Elimizde asfaltty qalpyna keltirý tehnologııasyn ázirleý bastaldy
ASTANA. KAZINFORM — «Qazaqstandyq jol ǵylymı-zertteý ınstıtýty» jol qurylysyna «jasyl» tehnologııalardy engizýge baǵyttalǵan ǵylymı jobany iske asyrýǵa kiristi.
Zertteý jumysy eskirgen asfaltbetondy qalpyna keltirip, ony jol jamylǵysynyń joǵarǵy qabattarynda qaıta paıdalanýǵa múmkindik beretin ınnovatsııalyq jasartqysh quram jasaýǵa arnalyp otyr.
QazjolǴZI mamandarynyń aıtýynsha, regeneratsııa tehnologııasyn qoldaný qurylys qaldyqtarynyń kólemin aıtarlyqtaı azaıtýǵa, energııa tutynýdy tómendetýge jáne asfalt óndirisi kezinde kómirqyshqyl gazynyń shyǵaryndylaryn azaıtýǵa múmkindik beredi. Mundaı tásil materıaldarǵa «ekinshi ómir» syılaıtyn ornyqty jol qurylysynyń jańa modelin qalyptastyrmaq.
— Biz jańa resýrstardy tutynýdyń ornyna baryn qalpyna keltirýge múmkindik beretin sheshimder ázirlep jatyrmyz. Bul qorshaǵan ortaǵa túsetin júktemeni azaıtyp qana qoımaı, jol salasyn anaǵurlym tıimdi jáne tehnologııalyq turǵyda damyta túsedi, — dedi QazjolǴZI jol-qurylys materıaldary jáne jańa tehnologııalar bóliminiń basshysy, PhD Saltanat Ashımova.
Jumystar 2025–2027 jyldarǵa arnalǵan ǵylymı jáne ǵylymı-tehnıkalyq jobalar konkýrsynyń nátıjesi boıynsha alynǵan grant aıasynda júrgizilip jatyr. Zertteý asfaltbetondy regeneratsııalaýǵa arnalǵan jasartqysh quramdy paıdalaný arqyly jol qurylysyna «jasyl» tehnologııalardy engizýge baǵyttalǵan. Jobany iske asyrý Qazaqstannyń klımattyq jáne paıdalaný jaǵdaılaryna beıimdelgen ekologııalyq taza, otandyq quramdy ázirleýge múmkindik beredi. Onyń engizilýi jol jamylǵylarynyń sapasy men beriktigin arttyrýǵa, sondaı-aq salanyń aınalmaly tsıkl qaǵıdattaryn damytýǵa jol ashady.
Joba «jasyl» ınnovatsııalardy damytýǵa jáne Qazaqstannyń ornyqty ári ekologııalyq jaýapty ekonomıkaǵa kóshý úderisindegi rólin kúsheıtýge baǵyttalǵan.
Aıta ketelik ShQO-da ekologııalyq talaptardy buzǵan asfalt zaýytynyń jumysy toqtatylýy múmkin.