Elimizde azamattyq avıatsııany damytý strategııasy qashan qurylady

ASTANA. KAZINFORM — Qazaqstanda «Azamattyq avıatsııany damytý ulttyq strategııasy» jaqyn arada jasalmaıtyn syńaıly. QR Kólik mınıstrligi Kazinform agenttiginiń resmı saýalyna osy maǵynada jaýap joldaǵan.

— «Memlekettik josparlaýdy bekitý týraly» Qazaqstan Respýblıkasy Úkimetiniń 2017 jylǵy 29 qarashadaǵy № 790 qaýlysyna sáıkes, memlekettik josparlaý júıesi qujattaryna Qazaqstan Respýblıkasynyń Ulttyq damý jospary, Qazaqstan Respýblıkasynyń Ulttyq qaýipsizdik strategııasy jáne memlekettik organdardyń damý josparlary, oblystyń, respýblıkalyq mańyzy bar qalanyń, astananyń damý josparlary, ulttyq basqarýshy holdıngterdiń damý josparlary jatady. Azamattyq avıatsııa salasynyń damýyn kórsetetin qujattardy ázirleý sheńberinde mınıstrlik salalyq sarapshylarmen birlesip Qazaqstan Respýblıkasy Úkimetiniń 2022 jylǵy 30 jeltoqsandaǵy № 1116 qaýlysymen bekitilgen Qazaqstan Respýblıkasynyń kólik-logıstıkalyq áleýetin damytýdyń 2030 jylǵa deıingi tujyrymdamasyn ázirledi. Bul rette, qazirgi ýaqytta mınıstrlik shaǵyn avıatsııany damytý jónindegi jeke tujyrymdamany ázirleý máselesin pysyqtaýda. Sondaı-aq, mınıstrlik jaqyn arada azamattyq avıatsııany damytý strategııasyn ázirleýdi joqqa shyǵarmaıdy. Alaıda QR Úkimetiniń 2017 jylǵy 29 qarashadaǵy № 790 qaýlysynyń 81-tarmaǵyna sáıkes mundaı qujatty ázirleý úshin QR Prezıdentiniń jáne Prezıdent Ákimshiligi basshylyǵynyń, Premer-Mınıstrdiń tıisti tapsyrmasy qajet, — delingen habarlamada.

Bul másele elimizdegi buqaralyq aqparat quraldarynda birneshe jyldan beri jazylyp keledi. Tipten elimizdiń bas gazetinde ICAO-da tájirıbe jınaǵan avıator Abyl Kekilbaev azamattyq avıatsııa strategııasy neni qamtýy kerektigin jáne sala mamandarymen birlesip azamattyq avıatsııanyń damý strategııasynyń tujyrymdamasyn daıyndap qoıǵanyn aıtqan bolatyn. 

Aıta keteıik, buǵan deıin Nurtóre Júsip óziniń depýtattyq saýalynda Úkimetke azamattyq avıatsııanyń negizgi problemalaryn atap kórsetken edi.