Elimizde bala tárbıesine salǵyrt qaraıtyn 6 myńnan astam otbasy bar
ASTANA. KAZINFORM — Bala tárbıesine salǵyrt qaraıtyn 3 myńnan astam otbasy Іshki ister mınıstrliginiń profılaktıkalyq esebine alynǵan. Bul týraly vedomstvonyń resmı ókili Shyńǵys Álekeshev kezekti onlaın baspasóz máslıhatynda aıtty.
«Jyl basynan beri 21 myńnan astam otbasy tekserildi. Onyń 7 myńnan astamynda balalar ógeı ákesimen nemese anasynyń serigimen birge turady. Ómirlik qıyn jaǵdaıǵa tap bolǵan 800-den astam otbasy anyqtaldy. Olar týraly aqparat quzyrly organdarǵa jiberildi. Bala tárbıeleý baǵytyndaǵy mindetterin atqarmaıtyn úsh myńnan astam ata-ana profılaktıkalyq esepke qoıyldy. Jalpy mundaı esepke alty myńnan astam ata-ana qoıylǵan», — dedi ol.
ІІM resmı ókili osy otbasylardyń máselesine baılanysty 3495 materıal tekserilgenin aıtady.
«Sottar 300-den astam adamdy ata-ana quqyǵynan aıyryp, 240 adamnyń quqyǵyn shektedi. Ata-ana mindetterin oryndamaǵany úshin alty myńnan astam adam ákimshilik jaýapkershilikke tartyldy», — dedi Shyńǵys Álekeshev.
