Elimizde aýa raıy qubylmaly: keı óńirde jaýyn, keı jerde aptap

ASTANA. KAZINFORM — Sınoptıkter 14 tamyzǵa arnalǵan aýa raıy boljamyn usyndy, dep habarlaıdy  «Qazgıdromet» RMK baspasóz qyzmeti. 

Aldaǵy kúnderi Qazaqstan aýmaǵynda ártúrli aýa raıy kútiledi.

— Soltústik-batys tsıklon men atmosferalyq fronttardyń áserinen eldiń batysynda, soltústiginde, shyǵysy men ortalyǵynda jańbyr jaýyp, naızaǵaı bolady. Keı jerlerde burshaq túsip, qatty jel men daýyl bolýy múmkin. Soltústikte túnde jáne tańerteń tuman kútiledi. Al ońtústikte kúndiz shańdy daýyl soǵýy múmkin, — delingen habarlamada.

Sonymen qatar antıtsıklonnyń yqpalymen keıbir óńirlerde jaýyn-shashynsyz, ashyq aýa raıy bolady.

Almaty men Jetisý oblystarynda kúndiz qatty ystyq — 35-37 gradýsqa deıin kóteriledi.

Sınoptıkter eldiń kóptegen aımaǵynda órt qaýpi joǵary ekenin, al ońtústik pen batysta — tótenshe deńgeıde ekenin eskertti.

Budan buryn Qazgıdromet tórt oblysta aýa temperatýrasy 35 gradýstan joǵary bolatynyn boljaǵan edi.