetkerlikke shyqqan jaǵdaıda jumys merzimine qaramastan siz turǵyn úıdi jekeshelendirý quqyǵyna ıe bolasyz.

Ǵaryshkerlikke úmitkerler, ǵarysh qyzmeti salasynda on bes jyldan artyq jumys ótili barlar turǵyn úıdi aqysyz jekeshelendiredi.

Qyzmettikke teńestirilgen turǵyn úı berilgen qyzmetker qaıtys bolǵan jaǵdaıda otbasy músheleri onyń jumys istegen ýaqytyna qaramastan jekeshelendire alady.

Eger qyzmettik turǵyn úı jumyspen qamtýdyń belsendi sharalaryna qatysýshy retinde berilgen bolsa, onda ony qaldyq quny boıynsha tek bes jyldan keıin ǵana jekeshelendirýge bolady.

Áskerı qyzmetkerler, 2013 jylǵy 1 qańtardan bastap 10 jyldan astam qyzmet etkender — qaldyq quny boıynsha jáne 15 jyldan artyq qyzmet etkender – 20 jyldyq jalpy eńbek ótilinen keıin aqysyz jekeshelendirýge quqyly.

Keıbir áleýmettik toptar - Uly Otan soǵysynyń ardagerleri, 1–2 top múgedektigi barlar, Chernobyl apatynyń saldaryn joıýshylar, Semeı ıadrolyq synaq polıgony saldarynan zardap shekkender, Aýǵanstanda nemese basqa memleketterde áskerı qyzmetti ótýmen baılanysty múgedek bolǵan áskerı qyzmetkerler, Aral mańyndaǵy ekologııalyq apat saldarynan zardap shekkender, jıyrma jyl jáne odan da artyq eńbek etken arnaıy memlekettik organdardyń qyzmetkerleri baspanany tegin jekeshelendire alady.

Qandaı turǵyn úıdi jekeshelendirýge bolmaıdy?

• Birneshe jaldaýshyǵa jalǵa beriletin turǵyn úı, olardyń bireýi satyp alýǵa kelispegen jaǵdaıda;
• satyp alý quqyǵynsyz jalǵa beriletin turǵyn úı;
• ýaqytsha qurylystardaǵy nemese sanıtarııalyq-epıdemıologııalyq jáne tehnıkalyq talaptarǵa saı kelmeıtin;
• áskerı qalashyqtardaǵy, shekara zastavalaryndaǵy jáne ózge de jabyq obektiler aýmaǵyndaǵy;
• erekshe qorǵalatyn tabıǵı aýmaqtarda ornalasqan;
• buzylýǵa jatatyn;
• jalǵyz turǵyn úıi apattyq dep tanylǵandarǵa kommýnaldyq turǵyn úı qorynan berilgen;
• rotatsııalaý tártibimen laýazymǵa taǵaıyndalǵan memlekettik qyzmetshige vedomstvolyq turǵyn úı qorynan berilgen páter jekeshelendirilmeıdi.

Sondaı-aq elimizde memlekettik turǵyn úı qorynan tek bir turǵyn úıdi ǵana jekeshelendirýge ruqsat bar.

Jekeshelendirýge qajet qujattar tizbegi:

• ETsQ arqyly beriletin ótinish - páterdi jalǵa alýshy jáne onyń 18 jastan asqan barlyq otbasy músheleri elektrondy túrde qol qoıady.
• Otbasy jaǵdaıyn rastaıtyn qujattar - neke qııý nemese buzý jáne bala týý nemese qaıtys bolý týraly kýálikter.
• Páterdi jalǵa alý shartynyń nemese orderdiń kóshirmesi.
• Áleýmettik osal topqa jatqan jaǵdaıda ony rastaıtyn qujattyń kóshirmesi.
• Jumys ornynan anyqtama.
• Páter úshin bereshek joq ekenin dáleldeıtin anyqtama.
• Aqysyz jekeshelendirý quqyǵyńyz bolsa – sony rastaıtyn qujat.

Al jeke kýálik, mekenjaı anyqtamasy, múliktiń bar-joǵy týraly aqparat, basqa qujattar — bári memlekettik aqparattyq júıeden avtomatty túrde alynady.

Zańda kórsetilmegen qosymsha qujattardy talap etýge tyıym salynǵan.

Qujattar daıyn bolǵan soń, ótinishti eGov.kz portaly arqyly nemese HQKO arqyly berýge bolady.

Buǵan deıin ınternettegi alaıaqtardan qalaı qorǵanýǵa bolatyndyǵyn jazǵan edik.