Elimizde apta ishinde qandaı kadrlyq ózgerister boldy
ASTANA. KAZINFORM – 16–22 qarasha aralyǵynda elimizdiń memlekettik organdary men óńirlik basqarmalarynda, sondaı-aq mádenıet jáne sport salalarynda birqatar kadrlyq ózgeris boldy. Kazinform agenttigi apta ishindegi taǵaıyndaýlarǵa sholý usynady.
16 qarashada Memleket basshysynyń Jarlyǵymen Marat Irmenov Ulttyq qaýipsizdik komıtetiniń tóraǵasy bolyp taǵaıyndaldy.
Marat Irmenov 1993 jyly Batys Qazaqstan aýyl sharýashylyǵy ınstıtýtyn, 1996 jyly QR Ulttyq qaýipsizdik komıtetiniń ınstıtýtyn, 2000 jyly Halyqaralyq quqyq jáne naryq akademııasyn támamdaǵan.
1996–2000 jyldary ulttyq qaýipsizdik organdarynda jedel qyzmette, al 2000–2025 jyldary basshylyq qyzmetterde jumys istegen.
2025 jylǵy qazannan bastap QR Ulttyq qaýipsizdik komıteti tóraǵasynyń orynbasary qyzmetin atqarǵan.
2019 jyly Prezıdent Jarlyǵymen oǵan ulttyq qaýipsizdik general-maıory arnaýly ataǵy berilgen.
Baýyrjan Shálekenov QR Qaýipsizdik Keńesi apparatynyń Aqparattyq qaýipsizdik bóliminiń meńgerýshisi bolyp taǵaıyndaldy.
Memleket basshysynyń ókimimen Renat Aıtaev QR Prezıdenti Ákimshiliginiń Memlekettik baqylaý bóliminiń meńgerýshisi bolyp taǵaıyndaldy.
Renat Qurmetjanuly 1976 jyly Óskemen qalasynda dúnıege kelgen. 1998 jyly D. Serikbaev atyndaǵy Shyǵys Qazaqstan memlekettik tehnıkalyq ýnıversıtetin ınjener-ekonomıst mamandyǵy boıynsha, 2001 jyly Qazaq memlekettik zań akademııasyn zańger mamandyǵy boıynsha támamdaǵan.
Eńbek jolyn 1998 jyly bastaǵan. Ár jyldary memlekettik kirister, kedendik baqylaý, eńbek jáne halyqty áleýmettik qorǵaý, ındýstrııa jáne saýda salalarynda basshylyq qyzmetter atqarǵan.
Úkimet qaýlysymen Ǵanı Nyǵymetov ǵylym jáne joǵary bilim vıtse-mınıstri bolyp taǵaıyndaldy.
Ǵanı Nyǵymetov 1983 jyly Aqtóbe oblysynda dúnıege kelgen. L. N. Gýmılev atyndaǵy Eýrazııa ulttyq ýnıversıtetin, AQSh-taǵy Montereı halyqaralyq zertteýler ınstıtýtyn jáne Nazarbaev ýnıversıtetin támamdaǵan.
Buǵan deıin Soltústik Qazaqstan oblysy ákiminiń orynbasary, Prezıdent Ákimshiliginiń memlekettik ınspektory, Senat Apparaty basshysynyń orynbasary qyzmetterin atqarǵan. 2024 jylǵy sáýirden bastap Ǵumarbek Dáýkeev atyndaǵy Almaty energetıka jáne baılanys ýnıversıtetiniń rektory bolǵan.
Ádilet Turǵanbaev týrızm jáne sport vıtse-mınıstri bolyp taǵaıyndaldy.
Ádilet Turǵanbaev 1988 jyly Pavlodar oblysynda dúnıege kelgen. Qazaqstan men Sıngapýrdaǵy joǵary oqý oryndarynda bilim alǵan. Prezıdenttik jastar kadr rezerviniń múshesi.
Eńbek jolyn 2010 jyly bastaǵan. Ár jyldary Mádenıet jáne sport mınıstrliginde, Premer-mınıstr Keńsesinde jáne týrızm salasynda qyzmet atqarǵan. Jańa laýazymǵa deıin Týrızm jáne sport mınıstrliginiń Oıyn bıznesin jáne lotereıany retteý komıtetin basqarǵan.
Jantas Ospan Atyraý oblysynyń energetıka jáne turǵyn úı-kommýnaldyq sharýashylyq basqarmasynyń basshysy bolyp taǵaıyndaldy.
Ol Atyraý munaı jáne gaz ınstıtýtynda, S. Ótebaev atyndaǵy Atyraý munaı jáne gaz ýnıversıtetinde jáne Almaty menedjment ýnıversıtetinde bilim alǵan.
Eńbek jolyn 2004 jyly bastaǵan. Munaı-gaz salasynda túrli qyzmet atqaryp, keıin oblystyq energetıka jáne turǵyn úı-kommýnaldyq sharýashylyq basqarmasynda jumys istegen. Jańa qyzmetke taǵaıyndalǵanǵa deıin oblystyq tabıǵı resýrstar jáne tabıǵat paıdalanýdy retteý basqarmasyn basqarǵan.
17 qarashada Birjan Kósherbaev Soltústik Qazaqstan oblysynyń qurylys, sáýlet jáne qala qurylysy basqarmasynyń basshysy bolyp taǵaıyndaldy.
Ol Soltústik Qazaqstan oblysynyń Aqqaıyń aýdanynda dúnıege kelgen. Ulttyq bıznes ınstıtýtyn «Quqyqtaný» mamandyǵy boıynsha támamdaǵan.
Eńbek jolyn memlekettik sáýlet-qurylys baqylaýy salasynda bastaǵan. Keıin oblys ákiminiń bas ınspektory, Petropavl qalasy ákiminiń orynbasary jáne oblystyq qurylys basqarmasy basshysynyń orynbasary qyzmetterin atqarǵan. Taǵaıyndalǵanǵa deıin jeke kásippen aınalysqan.
Nursultan Ermekbaev Farmatsııa komıtetiniń Qyzylorda oblysy boıynsha departamentiniń basshysy bolyp taǵaıyndaldy.
Nursultan Álimbaıuly 1992 jyly Qyzylorda qalasynda dúnıege kelgen. Astana medıtsına ýnıversıtetinde farmatsııa, Qorqyt ata atyndaǵy Qyzylorda ýnıversıtetinde memlekettik jáne jergilikti basqarý mamandyqtary boıynsha bilim alǵan.
Eńbek jolyn 2017 jyly Farmatsııa komıtetiniń Qyzylorda oblysy boıynsha departamentinde bastaǵan. 2026 jylǵy shildeden bastap departament basshysynyń orynbasary qyzmetin atqarǵan.
Pıter Leven «Elimaı» fýtbol klýbynyń bas bapkeri bolyp taǵaıyndaldy.
Pıter Leven 1983 jyly 27 qyrkúıekte Shotlandııanyń Glazgo qalasynda dúnıege kelgen.
Ár jyldary «Aberdın», «Orenbýrg» jáne «Dınamo» (Brest) klýbtarynyń bapkerlik shtabynda jumys istegen. 2025 jyly Shotlandııa kýbogyn jeńip alǵan «Aberdın» klýbynyń bapkerlik shtabynda bolǵan.
Fýtbolshy retinde «Kılmarnok», «Glazgo Reındjers» jáne Shotlandııa jastar quramasynda óner kórsetken.
18 qarashada Qurmanbek Jumaǵalı Sháken Aımanov atyndaǵy «Qazaqfılm» ulttyq kınostýdııasynyń prezıdenti bolyp taǵaıyndaldy.
Ol eńbek jolyn 2004 jyly bastaǵan. Ár jyldary «Qazaqstan» RTRK-da basshylyq qyzmetter atqaryp, Mańǵystaý oblysy ishki saıasat basqarmasynyń basshysy, «Qazaq radıolarynyń» dırektory bolǵan.
2019–2021 jyldary «Astana», 2021–2023 jyldary «31 arna» telearnalarynyń bas dırektory qyzmetin atqarǵan. 2023 jylǵy shildeden bastap Ulttyq kınony qoldaý memlekettik ortalyǵynyń basqarma tóraǵasy bolǵan.
Áltaıyr Qojahmetov Jambyl atyndaǵy Qazaq memlekettik akademııalyq fılarmonııasynyń dırektory bolyp taǵaıyndaldy.
Eńbek jolyn Sankt-Peterbýrgte orkestr ártisi bolyp bastaǵan. Keıin Jambyl atyndaǵy fılarmonııada Memlekettik akademııalyq sımfonııalyq orkestrdiń ártisi jáne fılarmonııanyń bas ákimshisi qyzmetterin atqarǵan.
2024 jyldan bastap Roza Baǵlanova atyndaǵy «Qazaqkontsert» memlekettik kontserttik uıymy dırektorynyń shyǵarmashylyq qyzmet jónindegi orynbasary qyzmetin atqarǵan. 2025–2026 jyldary atalǵan uıym dırektorynyń mindetin atqarǵan.
Ǵanıjan Asanuly Ekologııa jáne tabıǵı resýrstar mınıstrligi apparatynyń basshysy bolyp taǵaıyndaldy.
Ǵanıjan Asanuly 1986 jyly Túrkistan oblysynda dúnıege kelgen. Qarjy polıtsııasy akademııasyn, Ulybrıtanııadaǵy King’s College London oqý ornyn jáne Qaztutynýodaǵy Qaraǵandy ekonomıkalyq ýnıversıtetin bitirgen. Prezıdenttik jastar kadr rezerviniń múshesi.
Eńbek jolyn 2008 jyly qarjy polıtsııasy organdarynda bastaǵan. Ár jyldary Memlekettik qyzmet isteri agenttigi men Sybaılas jemqorlyqqa qarsy is-qımyl agenttiginde túrli qyzmetter atqarǵan.
2022–2023 jyldary Prezıdent Ákimshiliginiń Memlekettik qyzmet jáne kadr saıasaty bóliminiń sektor meńgerýshisi, al 2023 jyldan Memlekettik qyzmet bóliminiń sektor meńgerýshisi bolǵan.
19 qarashada Marat Qojaev TMD Parlamentaralyq Assambleıasynyń Saıası máseleler jáne halyqaralyq yntymaqtastyq jónindegi turaqty komıssııasynyń tóraǵasy bolyp saılandy.
Sheshim Túrikmenstanda ótken komıssııa otyrysynda qabyldandy. Jıyn TMD Parlamentaralyq Assambleıasynyń 61-plenarlyq otyrysy aıasynda uıymdastyryldy.
Buǵan deıin Kazinform agenttigi 9–15 qarasha aralyǵynda bolǵan kadrlyq ózgeristerge sholý jasaǵan edi.