Elimizde avtonesıege suranys 11 paıyzǵa azaıdy
ALMATY. KAZINFORM – Osy jyldyń birinshi toqsanynda Qazaqstanda avtonesıege suranys tómendedi.
Qazaqstan qarjygerler qaýymdastyǵynyń málimetinshe, bıyl bankterge 1,2 mıllıon ótinim túsken. Bul ótken jyldyń sáıkes kezeńimen salystyrǵanda 11 paıyzǵa az. Kólikke beriletin nesıe sanynyń azaıýyna eldegi qatal aqsha-nesıe saıasaty, táýekelderdi aldyn alý sharalary áser etken.
— Jańadan berilgen avtonesıelerdiń jalpy kólemi 17,7%-ǵa qysqaryp, 397,7 mıllıard teńge boldy. Bul rette jalpy nesıe alý kórsetkishi de azaıǵanymen (naryq tek 4,4%-ǵa kemidi), adamdar avtonesıeden kóbirek bas tarta bastaǵan. Bul avtonesıe segmentiniń ózge nesıe baǵyttaryna qaraǵanda tezirek tómendep jatqanyn kórsetedi, - delingen qarjygerler saraptamasynda.
Sonymen qatar ekinshi deńgeıli bankterdiń halyqqa bergen jalpy nesıeleri ishinde avtonesıeniń úlesi de azaıdy: bir jyl buryn bul kórsetkish 11,3% bolsa, qazir 9,7%-ǵa tómendegen. Sarapshylardyń pikirinshe, naryqtyń dınamıkasyna nesıe baǵasynyń ózgerýi qatty áser etken. Bazalyq mólsherlemeniń joǵary bolýy, sondaı-aq avtosalondardyń jeńildikteri azaıýy saldarynan avtonesıeniń ortasha mólsherlemesi ótken jylǵy 14,8%-dan bıyl 24,3%-ǵa deıin kúrt ósken.
Nesıe berý kóleminiń azaıǵanyna qaramastan, avtonesıeniń jalpy portfeli birqalypty ósimdi saqtap, 4,1 trıllıon teńgege jetti (+1,8%).
Bul rette naryq birtindep qymbat avtokólikter men iri nesıeler tarapyna oıysyp keledi. Máselen, somasy 10 mıllıon teńgeden asatyn qaryzdardyń úlesi ótken jylǵy 32,3%-dan bıyl 37,1%-ǵa deıin ósken. Bul avtokólik baǵasynyń qymbattaýyn ǵana emes, tutynýshylardyń tańdaýy da ózgergenin bildiredi.
Avtonesıe portfelindp ýaqytyly tólenbeı, merzimi ótken bereshektiń deńgeıi - 2,9%. Bul jeke tulǵalarǵa beriletin nesıelerdiń naryqtaǵy ortasha kórsetkishinen (4,4%) aıtarlyqtaı tómen. Mundaı turaqtylyq kóliktiń bankte kepilde turýyna jáne qaryz alýshylardy irikteý talaptarynyń qataldyǵyna baılanysty qamtamasyz etilgen.
— Qazir belsendiliktiń tómendegenine qaramastan naryqtyń negizgi kórsetkishteri ornyqty. Avtonesıe qorjyny birqalypty ósip, 4,1 trıllıon teńgege jetti, — dep tolyqtyrdy qarjygerler.
Eske salaıyq, buǵan deıin Ónerkásip komıtetiniń tóraǵasy Azamat Panbaev avtolızıngtiń avtonesıege qaraǵanda qandaı tıimdiligi bolatynyn aıtty.
