Elimizde arnaıy áleýmettik qyzmet kórsetetin uıymdardan lıtsenzııa talap etiledi
ASTANA. KAZINFORM — 2025 jylǵy 1 qańtardan bastap elimizde arnaıy áleýmettik qyzmet kórsetetin uıymdardy lıtsenzııalaý bastalady.
Bul týraly Eńbek jáne halyqty áleýmettik qorǵaý mınıstrligi áleýmettik qorǵaý salasyndaǵy retteý jáne baqylaý komıtetiniń tóraǵasy Tólegen Ospanqulov málim etti.
— Lıtsenzııalaýdy engizý halyqtyń áleýmettik osal toptary úshin kórsetiletin qyzmetterdiń sapasyn arttyrýǵa baǵyttalǵan. Lıtsenzııa berý kezinde qyzmet kórsetetin uıymnyń materıaldyq-tehnıkalyq bazasy, qural-jabdyǵy, medıtsınalyq lıtsenzııasy men órt qaýipsizdigi lıtsenzııasynyń bolýy talap etiledi. Sol sııaqty ǵımarat múgedek jandarǵa beıimdelgen bolýy kerek, sonymen qatar tolyq shtattyń bolýy eskeriledi. Sonyń nátıjesinde sapaly qyzmet kórsetpeıtin uıymdar shettetiledi, — dedi Tólegen Ospanqulov Ortalyq kommýnıkatsııalar qyzmeti alańynda ótken baspasóz máslıhatynda.
Komıtet tóraǵasynyń aıtýynsha, lıtsenzııalaýǵa ótinim 26 jeltoqsannan bastap qabyldanady.
— Qazir áleýmettik ınspektorlar jergilikti atqarýshy organdarmen birlesip, arnaıy áleýmettik qyzmet kórsetetin uıymdardy lıtsenzııalaýǵa daıyndyǵyn taldaý boıynsha jumys júrgizip jatyr, — deıdi ol.
Aıta keteıik, qarashada Úkimet basshysy múgedek jandardy eńbekpen qamtý boıynsha mınıstr men ákimderge mindetter júktedi.
Osyǵan deıin múgedek jandar qoǵamdyq orynda qandaı kedergilerge jıi tap bolatyny anyqtaldy.
