Elimizde balalar arasynda ózine-ózi qol jumsaý oqıǵalary aıtarlyqtaı azaıdy

ASTANA. KAZINFORM – Aqordada Memlekettik keńesshi Erlan Qarınniń tóraǵalyǵymen balalardyń qaýipsizdigin qamtamasyz etý, kámeletke tolmaǵandarǵa qatysty quqyqbuzýshylyqtardyń aldyn alý máselelerine arnalǵan jıyn ótti.

Basqosýǵa Oqý-aǵartý mınıstri, sondaı-aq Ǵylym jáne joǵary bilim, Densaýlyq saqtaý, Tsıfrlyq damý, ınnovatsııalar jáne aeroǵarysh ónerkásibi, Іshki ister mınıstrlikteriniń, Bas prokýratýranyń, Prezıdent Ákimshiligi qurylymdyq bólimsheleriniń ókilderi, Bala quqyqtary jónindegi ýákil qatysty.

Memlekettik keńesshi qazirgi tańda balalardy qorǵaý úshin memleket tarapynan birqatar pármendi shara qabyldanyp jatqanyna nazar aýdardy. Atap aıtqanda, mektep psıhologtarynyń, áleýmettik pedagogterdiń jáne psıhologııalyq qoldaý ortalyqtarynyń kadrlyq quramy kúsheıtildi. «111» qyzmetiniń QR-kody ázirlenip, barlyq oqý oryndaryna ornalastyrylýda. «Kıberqadaǵalaý» júıesi arqyly ınternettegi zııandy kontent joıylyp jatyr.

Erlan Qarın byltyr memleket birneshe jedel ári strategııalyq sharalar qabyldaǵanyn, sonyń nátıjesinde balalar arasynda ózine-ózi qol jumsaý oqıǵalary aıtarlyqtaı azaıǵanyn atap ótti.

Memlekettik keńesshi osy baǵyttaǵy jumystardy jalǵastyryp, balalardyń qaýipsizdigin qamtamasyz etetin tıisti sharalar qabyldaýdy úılestirý jóninde tapsyrma berdi.

Aıta keteıik, «Ulttyq qor – balalarǵa» baǵdarlamasyna bıylǵy 1 qańtarda 66 571 ótinim tústi.