Elimizde balalar úıindegi tárbıelenýshiler sany 2 esege azaıdy
ASTANA. KAZINFORM – Keıingi 10 jylda elimizde balalar úıindegi tárbıelenýshiler sany 2 esege qysqarǵan. Bul týraly Ortalyq kommýnıkatsııalar qyzmeti alańynda 1 maýsym – Halyqaralyq balalardy qorǵaý kúnine oraı uıymdastyrylǵan baspasóz konferentsııasynda QR Oqý-aǵartý vıtse-mınıstri Shynar Aqparova aıtty.
– Qazirgi tańda el azamattary jyl saıyn orta eseppen 1 000-nan astam balany qamqorlyqqa qabyldaıdy. Osy úrdistiń arqasynda keıingi on jylda balalar úılerindegi tárbıelenýshilerdiń sany eki esege qysqardy. Búgingi tańda elimizdegi 20 myńnan astam jetim balanyń basym kópshiligi, ıaǵnı 16 294-i otbasylyq tárbıege aýystyryldy. Balalardyń zańdy múddelerin tolyqqandy qorǵaý maqsatynda qorǵanshylyq organdary mamandarynyń sany 1 029 adamǵa deıin kóbeıtildi,-dedi vıtse-mınıstr.
Sondaı-aq balalar men ata-analarǵa der kezinde kásibı kómek kórsetý úshin respýblıkanyń barlyq óńirinde arnaıy Psıhologııalyq qoldaý ortalyqtary iske qosylǵan.
Onyń sózinshe, bul ortalyqtar myńdaǵan otbasyǵa quqyqtyq jáne psıhologııalyq turǵydan tıimdi járdem berip keledi.
Budan bólek spıker balalar úılerin deınstıtýtsıonalızatsııalaý saıasaty elimizde júıeli túrde jalǵasyp keletinin atap ótti. Atqarylǵan jumystardyń nátıjesinde buǵan deıin ınternattyq mekemelerde bolǵan balalar sany 7 myńnan 3,8 myńǵa deıin azaıǵan.
– Búgingi tańda respýblıka boıynsha 20 myńnan astam jetim jáne ata-anasynyń qamqorlyǵynsyz qalǵan bala tirkelse, solardyń basym kópshiligi, ıaǵnı 16 294-i qazirdiń ózinde otbasylyq tárbıemen qamtylǵan,-dedi ol.
Vıtse-mınıstrdiń sózinshe, memleket tarapynan balalardyń quqyqtary men zańdy múddelerin qorǵaý tetikteri de barynsha kúsheıtilip jatyr. Osy rette qorǵanshylyq jáne qamqorshylyq organdary mamandarynyń tapshylyǵyn joıý maqsatynda jańa normatıvtik talap engizilgen.
– Endigi jerde árbir 5 myń balaǵa keminde 1 mamannan kelýi tıis. Osy erejeniń arqasynda elimiz boıynsha bul sala qyzmetkerleriniń shtaty 303-ten 1 029 adamǵa deıin, ıaǵnı 3 eseden astamǵa kóbeıtildi.
Buǵan deıin Astanada Halyqaralyq balalardy qorǵaý kúnine oraı 100-ge jýyq is-shara ótetinin habarlaǵanbyz.
