Elimizde bankaralyq QR júıesi engiziledi
ASTANA. KAZINFORM — QR Ulttyq banki saýalymyzǵa joldaǵan jaýabynda 18 shildede qoldanysqa enetin júıeniń maqsaty men artyqshylyqtaryn túsindirdi.
— Bankter týraly jańa Zańǵa («QR keıbir zańnamalyq aktilerine qarjy naryǵyn retteý men damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» QR 2026 jylǵy 16 qańtardaǵy № 259-VIII QRZ Zańy) engizilgen zańnamalyq túzetýler aıasynda halyqqa bólshek tólem qyzmetin kórsetetin barlyq banktiń bankaralyq mobıldi tólemder júıesine qosylýy kózdelgen, — delingen habarlamada.
Bul túzetýler 2026 jylǵy 18 shildeden bastap kúshine enedi.
— Bankter óz júıelerin tehnıkalyq turǵydan tolyq jetildirýi jáne synaqtan ótkizý isin aıaqtap, osy merzimge deıin júıege qosylýdy qamtamasyz etýge tıis, — delingen Ulttyq bank jaýabynda.
Bankaralyq QR-tólemderdi engizýdegi negizgi maqsat — túrli bank klıentterine tólemderdi biryńǵaı ınfraqurylym arqyly qabyldaýǵa jaǵdaı jasaý.
— Bul qadam saýda kásiporyndarynyń birneshe derbes tehnıkalyq sheshimderge táýeldiligin azaıtyp, áleýetti satyp alýshylardyń qataryn keńeıtýge múmkindik beredi. Bul rette naqty bir saýda núktesinde qoldanylatyn termınaldar sany burynǵysha kásipkerdiń óz qalaýyna jáne bankterdiń qyzmet kórsetý sharttaryna baılanysty sheshiledi. Tehnologııalyq turǵydan alǵanda, bankaralyq QR júıesi ártúrli bank klıentteriniń tólemderin biryńǵaı ózara is-qımyl arnasy arqyly qabyldaýǵa jol ashady. Bul bolashaqta saýda oryndarynda birneshe qabyldaý qurylǵylaryn (termınaldardy) qatar ustaý qajettiligin aıtarlyqtaı azaıtady, — delingen habarlamada.
Aıta keteıik, buǵan deıin 18 shilde tsıfrlyq teńge qoldanysqa enetinin jazǵanbyz.
