Elimizde balalar men jasóspirimder týrızmin damytýdyń jol kartasy ázirlendi
ASTANA. KAZINFORM – 2029 jylǵa deıin balalar men jasóspirimder týrızmin damytý jol kartasy 7 baǵyt pen 29 is-sharadan turady. Bul týraly Týrızm jáne sport vıtse-mınıstri Erjan Erkinbaev málim etti.
- Balalardyń demalysyn jáne bos ýaqytyn uıymdastyrý maqsatynda Týrızm jáne sport mınıstrligi birqatar is-shara keshenin júzege asyrady. Balalar men jasóspirimder týrızmin damytý, olardyń saıahatyna qatysty jobalardy qoldaý memlekettik saıasattyń basymdyǵy bolyp sanalady. Jergilikti atqarýshy organdarmen birlesip 2029 jylǵa deıin balalar men jasóspirimder týrızmin damytý jol kartasy ázirlendi. Atalǵan qujat 7 baǵyt pen 29 is-sharadan turady, - dedi Erjan Erkinbaev Úkimet otyrysynda.
Odan ári vıtse-mınıstr balalarǵa arnalǵan Kids go Free baǵdarlamasy týraly aıtty.
- Bul – balalardyń áýe bıletterin sýbsıdııalaıtyn memlekettik qoldaý sharasy. Baǵdarlama iske qosylǵaly beri 5 600-den astam bala tegin áýe saıahatyn paıdalandy. Mınıstrlik kámeletke tolmaǵan jolaýshylardy alyp júrýge quqyǵy bar tulǵalardyń tizimin keńeıtý boıynsha jumys júrgizip jatyr. Bul tizimdegi qatysýshylardy ulǵaıtýǵa múmkindik beredi. Bıyl osy baǵdarlama aıasynda 3 myń balany qamtý josparlanyp otyr, - deıdi ol.
Mınıstr orynbasarynyń aıtýynsha, elimizde balalar men jasóspirimder arasynda ishki týrızmdi nasıhattaý jáne damytý jumystary belsendi túrde júrip jatyr. Oǵan jergilikti atqarýshy organdar men týrbıznes sýbektileri tartylǵan.
- Mysaly, Astana ákimdigi jyl saıyn ár óńirden jınalǵan 1000-ǵa jýyq balany qamtı otyryp, «Astana – Otanymnyń elordasy» áleýmettik jobasyn iske asyryp keledi. Týr baǵdarlamasyna turý, tamaqtaný, aýqymdy mádenı-oıyn-saýyq baǵdarlamasyn uıymdastyrý kiredi. Týrıstik qoǵamdastyqpen birlesip jazǵa arnaıy týrıstik marshrýttar ázirlendi. Ol mádenıet, tarıh jáne dástúrmen tanysýǵa, sondaı-aq oqýshylar men stýdentterdiń oı-órisin keńeıtýge baǵyttalǵan, - dep tolyqtyrdy E.Erkinbaev.
Buǵan deıin Premer-mınıstr Oljas Bektenov mektep bitirý keshinde balalardyń qaýipsizdigine erekshe nazar aýdarý qajettigin aıtty.
Sondaı-aq Úkimet basshysy balalardy sýda jáne órt kezinde qutqarý daǵdylaryna úıretý qajettigine toqtaldy.
Aıta ketsek, balalardy sport jarystaryna polıtsııanyń súıemeldeýinsiz jiberýge tyıym salynady.