Elimizde azamattyq avıatsııany damytýdyń 2050 jylǵa deıingi jospary ázirlenip jatyr
ASTANA. KAZINFORM- Halyqaralyq azamattyq avıatsııa uıymynyń (IKAO) Bas hatshysy Hýan Karlos Salasar Qazaqstanǵa alǵashqy resmı sapary aıasynda IKAO EUR/NAT bıýrosynyń óńirlik dırektory Nıkolas Rallo jáne QR Kólik vıtse-mınıstri Talǵat Lastaevpen birge Qazaqstannyń avıatsııalyq ákimshiligine (QAÁ) bardy.
QR Kólik mınıstrligi baspasóz qyzmetiniń habarlaýynsha, sapar barysynda ol uıymnyń qyzmetimen tanysyp, ujymymen kezdesti. Kezdesýde avıatsııalyq qaýipsizdik salasyndaǵy halyqaralyq standarttarǵa sáıkestiktiń 95,7% deńgeıine jetkeni jáne memlekettik qadaǵalaý júıesin odan ári jetildirý máseleleri talqylandy. Osy kórsetkishtiń arqasynda Qazaqstan álemdegi úzdik 20 eldiń qataryna endi.
Qonaqtarǵa Qazaqstannyń azamattyq avıatsııa salasyndaǵy memlekettik qadaǵalaýdy júzege asyrý boıynsha Qazaqstannyń avıatsııalyq ákimshiligi qyzmetiniń negizgi baǵyttary tanystyryldy.
-Biz aýdıt baǵdarlamalary aıasynda jumys júrgizemiz jáne, árıne, óz áleýetin nyǵaıtý úshin qoldaý suraǵan memleketterge kómek kórsetemiz. Alaıda osy bastamalardy is júzinde júzege asyryp, sózin naqty ispen dáleldep júrgen adamdarmen tikeleı júzdesý múmkindigi kún saıyn bola bermeıdi. Sondyqtan kásibı maman retinde atqaryp jatqan eńbekterińiz úshin barshańyzǵa zor alǵysymdy bildiremin, – dedi Hýan Karlos Salasar.
Sondaı-aq 2026 jylǵy 20–22 qazanda Astanada ótken IKAO-nyń Avıatsııalyq qaýipsizdik aptalyǵyn uıymdastyrýǵa Qazaqstannyń avıatsııalyq ákimshiligi qosqan úles erekshe atap ótildi. Atap aıtqanda, sımpozıým, taqyryptyq paneldik sessııalar jáne memleketter, halyqaralyq uıymdar men avıatsııa salasy ókilderiniń qatysýymen ótken ekijaqty kezdesýlerdi ótkizýge qosqan úlesine nazar aýdaryldy.
Kezdesý barysynda memlekettik qadaǵalaý júıesin odan ári jetildirý, Qazaqstannyń azamattyq avıatsııasyn damytý, 2050 jylǵa deıingi azamattyq avıatsııany damytýdyń master-josparyn ázirleý jáne aldaǵy aýdıtterge daıyndyq máseleleri talqylandy.
-Tıimdilik tek naqty faktilermen rastalýy tıis. Al talaptardy is júzinde engizý týraly aıtatyn bolsaq, olardyń oryndalýy árbir sertıfıkat pen lıtsenzııa ıesi boıynsha qujat júzinde rastalýy qajet. Bul asa mańyzdy. Baǵalaýdy 0%-dan bastańyzdar. Ózderińizge barynsha talapshyl aýdıtor bolyńyzdar. Sonda IKAO toby kelgen kezde sizder úshin kútpegen jaǵdaılar bolmaıdy jáne eń qatań tekserý stsenarııine de daıyn bolasyzdar, – dep atap ótti Nıkolas Rallo.
Óz kezeginde Qazaqstannyń avıatsııalyq ákimshiliginiń bas atqarýshy dırektory Maıkl Denıel QAÁ ujymynyń bedeldi halyqaralyq uıymdardyń baǵalaý rásimderinen ótý barysynda jınaqtaǵan tájirıbesine toqtalyp, aldaǵy maqsattarǵa qol jetkizetinine senim bildirdi.
-Men búkil ujymymyzǵa shyn júrekten alǵys aıtamyn. Áriptesterimiz orasan zor kúsh-jiger jumsap, qomaqty resýrstardy jumyldyrdy. Sonyń arqasynda biz osyndaı joǵary qarqynmen alǵa jyljyp kelemiz. FAA IASA baǵdarlamasy boıynsha jumysty aıaqtaǵannan keıin USOAP aýdıtine daıyndyqqa qaıta kirisip, bul kezeńnen de osyǵan uqsas tásilmen ótemiz. USOAP aıasynda joǵary nátıjeler kórsetetinimizge senimdimin, óıtkeni búkil komandamyzdyń jumys isteý tásili men kásibı kózqarasy osyndaı halyqaralyq standarttarǵa tolyq beıimdelgen, – dedi M. Denıel.
IKAO Bas hatshysynyń sapary Qazaqstannyń halyqaralyq avıatsııalyq qoǵamdastyqpen ózara is-qımylynyń joǵary deńgeıin jáne eldiń azamattyq avıatsııa salasyndaǵy memlekettik qadaǵalaý júıesin jetildirý baǵytyndaǵy kúsh-jigeriniń halyqaralyq deńgeıde moıyndalǵanyn aıǵaqtady. Kezdesý Qazaqstannyń avıatsııalyq ákimshiliginiń kásibı áleýetin jáne ushý qaýipsizdigin, avıatsııalyq qaýipsizdikti arttyrý men salanyń ornyqty damýyn qamtamasyz etý maqsatynda IKAO-men yntymaqtastyqty odan ári nyǵaıtýdyń ózektiligin kórsetti.
Osyǵan deıin Qazaqstanǵa resmı saparmen IKAO Bas hatshysy kelgeni týraly jazdyq.
