Elimizde aýa sapasy nasharlaǵan qalalar sany kúrt kóbeıdi
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
— 14 qarashada Pavlodar, Qaraǵandy, Jezqazǵan, Balqash, Temirtaý, Shymkent, Túrkistan, Taldyqorǵan, Almaty jáne Astana qalalarynda atmosferada lastaýshy zattardyń jınalýyna qolaıly meteorologııalyq jaǵdaılar kútiledi, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, Óskemen qalasynda jańa ekologııalyq pasport ázirleý jumystary bastaldy. Qujatta aýaǵa taralatyn zııandy zattardyń kólemi eseptelip, ruqsat etilgen shyǵaryndylar mólsheri belgilenedi.
Sondaı-aq Qaraǵandy oblysynda ekologııalyq ahýal kúrdeli, aımaqta aýaǵa 293,7 myń tonna zııandy zat taraǵan.
Buǵan deıin Soltústik Qazaqstan oblysynda ekologııalyq talaptardy oryndamaǵan 16 sýbekt ákimshilik jaýapkershilikke tartyldy. Olarǵa salynǵan aıyppuldyń jalpy somasy 3 mln teńgeden asty.
