Elimizde azamattyq jáne memlekettik avıatsııa ushaqtaryn jóndeý ortalyǵyn ashý mańyzdy — Roman Sklıar

ASTANA. KAZINFORM — Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylady. Bul týraly Kólik mınıstrligi málim etti.

Premer-mınıstrdiń birinshi orynbasary Airbus-tyń Eýropa aımaǵyndaǵy prezıdenti Joan Pelısemen kezdesý ótkizdi.

Eýropalyq Airbus kompanııasy — álemdegi eń iri avıakompanııalardyń biri. Talqylaý barysynda Roman Sklıar Úkimettiń avıatsııa salasyn damytý, onyń ishinde áýe kemeleri parkin jańartý boıynsha júrgizip jatqan jumystary týraly aıtyp ótti. Elimizdiń aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettiligine erekshe nazar aýdaryldy.

Kezdesý kezinde birinshi vıtse-premer eýropalyq kompanııa ókilderine yntymaqtastyqty odan ári damytýdaǵy nıeti úshin, sondaı-aq avıatsııa salasynda birlesken jobalardy júzege asyrý perspektıvalary úshin alǵys bildirdi.

Jıyn qorytyndysy boıynsha memlekettik organdar men uıymdarǵa eýropalyq kompanııanyń bastamalaryn pysyqtaý boıynsha birqatar tapsyrmalar berildi.

Eske sala keteıik, buǵan deıin Qazaqstannan álemniń 31 eline tikeleı ushýǵa bolatynyn jazǵan edik.