Elimizde baspana eń qymbat jáne eń arzan qalalar anyqtaldy
ASTANA. KAZINFORM – Qazaqstanda tamyz aıynda jańa turǵyn úıdiń bir sharshy metri orta eseppen 625,4 myń teńge, al qaıtalama naryqtaǵy baspananyń sharshy metri 635,2 myń teńge boldy, dep habarlaıdy Ulttyq statıstıka bıýrosy.
Osylaısha, aýdany 40 sharshy metr bolatyn bir bólmeli páterdiń ortasha quny jańa turǵyn úı naryǵynda shamamen 25 mln teńge, al qaıtalama naryqta 25,4 mln teńge bolady.
El boıynsha abattandyrylǵan turǵyn úıdi jalǵa alýdyń ortasha baǵasy bir sharshy metr úshin 5 350 teńgeni qurady. Demek, aýdany 40 sharshy metr bolatyn páterdi jaldaý orta eseppen aıyna 214 myń teńgege túsedi.
Jańa turǵyn úı baǵasy boıynsha Astana kósh bastap tur. Elordada jańa baspananyń bir sharshy metri orta eseppen 747,1 myń teńge boldy. Ekinshi orynda Almaty – 739,8 myń teńge. Úshinshi orynda Atyraý – 546,4 myń teńge.
Al jańa turǵyn úıdiń eń tómen baǵasy Oralda tirkeldi – bir sharshy metri 338,4 myń teńge. Aqtóbede bul kórsetkish 356,5 myń teńge, Kókshetaýda 376,1 myń teńge boldy.
– Qaıtalama turǵyn úı naryǵynda eń joǵary baǵa Almatyda tirkeldi – bir sharshy metri 749,5 myń teńge. Astanada páterlerdiń bir sharshy metri orta eseppen 740,4 myń teńgeden satyldy. Úshinshi orynda Atyraý tur, munda baǵa bir sharshy metr úshin 519,2 myń teńgeni qurady. Al eń qoljetimdi qaıtalama baspana Qyzylordada tirkeldi – bir sharshy metri 345,1 myń teńge, – delingen málimette.
Qaıtalama naryqtaǵy qoljetimdi qalalardyń qatarynda Aqtaý men Taraz da bar. Aqtaýda bir sharshy metrdiń ortasha baǵasy 354,2 myń teńge bolsa, Tarazda 354,4 myń teńgeni qurady.
Páter jaldaý quny boıynsha Almaty birinshi orynda. Munda bir sharshy metrdi jaldaý orta eseppen 6 224 teńge turady. Astanada – 6 079 teńge, Qaraǵandyda 5 219 teńge.
Eń arzan jaldamaly baspana Tarazda tirkelgen – bir sharshy metri 2 558 teńge. Odan keıin Túrkistan – 2 914 teńge jáne Aqtóbe – 3 381 teńge.
Buǵan deıin baspana baǵasy 20 paıyzǵa qymbattaýy múmkin ekeni habarlandy.
