Elimizde áýe ekıpajdaryna lazermen shabýyldaý jıilegen
ASTANA. KAZINFORM – Elimizde áýe kemesin basqarýǵa kedergi jasaý áreketteri úshin qylmystyq jaýapkershilik engizý máselesi qaralyp jatyr. Bul týraly Ádilet mınıstrligi qoǵamdyq tártip salasyndaǵy zańnama departamentiniń dırektory Dýman Súleımenov málim etti.
- Qazaqstanda áýe ekıpajyn lazerlik qurylǵylarmen «soqyr etý» oqıǵalary jıilegen. Ádette bul áreketter ushaq qonǵan nemese kóterilgen kezde bolyp jatady. 2023 jyly pılottardy lazerlik qurylǵylarmen «soqyr etýdiń» 60 deregi tirkeldi. Onyń ishinde 35 derek boıynsha tergeý júrdi, biraq 33 is quramynyń bolmaýyna baılanysty toqtatyldy jáne 2 is qylmysker anyqtalmaǵandyqtan jabyldy. Qalǵan materıaldar quzyrly organdarǵa jiberildi nemese is dápterine tirkeldi, - dedi Dýman Súleımenov ortalyq kommýnıkatsııalar qyzmeti alańynda ótken baspasóz máslıhatynda.
Ádilet mınıstrligi ókiliniń málimdeýinshe, Almaty halyqaralyq áýejaıynda 2017 jyldan 2023 jyl aralyǵynda 98 jaǵdaı tirkelgen.
- Avstralııa, Germanııa, Jańa Zelandııa, Kanada jáne AQSh-ta lazerlik shabýyl qylmys bolyp esepteledi. 2016 jyly Ózbekstanda Qylmystyq kodekstiń 263-1-babyna sáıkes áýe kemesi ekıpajyna lazer sáýlesimen kedergi jasaǵany úshin 1 jylǵa deıin bas bostandyǵynan aıyrý jazasy engizildi. Germanııada 315-bap «Temirjol, sý nemese áýe kommýnıkatsııaǵa qaýipti kedergi jasaý» aıasynda 10 jylǵa deıin bas bostandyǵynan aıyrý jazasy qarastyrylǵan. Halyqaralyq azamattyq avıatsııa uıymy (ICAO) áýe qozǵalysynyń qaýipsizdigine lazer sáýleleriniń táýekelin tanydy, - dep tolyqtyrdy spıker.
Aıta ketsek, ICAO Qazaqstanǵa azamattyq avıatsııany damytýdyń bas josparyn ázirleýge kómektesedi. Bul týraly Halyqaralyq azamattyq avıatsııa uıymy keńesiniń (ICAO) prezıdenti Salvatore Shakkıtano Kazinform agenttigine bergen suhbatynda málim etti.