Elimizde aýyzsýdy esepteýdiń jańa ádistemesi bekitildi

ASTANA. KAZINFORM — Endi qazaqstandyqtar aýyzsýdyń tólemin jańa ádispen tóleıdi. 

Ónerkásip jáne qurylys mınıstri 2025 jylǵy 22 tamyzdaǵy buıryǵymen aýyzsýdy berý qyzmetiniń quny sýbsıdııalanatyn sýmen jabdyqtaý júıesinen berilgen bir tekshe metr aýyzsý úshin tólemaqy mólsherin esepteý ádistemesin bekitti.

Halyq tutynǵan sýdyń tólemaqysyn esepteıtin ákimshiniń negizgi mindetteri:

— oblys ortalyqtarynda, respýblıkalyq mańyzy bar qalalarda jáne elordada sýmen jabdyqtaý jáne sý burý qyzmetin kórsetetin tabıǵı monopolııa sýbektileri boıynsha respýblıka boıynsha ortasha tarıfti esepteıdi;

— oblys boıynsha ortasha tarıfti esepteıdi;

— oblys boıynsha áleýmettik-ekonomıkalyq taldaý júrgizedi;

— áleýmettik-ekonomıkalyq taldaý nátıjesi boıynsha qorytyndy daıyndaıdy.

Sonymen qatar, eger bir adamnyń sý tutyný normasy táýligine 140 lıtrden assa, ákimshi kelesi kólemge tólemaqy mólsherin 1,3 koeffıtsıentin qoldana otyryp esepteıdi.

— Halyq úshin ortasha tarıf tutynýshylarǵa sýmen jabdyqtaý qyzmetine arnalǵan ortasha tarıfti jáne sýmen jabdyqtaý qyzmetine tarıftiń jalpy somasyn eskere otyryp esepteledi. Buǵan deıin qoldanylǵan, aýyzsýmen jabdyqtaýdyń balamasyz kózi asa mańyzdy toptyq jáne jergilikti sýmen jabdyqtaý júıesi arqyly halyqqa berilgen bir tekshe metr aýyz sý úshin tólemaqy mólsherin esepteý ádistemesiniń kúshi joıyldy-delingen qujatta.

Qujat jobasymen tolyǵyraq siltemege ótip tanysýǵa bolady. 

Buıryq 2025 jylǵy 13 qyrkúıekte qoldanysqa engiziledi.

Aıta keteıik, bıyl tamyzda sý obektilerin halyqty aýyzsýmen qamtamasyz etý kózderine jatqyzý qaǵıdalary bekitilgen edi.