Elimizde áýejaılar jańǵyrtylyp, ushaqtar parki jańarady
ASTANA. KAZINFORM — Kólik mınıstri Nurlan Saýranbaev Astanada 20–22 qazan aralyǵynda ótip jatqan IKAO-nyń avıatsııalyq qaýipsizdik aptalyǵy (ICAO Security Week 2026) aıasynda Halyqaralyq azamattyq avıatsııa uıymynyń (IKAO) Bas hatshysy Hýan Karlos Salasarmen kezdesti.
Mınıstrliktiń baspasóz qyzmeti málim etkendeı, kezdesý barysynda Qazaqstannyń IKAO-men ózara is-qımyly, avıatsııalyq qaýipsizdikti nyǵaıtý jáne azamattyq avıatsııa salasyndaǵy halyqaralyq yntymaqtastyqty damytý máseleleri talqylandy.
Mınıstr azamattyq avıatsııa salasyn damytý baǵytynda qabyldanyp jatqan sharalar týraly habardar etti.
— 2028 jylǵa deıingi úsh jyldyq jospar sheńberinde áýe qatynasy baǵyttarynyń jelisin keńeıtý, áýejaılardy jańǵyrtý, áýe kemeleri parkin jańartý jáne avıatsııa mamandaryn daıarlaý jumystary júrgizilip jatyr. Sonymen qatar, IKAO-nyń saraptamalyq qoldaýymen 2050 jylǵa deıingi azamattyq avıatsııany damytý jónindegi master-jospar ázirlenýde, — delingen habarlamada.
Kezdesý qorytyndysy boıynsha taraptar azamattyq avıatsııanyń basym baǵyttary boıynsha yntymaqtastyqty odan ári nyǵaıtýǵa jáne ózara is-qımyldy damytýǵa múddeli ekenin rastady.
Budan buryn Qazaqstan alǵash ret IKAO-nyń Avıatsııalyq qaýipsizdik aptalyǵyn ótkizetinin jazdyq.
Sondaı-aq Qazaqstanǵa resmı saparmen IKAO Bas hatshysy kelgeni belgili boldy.
