Elimizde apta ishinde qandaı jańa óndirister men áleýmettik nysandar ashyldy
ASTANA. KAZINFORM — Qazaqstan óńirlerinde jańa óndirister ashylyp, ınfraqurylymdyq jáne áleýmettik nysandar paıdalanýǵa berilip jatyr. Aýyl sharýashylyǵy, óńdeý ónerkásibi, qurylys, turǵyn úı jáne áleýmettik ınfraqurylym baǵyttaryndaǵy birqatar jobalar el ekonomıkasyn ártaraptandyrýǵa jáne halyqtyń turmys sapasyn arttyrýǵa baǵyttalǵan.
Soltústik Qazaqstan oblysynda taýarly sút fermasy paıdalanýǵa berildi. Birinshi kezeńde 800 basqa arnalǵan qora, sút blogy, 550 basqa arnalǵan saýylmaıtyn jáne buzaýly sıyrlardy ustaýǵa arnalǵan úı-jaı, eki buzaý qora jáne qurama jem zaýyty salyndy. Keshen aýmaǵynda Ortalyq Azııadaǵy eń iri 100 basqa arnalǵan saýý karýseli ornatylǵan. Osy ýaqytqa deıin Germanııadan 585 bas asyl tuqymdy mal ákelindi. Jyl sońyna deıin taǵy 660 bas ákelinedi. Joba boıynsha munda jalpy sany 12 myń basqa jetedi.
Abaı oblysynda kúnbaǵys tuqymyn óńdeý jáne ósimdik maıyn óndirý zaýyty paıdalanýǵa berildi. Jobanyń quny 7 mlrd teńgeni quraıdy. Kásiporyn táýligine 300 tonnaǵa deıin maı óndirýge, 500 tonnaǵa deıin tuqym tazartýǵa jáne qurama jem shyǵara alady. Munda 120-dan astam jumys orny qurylǵan, ónim ishki naryq pen eksportqa baǵdarlanǵan.
Qyzylorda oblysynyń Jańaqorǵan aýdanynda quny 5,5 mlrd teńge bolatyn qus fabrıkasy ashyldy. Kásiporynnyń qýaty — jylyna 6 myń tonnaǵa jýyq qus eti. 12 qus qora, soıý jáne ınkýbatsııa tsehy bar nysanda 120 jumys orny quryldy. Ónim óńirge jáne kórshi oblystarǵa jetkiziletin bolady.
Qaraǵandy oblysynda kirpish zaýyty iske qosyldy. Jobaǵa salynǵan ınvestıtsııanyń jalpy kólemi 1,5 mlrd teńgeden astam. Kásiporynnyń qýaty — jylyna 45 mıllıon kirpish. Jekemenshik saz ken orny bar nysan óndiristiń tolyq tsıkline ıe. Odan shyǵatyn ónimder Qaraǵandy jáne Aqmola oblystarynyń qajettilikterin qamtamasyz etedi.
Qyzylorda oblysynyń Jańaqorǵan kentinde sý taratý stansasy men jetkizý jelisi paıdalanýǵa berildi. Quny 1,1 mlrd teńge bolatyn joba memleketke qaıtarylǵan aktıvter qarajaty esebinen júzege asyryldy. Nátıjesinde 1500-ge jýyq úı sapaly aýyz sýmen qamtamasyz etildi.
Taldyqorǵan qalasynda áleýmettik osal sanattaǵy 41 otbasy «Bereke» kottedj qalashyǵynan, «Jastar-3» turǵyn alabynan, «Shyǵys», «Qulager» shaǵyn aýdandarynan jáne Q.Jalaıyrı dańǵylynan jańa baspananyń kiltterin aldy. Bıyl oblys ortalyǵynda 1,4 myńǵa jýyq adam qonys toıyn toılaıdy.
Shymkentte kezekte turǵandar esebindegi 80 otbasy (kóp balaly jáne tolyq emes otbasylar, múgedek azamattar, jetim balalar) satyp alý quqyǵymen jalǵa beriletin turǵyn úı baǵdarlamasy boıynsha páter aldy.
Túrkistan oblysy Saýran aýdany Shornaq aýylynda quny 1,7 mlrd teńge bolatyn jańa sport kesheni paıdalanýǵa berildi. 1 ga aýmaqty alyp jatqan nysanda basketbol, boks, kúres jáne sport zaldary ornalasqan. 40 jańa jumys orny quryldy.
Túrkistan oblysy Kentaý qalasynyń Qarnaq turǵyn úı alabynda 300 oryndyq Dostyq úıiniń ǵımaraty ashyldy. Ǵımarattyń jalpy aýdany — 2,8 myń sharshy metr. Nysan mádenı-buqaralyq is-sharalardy ótkizýge arnalǵan zamanaýı jabdyqtarmen tolyq jabdyqtalǵan.
Eske salaıyq, buǵan deıin Ulytaý oblysynda qaıtarylǵan aktıvter esebinen jańa medıtsınalyq jáne sý nysandary ashylǵanyn habarlaǵan edik.
