Elimizde azamattarǵa quqyqtyq keńes beretin jasandy ıntellekt ázirlenedi
ASTANA. KAZINFORM – Elimizde azamattarǵa quqyqtyq keńes beretin jasandy ıntellekt ázirlenip jatyr. Bul týraly Ortalyq kommýnıkatsııalar qyzmetindegi brıfıngte Ádilet vıtse-mınıstri Bekbolat Moldabekov málim etti.

- Qazaqstan ýnıversıtetterimen jumys tobyn qurdyq. Qazaq ulttyq tehnıkalyq ýnıversıtetinde (Sátbaev ýnıversıteti) «Quqyqtyq keńes berý boıynsha jasandy ıntellekt» granty bar. Kelesi úsh jylda Sátbaev ýnıversıteti adamdarǵa jasandy ıntellekt kómegimen keńes alýǵa járdemdesetin jasandy ıntellekt ázirleıdi. Áriptesterimizben memorandým jasasamyz. Ál-Farabı atyndaǵy Qazaq ulttyq ýnıversıtetinde sýperkompıýter bar. Olarmen de atalǵan sýperkompıýterde Qazaqstan ishinde jasandy ıntellektiniń barlyq modýlin iske qosa alý úshin memorandým jasastyq, - dedi vıtse-mınıstr.
Onyń aıtýynsha, bul jumysqa Qaraǵandy ýnıversıteti de qatysady. Bul joǵary oqý ornynda «Sýdıalarǵa sheshim qabyldaýǵa qoldaý kórsetýge arnalǵan jasandy ıntellekt» granty bar. Atalǵan júıe stýdentterdiń bilim alýyna járdemdesip, advokattar úshin sot sheshimderin saraptaýda paıdaly bolmaq. Munan bólek, Qazaqstan naryǵynda jumys isteıtin kompanııalarmen de yntymaqtastyq jolǵa qoıylyp jatyr. Zan Komegi mobıldy qosymshasy arqyly 24/7 rejımde azamattarǵa quqyqtyq keńes berýge arnalǵan jasandy ıntellekt elementteri bar chat-bot ta ázirlengen. Qazirgi ýaqytta ol synaqtan ótip jatyr.
Bekbolat Moldabekov bul jumystar halyqtyń quqyqtyq saýattylyǵyn arttyrý maqsatynda júrgizilip jatqanyn aıtady. Aldaǵy ýaqytta Sátbaev ýnıversıtetinde Halyqqa qyzmet kórsetý ortalyǵy sııaqty «zańgerlik klınıka» ashylmaq. Azamattar odan túrli máselege qatysty keńes ala alady.
Buǵan deıin agroónerkásip salasyna jasandy ıntellekt engizýge grant bólinetini týraly jazǵan bolatynbyz.