Elimizdegi sý aıdyndary 60 myń tonnaǵa jýyq qoqystan tazartyldy

ASTANA. KAZINFORM — Elimizde tabıǵı resýrstardy saqtaý jáne ishki sý aıdyndarynyń ekologııalyq jaǵdaıyn jaqsartýǵa baǵyttalǵan «Taza sý aıdyndary» atty aýqymdy ekologııalyq aktsııa aıaqtaldy. Bul týraly Aýyl sharýashylyǵy mınıstrligi málimdedi.

Іs-shara barysynda sý aıdyndarynan jáne olardyń jaǵalaý aımaqtarynan 60 myń tonna qoqys pen ıesiz balyq aýlaý torlary jınaldy.

Jaǵalaý syzyǵynyń ondaǵan shaqyrymy tazartyldy.

Negizgi maqsat — sý ekojúıeleriniń tazalyǵyn saqtaý, bıoresýrstardyń turaqtylyǵyn qamtamasyz etý jáne halyqtyń ekologııalyq mádenıetin arttyrý. Aktsııa qorshaǵan ortany qorǵaý jáne tabıǵı resýrstardy utymdy paıdalaný salasyndaǵy memlekettik saıasatty iske asyrý aıasynda ótkizildi.

Sharaǵa ekologııa departamentteriniń qyzmetkerleri, jergilikti atqarýshy organdardyń ókilderi, stýdentter, eriktiler jáne qoǵamdyq uıymdardyń músheleri qatysty. Jalpy aktsııaǵa 1100-den astam adam, 170 tehnıka birligi, onyń ishinde 59 sý kóligi jumyldyryldy.

Mundaı sharalardy ótkizý sý sapasyn jaqsartýǵa, sý aıdyndarynyń tabıǵı florasy men faýnasyn qalpyna keltirýge, sondaı-aq azamattardyń tabıǵatqa jaýapkershiligin arttyrýǵa yqpal etedi.

Aıta keteıik, «Taza Qazaqstan» aktsııasy aıasynda Aqtóbe óńirinde 7300-ge jýyq kóshet egildi.