Elimizde aýyl sharýashylyǵyna baýlıtyn agrosynyptar ashylyp jatyr

ASTANA. KAZINFORM – Aýyl sharýashylyǵy mınıstrligi oqýshylarǵa erte kásiptik baǵdar berý maqsatynda agrosynyptar jelisin damytyp jatyr. Alǵashqy pılottyq joba Aqmola, Qostanaı jáne Soltústik Qazaqstan oblystarynda júzege asyrylyp jatyr, dep habarlaıdy mmınıstrliktiń baspasóz qyzmeti.

Elimizde aýyl sharýashylyǵyna baýlıtyn agrosynyptar ashylyp jatyr
Foto: QR Aýyl sharýashylyǵy mınıstrligi

Jobanyń maqsaty – oqýshylardy agroónerkásiptik keshenniń negizgi baǵyttarymen tanystyrý, alǵashqy tájirıbelik daǵdylaryn qalyptastyrý jáne bolashaq mamandyǵyn sanaly túrde tańdaýyna kómektesý.

Agrosynyptarda teorııalyq sabaqtar agrarlyq kásiporyndar men ǵylymı uıymdar bazasyndaǵy tájirıbelik jumystarmen ushtastyrylady. Oqýshylar aýyl sharýashylyǵy tehnıkasy men jabdyqtarynyń jumysyn kórip, zamanaýı tehnologııalardyń óndiriste qoldanylýymen tanysady.

Qazir Aqmola oblysyndaǵy úsh mektepte jeti agrosynyp jumys isteıdi. Qostanaı oblysynda alty mektepte agrosynyptar men agrostýdııalar ashylǵan.

Soltústik Qazaqstan oblysynda joba jeti aýdanda qolǵa alynǵan. Qazirgi ýaqytta 120 oqýshy ósimdik jáne mal sharýashylyǵy baǵyttary boıynsha bilim alyp jatyr.

Oqý úderisine aýyl sharýashylyǵy kásiporyndary da qatysady. Sonymen qatar sabaq ótkizýge M. Qozybaev atyndaǵy Soltústik Qazaqstan ýnıversıtetiniń oqytýshylary tartylǵan.

Oqýshylarǵa Soltústik Qazaqstan aýyl sharýashylyǵy ǵylymı-zertteý ınstıtýtyna tanymdyq ekskýrsııalar uıymdastyrylady. Onda olar ǵylymı ázirlemelermen, zertteý nátıjelerimen jáne zamanaýı agrotehnologııalarmen tanysady. Aldaǵy ýaqytta aýyl sharýashylyǵyn mehanıkalandyrý baǵyty boıynsha da agrosynyptar ashý josparlanyp otyr.

-Joba Qazaqstanda 2026–2030 jyldarǵa arnalǵan mal sharýashylyǵyn damytý jónindegi keshendi jospar aıasynda júzege asyrylý ústinde. Qujatta agroónerkásiptik keshendi bilikti mamandarmen qamtamasyz etý jáne jastardy aýyl sharýashylyǵyna tartý sharalary kózdelgen,-delingen habarlamada.

Agrosynyptar mekteptegi bilim men bolashaq kásibı daıarlyqtyń arasyndaǵy baılanysty nyǵaıtýǵa baǵyttalǵan. Bul aýyl sharýashylyǵy kásiporyndaryna bolashaq mamandardy erte kezeńnen bastap daıarlaýǵa, al jalpy salaǵa bilikti kadrlar rezervin qalyptastyrýǵa múmkindik beredi.

Osyǵan deıin elimizde aýyl mektepterine jańa mindetti pán engizilýi múmkin ekeni týraly jazdyq.