Elimizde balabaqsha kezegi úsh ese qysqardy

ASTANA. KAZINFORM — Bıyl 11,8 myńǵa jýyq mektepke deıingi uıymdarda 1 mıllıonnan astam bala tárbıe-bilim alady. Bul týraly Oqý-aǵartý mınıstrligi habarlaıdy.

— 2 jastan 6 jasqa deıingi balalardy mektepke deıingi tárbıe jáne oqytýmen qamtý deńgeıi 93,1%-ǵa jetti, jyl sońyna deıin kórsetkish 95%-ǵa jetkizý josparlanyp otyr. Mektepke deıingi uıymdardy vaýcherlik qarjylandyrý júıesiniń engizilýiniń nátıjesinde jyl basynan beri balabaqsha kezegi 44%-ǵa qysqardy. Sońǵy eki jylda balabaqsha kezegi úsh ese qysqardy, — delingen mınıstrlik taratqan habarlamada.

Aqparatta aıtylǵandaı, vaýcherlik qarjylandyrý mehanızmi qyzmet sapasyn arttyryp qana qoımaı, mektepke deıingi bilim berý salasyndaǵy ashyqtyqty qamtamasyz etti. 

— Atalǵan júıeni engizýdiń nátıjesinde 11 mıllıard teńgeden astam bıýdjet qarajaty únemdeldi. Qazir joba eldiń 20 qalasy men 7 aýdanynda iske asyrylyp jatyr. Qyrkúıekten bastap jyl sońyna deıin vaýcherlik qarjylandyrý barlyq balabaqshada kezeń-kezeńimen engiziledi. Sonymen qatar jańa balabaqshalar salý men jumys jasap turǵan balabaqshalar esebinen keńeıtý arqyly júzege asyrylyp jatyr. Tek osy jyly 179 jańa mektepke deıingi uıym ashyldy, al sońǵy 6 jylda olardyń sany 1600-ge artty. Bıyl 260 memlekettik balabaqshada jóndeý jumystary júrgizilip, materıaldyq-tehnıkalyq bazasy nyǵaıtyldy, — deıdi vedomstvodan.

Odan bólek, mektepke deıingi uıymdarǵa barmaıtyn balalardyń ata-analaryna arnalǵan konsýltatsııalyq pýnktter jelisi keńeıtilip jatyr. 

— Jyl basynan beri olardyń sany 4,2 myńnan 5,5 myńǵa deıin artty. Jańa oqý jylynan bastap memlekettik tildi erte jastan meńgerýge baǵyttalǵan «Tilge boılaý» baǵdarlamasy men «Beske deıin úlger» jobasy keńinen engiziledi. Bul jobalar buǵan deıin elimizdiń 5 óńirinde synaqtan ótkizilgen bolatyn. Osy ýaqyt ishinde 135 balabaqshada 7 myńnan astam bala memlekettik tildi meńgerdi. Mektepke deıingi uıymdardaǵy tárbıe jumysynyń basym baǵyttarynyń biri — balalardy eńbekke erte jastan baýlý. Osy maqsatta qyrkúıek aıynan bastap pılottyq rejımde 100 balabaqshada 12 myń balany qamtıtyn jańa joba iske qosylady, — dep habarlaıdy mınıstrlik.

Aıta keteıik, búgin elimizde bilim kúnine oraı barlyq mektepte saltanatty is-shara ótti.