Elimizde áıel tergeýshiler kóbeıedi

Búginde elimizde jedel-tergeý toptarynyń quramynda 280 áıel-tergeýshi bar. Atalǵan tájirıbe búkil el aýmaǵyna engiziledi. Bul týraly Májilis tóraǵasy Erlan Qoshanov málim etti, dep habarlaıdy Kazinform. 

«Prezıdent tapsyrmasy boıynsha sońǵy 2 jylda áıelderdi zorlyq-zombylyqtan qorǵaý jónindegi ınspektorlardyń shtat sany eki ese ósti. Keıde áıeldi tek áıel ǵana túsine alady. Sondyqtan biz áıelder men kámeletke tolmaǵandarǵa qatysty zorlyq-zombylyqty tergeıtin áıel tergeýshilerdi kóbeıtýimiz kerek», - dedi Erlan Qoshanov elordada ótip jatqan «Ortalyq Azııa elderi áıelderiniń dıalogy» konferentsııasynda.

Onyń aıtýynsha, búginde respýblıka boıynsha jedel-tergeý tobynyń quramynda 280 áıel-tergeýshi bar.

«Qazaqstanda alǵash ret pılottyq rejımde áıelder polıtsııa bólimshesi quryldy, onda tek áıelder jumys isteıdi. Endi zardap shekken áıelder ýchaskege kelip óz qıyndyqtaryn erkin aıtyp, kómek suraı alady. Jaqyn arada bul tájirıbe búkil el aýmaǵyna engiziledi. Biz problemanyń saldarymen ǵana kúrespeı, sonymen birge zorlyq-zombylyqtyń týyndaýynyń aldyn alýymyz kerek», - deıdi ol.

Elordada «Ortalyq Azııa elderi áıelderiniń dıalogy» konferentsııasy ótip jatyr.

Atalǵan sharaǵa Ózbekstan, Qyrǵyzstan, Túrikmenstan, Tájikstan elderiniń ókilderi qatysýda.