Elimizde balalar arasyndaǵy qaterli isikterden aman qalý kórsetkishi 70%-dan asady

ASTANA. KAZINFORM – Qazaqstan Respýblıkasynda jyl saıyn balalar arasynda 800-den astam onkologııalyq jáne gematologııalyq aýrýlardyń alǵashqy jaǵdaıy anyqtalady. Olardyń shamamen 600-i qaterli isikterge, sonyń ishinde gemoblastozdarǵa, al 200-ge jýyǵy aýyr sıpattaǵy qatersiz gematologııalyq patologııalarǵa tıesili.

QR Densaýlyq saqtaý mınıstrliginiń málimetinshe, keıingi 10 jyl ishinde balalar arasyndaǵy qaterli jańa óskinderge shaldyǵý deńgeıi turaqty saqtalyp otyr jáne 100 myń balaǵa shaqqanda 9,7 jaǵdaıdy quraıdy. 

Qaterli isikter qurylymy halyqaralyq derektermen uqsas:

• jedel leıkozdar – 30%-dan astam,

• ortalyq júıke júıesiniń isikteri – shamamen 17%,

• lımfomalar men nefroblastomalar – 10–11%,

• neıroblastomalar – shamamen 7%.

Immýnoterapııa men targettik terapııany qosa alǵanda, zamanaýı emdeý ádisterin engizýdiń nátıjesinde Qazaqstanda balalar arasyndaǵy qaterli isikterden aman qalý kórsetkishi 70%-dan asady. 

Keıingi 5 jylda 40-tan astam bala neıroblastoma, lımfoma jáne leıkozdy emdeýde monoklonaldy antıdenelerge negizdelgen ınnovatsııalyq dárilik preparattar alǵan. 

Eske sala keteıik, buǵan deıin qaterli isikke qarsy otandyq dári qashan daıyn bolatynyn jazǵan edik.