Elimizde azamattyq pılotsyz avıatsııany damytýdyń tujyrymdamasy bekitildi

ASTANA. KAZINFORM — Úkimet 2025–2031 jyldarǵa arnalǵan azamattyq pılotsyz avıatsııany damytýdyń tujyrymdamasyn bekitti. 

Atalǵan qujat álemde de, elimizde de eń jyldam damyp kele jatqan salalardyń biri sanalatyn baǵytty damytý boıynsha strategııalyq kózqaras pen negizgi qadamdardy aıqyndaıdy.

Pılotsyz avıatsııalyq júıeler, ıaǵnı drondar, kommertsııalyq maqsatta da, memlekettik basqarý isinde de barǵan saıyn keńinen qoldanyla bastady. Azamattyq avıatsııanyń halyqaralyq uıymynyń (IKAO) baǵalaýynsha, pılotsyz avıatsııalyq júıeni qoldaıtyn logıstıka jáne kólik qyzmeti naryǵy 2022 jylǵy 11 mlrd dollardan 2027 jylǵa qaraı 29 mlrd dollarǵa deıin ósedi. Al basqa derekkóz 2024 jyly bul naryqty 35,28 mlrd dollarǵa baǵalap, 2029 jylǵa qaraı 67,64 mlrd dollarǵa jetedi dep boljap otyr.

Bekitilgen tujyrymdama aıasynda Qazaqstanda kelesi baǵyttar boıynsha jumys júrgiziledi:

— normatıvtik-quqyqtyq bazany damytý;

— kásibı kadr daıarlaý;

— ǵylymı jáne tehnologııalyq ázirlemelerdi yntalandyrý;

— pılotsyz avıatsııalyq júıeniń quramdas bólikterin óndirýdi jergiliktendirý;

— drondardy aýyl sharýashylyǵynda, ónerkásipte, energetıkada jáne basqa salada qoldaný aıasyn keńeıtý.

Qazaqstan TMD keńistiginde pılotsyz avıatsııa salasynda tolyqqandy erejelerdi bekitken alǵashqy el. Qazir elimizde 1450-den astam dron tirkelgen, 900-ge jýyq operator sertıfıkaty berilgen, halyq tyǵyz ornalasqan aımaqtarda ushý úshin 78 ruqsat jáne zańdy tulǵalarǵa aero qyzmet (kartografııa, geodezııa, monıtorıng, egistikterge hımııalyq óńdeý jáne t. b.) júrgizýge 56 ruqsat berilgen.

Elde dron operatorlaryn daıarlaıtyn 5 oqý ortalyǵy jumys istep tur. Al 2027 jyldan bastap osy salada ulttyq ǵylymı strategııalardy iske asyrý bastalady.

Memlekettik organdar tarapynan drondarǵa degen suranys turaqty ósip keledi. 2024 jyly drondar satyp alýǵa shamamen 1,1 mlrd teńge jumsalǵan.

2031 jylǵa qaraı tujyrymdamany júzege asyrý nátıjesinde Qazaqstanda:

— 5000 kásibı dron operatory men ushqyshy daıarlanady;

— kolledjder men joǵary oqý oryndarynyń 80%-y pılotsyz avıatsııa negizderine oqytady;

— aýyl sharýashylyǵy, ónerkásip jáne energetıka salasyndaǵy kompanııalardyń keminde 30%-y pılotsyz avıatsııalyq júıege kóshedi;

— dron komponentteriniń 10%-ǵa jýyǵy el ishinde shyǵarylady;

— pılotsyz avıatsııa salasyndaǵy keminde úsh qazaqstandyq ázirleme halyqaralyq naryqqa shyǵady.

Eske salaıyq, Qazaqstan 2023 jyly shildede JARUS pılotsyz avıatsııa salasyndaǵy erejelerdi ázirleý jónindegi komıtetke kirdi. 

Aıta ketsek, Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev pılotsyz kólik jobalarynyń avtorlaryna erekshe quqyqtyq rejım berýdi usyndy.