Elimizde ashyq aspan astyndaǵy basseınge kirý quny qansha
ASTANA. KAZINFORM — Basseın aptap ystyqta suranysqa ıe demalys oryndarynyń birine aınaldy. Elimizdiń keıbir qalasynda oǵan kirý quny 13 myń teńgege deıin jetti.
Qazir basseıni bar demalys oryndary suranysqa ıe. Baǵaǵa sholý jasaǵan kezde tek ashyq aspan astyndaǵy basseınge kirý quny saralandy.
Aıta keteıik, kirý quny balalarǵa arzan jáne jumys kúnderi tıimdi. Sonymen birge keıbir demalys oryndarynda úsh jasqa, al keı jerlerde alty jasqa deıingi balalarǵa kirý tegin.
Basseın janyndaǵy jazǵy demalys elimiz boıynsha Taraz qalasynda arzanǵa shyǵyp tur. Munda baǵalar 1 000 — 5 000 teńge aralyǵynda. Eń qoljetimdisi — ákimdik qaraýyndaǵy kommýnaldyq jaǵajaı. Alaıda bul jerde baǵa bir saǵatqa ǵana esepteledi, al basqa oryndardyń basym bóliginde tólem bir kúndik demalysqa belgilengen.
Taldyqorǵan men Shymkentte basseınge kirý baǵasy adam basyna 1 500 teńgeden bastalady. Biraq eń joǵary baǵada aıyrmashylyq bar. Taldyqorǵanda shamamen 3 500 teńge bolsa, Shymkentte 7 000 teńgege deıin jetedi.
Túrkistan, Oral jáne Qyzylorda qalalarynda mundaı demalys oryndaryna kirý baǵasy 2 000 teńgeden bastalady. Keıbir oryndarǵa aldyn ala jazylý kerek. Sebebi aptap ystyq kezinde suranys joǵary jáne bos oryn tabý qıyn.
Óskemen men Semeıde basseınge kirýdiń ortasha baǵasy 2 500 teńgeden bastalyp, bir adamǵa shaqqanda 4 500-5 000 teńgege deıin jetedi. Sonymen qatar basseınge barǵanda tamaq shyǵynyn eskergeni jón. Kóptegen demalys aımaǵy tamaq pen sýsyn alyp kirýge tyıym salady.
Aqtóbe men Pavlodarda basseınge kirý baǵasy 3 000 teńgeden bastalady. Alaıda Pavlodardyń jóni bólek. Munda ákimdik ashqan qalalyq jaǵalaýda zamanaýı balalar basseıni bar. Aldyn ala jazylsa, tegin kirýge bolady. Sonymen birge ata-analar da kirip, kámeletke tolmaǵan balalaryn baqylap otyra alady. Alaıda munda demalys ýaqyty shekteýli. Bir saǵatqa ǵana kirýge ruqsat etiledi.
Kelesi orynda Aqtaý tur. Munda basseınge kirý quny 3 500-13 000 teńge aralyǵynda. Al Petropavlda basseın janyndaǵy demalys sál qymbat. Baǵasy 4000-8000 teńge aralyǵynda.
Qostanaı, Qaraǵandy jáne Astanada basseınge kirýdiń eń tómengi quny 5 000 teńgeden bastalady. Keıbir demalys oryndarynda aıaq kıim, súlgi, úrlemeli qorǵanysh quraly men júzý sheńberleri úshin qosymsha aqy tóleýge týra keledi.
Eń qymbat basseın janyndaǵy demalys Kókshetaý men Almatyda tirkeldi. Munda bir adamǵa bılet baǵasy 6 000 teńgeden bastalady. Kópbalaly otbasyna qomaqty aqsha qajet.
Jezqazǵan men Atyraýda ashyq aspan astyndaǵy basseınder tabylmady. Atyraýda akvapark bar. Alaıda ol kádimgi basseıni bar demalys aımaqtarymen salystyrǵanda áldeqaıda qymbatqa túsedi.
Buǵan deıin biz Qazaqstan kýrorttaryndaǵy demalys quny týraly jazdyq.
