Elimizde avtobýs júrgizýshilerine qatysty jol-kólik oqıǵalary kóbeıgen
ASTANA. KAZINFORM — Bas kólik prokýratýrasy jolaýshylar tasymaly salasynda júıeli zańbuzýshylyqtardy anyqtady.
Jyl basynan bastap avtobýs júrgizýshilerine qatysty jol-kólik oqıǵalarynyń sany 5,9%-ǵa (606-dan 644-ke) ósti. Saldarynan 24 adam qaza taýyp, 955 adam jaraqat aldy.
Kólik prokýratýrasy organdarymen júrgizilgen taldaý qorytyndysymen jolaýshylar tasymalyn lıtsenzııalaý jáne júzege asyrý kezinde zańnamanyń óreskel buzylý faktilerin anyqtaǵanyn habarlady.
Atap aıtqanda, jóndeý-óndiristik bazalardyń, tahograftardyń, medıtsına qyzmetkerleri men tehnıkalyq mamandardyń bolýyna qatysty mindetti qaýipsizdik talaptar kóp jaǵdaıda formaldy túrde ǵana saqtalatyny anyqtaldy.
Jóndeý bazalary retinde kólik quraldaryna qyzmet kórsetýge beıimdelmegen obektiler kórsetiledi, bir mamandar bir mezgilde birneshe tasymaldaýshynyń shtatynda tirkeledi, sondaı-aq qoldanylý merzimi ótip ketken saqtandyrý polısteri usynylady.
Jalpy, osyndaı faktiler 448 tasymaldaýshyda anyqtaldy.
Atalǵan mán-jaılar lıtsenzııa berý kezinde de, odan keıingi memlekettik baqylaýdy júzege asyrý barysynda da eleýli kemshilikterdiń bar ekenin kórsetedi.
Ýákiletti organdar osy saladaǵy biliktilik talaptaryna sáıkes kelmeıtin sýbektilerdi ýaqtyly anyqtaýdy jáne olardy jolaýshylar tasymalynan shettetýdi qamtamasyz etpegen.
Prokýrorlyq qadaǵalaý aktisin qaraý sheńberinde 124 tasymaldaýshy ákimshilik jaýaptylyqqa tartylyp, 36 tasymaldaýshynyń lıtsenzııalarynyń qoldanysy toqtatyldy. Qalǵandary boıynsha jumys jalǵasýda.
Kináli laýazymdy tulǵalar ákimshilik jáne tártiptik jaýaptylyqqa tartyldy.
Anyqtalǵan zańbuzýshylyqtardy tolyq joıý máselesi Bas kólik prokýratýrasynyń baqylaýynda.
Almatylyqtar lyq tolǵan avtobýstarǵa shaǵymdanyp jatqanyn jazǵan edik.
