Elimizde apta ishinde qandaı kadrlyq ózgeris boldy
ASTANA. KAZINFORM – Ótip bara jatqan apta ishinde elimizde birqatar kadrlyq aýys-túıis boldy. Kazinform agenttigi 26-31 qazan aralyǵyndaǵy jańa kadrlyq taǵaıyndaýlarǵa sholý usynady.
Aptanyń alǵashqy kúni Jeńis Qasymbek Ústel tennısi federatsııasynyń prezıdenti bolyp saılandy.
QR Ústel tennısi federatsııasynyń kezekten tys konferentsııasynda Astana qalasynyń ákimi Jeńis Qasymbek federatsııa prezıdenti bolyp taǵaıyndaldy.
Bul sheshim qazaqstandyq ústel tennısi damyp kele jatqan kezeńde jáne Astanada ótetin 2027 jylǵy álem chempıonatyna daıyndyq aıasynda qabyldandy. Jańa prezıdenttiń basshylyǵymen Federatsııa aǵymdaǵy bastamalardy iske asyrýdy jalǵastyrady. Bul týraly federatsııanyń baspasóz qyzmeti málim etti.
28-qazan, seısenbi kúni Mańǵystaý oblysy Polıtsııa departamentiniń bastyǵy aýysty. Bul qyzmetke Amankeldi Dosjanov taǵaıyndaldy.
Amankeldi Asqaruly, QR Іshki ister mınıstrliginiń Almaty joǵary mektebin bitirgen.
Eńbek jolyn tergeý bólimshelerinde bastaǵan. Ár jyldary Mańǵystaý oblysy Mańǵystaý aýdanynyń ishki ister bólimin, Munaıly aýdanynyń ishki ister bólimin jáne Jańaózen qalalyq ishki ister basqarmasyn basqarǵan.
2018 jyldan bastap Mańǵystaý oblysy Polıtsııa departamenti bastyǵynyń orynbasary qyzmetin atqarǵan. 2023 jylǵy naýryzdan bastap Qyzylorda oblysy Polıtsııa departamenti bastyǵynyń orynbasary boldy. Al 2026 jylǵy qańtardan beri Іshki ister mınıstrligi ortalyq apparatynyń Tergeý departamenti bastyǵynyń orynbasary qyzmetin atqarǵan.
Dál osy kúni, Aqtaý qalasy ákiminń orynbasary da saılandy. Bul laýazymǵa Aıda Týleeva keldi.
Ol memlekettik basqarý, jýrnalıstıka jáne qoǵamdyq kommýnıkatsııalar salalarynda eńbek etken.
Máskeý polıtehnıkalyq ýnıversıtetiniń Baspasóz jáne medıaındýstrııa joǵary mektebin «Jýrnalıstıka» mamandyǵy boıynsha támamdaǵan. Sondaı-aq «Quqyqtaný» mamandyǵy boıynsha joǵary bilimi bar.
Eńbek jolyn 2015 jyly «Qazaqstan» respýblıkalyq teleradıokorporatsııasy» AQ Mańǵystaý oblystyq fılıalynda bastaǵan. Ár jyldary redaktor, redaktor-júrgizýshi jáne redaktor-taldaýshy qyzmetterin atqarǵan. Sonymen qatar respýblıkalyq basylymdardyń menshikti tilshisi bolyp, Mańǵystaý oblysy ákiminiń baspasóz qyzmetinde jumys istegen.
2021 jyldan bastap Mańǵystaý oblysy ákimi apparatynda óńirlik damý jáne taldaý baǵytynda qyzmet atqardy. Sol jyldyń jeltoqsan aıynda Mańǵystaý oblysynyń Qoǵamdyq kommýnıkatsııa ortalyǵynyń dırektory bolyp taǵaıyndalyp, bul qyzmetti 2025 jylǵy naýryzǵa deıin atqardy.
Keıin Aqtaý qalasynyń jergilikti atqarýshy organdary júıesinde jumys istegen. 2025 jylǵy qazannan bastap Mańǵystaý oblysy ákimi apparaty basshysynyń orynbasary qyzmetin atqardy.
29-qazan, beısenbi kúni Aqtóbede halyqty áleýmettik qorǵaý salasyndaǵy retteý jáne baqylaý departamentiniń basshysy taǵaıyndaldy.
Departament basshysynyń qyzmetine Ánýarbek Qonjar kiristi. Ol 2002 jyly Q.Jubanov atyndaǵy Aqtóbe ýnıversıtetin, 2015 jyly Qazaq-orys halyqaralyq ýnıversıtetin támamdaǵan.
Eńbek jolyn № 3 Alǵa qazaq orta mektebinde muǵalim bolyp bastaǵan. 2003 — 2004 jyldar aralyǵynda Alǵa aýdandyq ishki saıasat bóliminiń bas mamany, 2004 — 2006 jyldary aralyǵynda Alǵa aýdany ákimi apparatyndaǵy aqparattyq-taldaý bóliminiń bas mamany boldy.
2006 — 2007 jyldary aralyǵynda Alǵa aýdandyq ishki saıasat bóliminiń bas mamany, 2007 — 2013 jyldary aralyǵynda Alǵa aýdany ákimi apparaty memlekettik qyzmet kórsetý, sapasynyń saqtalýyn baqylaý bóliminiń basshysy bolyp eńbek etti.
Al 2013 jyly Alǵa aýdandyq ishki saıasat bóliminiń basshysy, 2013 — 2016 jyldary aralyǵynda Alǵa aýdany ákimi apparatynyń basshysy qyzmetin atqaryp, 2016 — 2020 jyldar aralyǵynda Alǵa aýdany ákiminiń orynbasary boldy.
Keıingi tórt jylda Aqtóbe oblystyq jumyspen qamtýdy úılestirý jáne áleýmettik baǵdarlamalar basqarma basshysynyń orynbasary bolyp jumys istedi.
Dál osy kúni, Pavlodar oblysynyń qurylys basqarmasyna jańa basshy keldi.
Pavlodar oblysy ákiminiń ókimimen Nurbek Qonrotbaev Pavlodar oblysynyń qurylys basqarmasynyń basshysy bolyp taǵaıyndaldy.
Ol S. Toraıǵyrov atyndaǵy Pavlodar memlekettik ýnıversıtetin 2014 jyly «qarjy», 2018 jyly «kólik qurylysy» mamandyqtary boıynsha aıaqtaǵan. «Qurylys» mamandyǵy boıynsha magıstr dárejesi bar.
Eńbek jolyn 2009 jyly «Aqsý-qurylys» JShS ınjeneri bolyp bastaǵan. Odan keıin, 2009 jyldan 2015 jylǵa deıin memlekettik emes qurylymdarda eńbek etti.
2015-2025 jyldary Pavlodar oblysynyń jergilikti atqarýshy organdarynda turǵyn úı-kommýnaldyq sharýashylyq jáne memlekettik sáýlet-qurylys baqylaý salalarynda ınspektordan bastap basshylyq laýazymdarǵa deıingi ártúrli qyzmetterdi atqardy.
2025 jyldan osy laýazymǵa taǵaıyndalǵanǵa deıin Aqsý qalasy ákiminiń orynbasary qyzmetin atqardy.
30 - qazan, juma kúni «Samuryq-Energo» AQ Basqarma tóraǵasy bolyp Ańsar Aıdarov taǵaıyndaldy.
Ańsar Aıdarov «Samuryq-Qazyna» AQ kompanııalar tobynda 2013 jyldan beri jumys isteıdi. Buǵan deıin «Energııa Semırechıa» JShS bas dırektory, «Samuryq-Energo» AQ Jobalyq keńsesiniń basshysy jáne ınvestıtsııalar jónindegi bas dırektory qyzmetterin atqarǵan.
31-qazan, senbi kúni Memleket basshysy Qasym-Jomart Toqaevtyń jarlyqtarymen Qazaqstannyń Marokko Koroldigi men Kýba Respýblıkasyndaǵy Tótenshe jáne Ókiletti Elshileri taǵaıyndaldy.
Aınur Nurlanqyzy Dánenova QR Marokko Koroldigindegi Tótenshe jáne Ókiletti Elshisi laýazymyna saılandy.
Al Oljas Áziluly Isabekov Qazaqstan Respýblıkasynyń Kýba Respýblıkasyndaǵy Tótenshe jáne Ókiletti Elshisi laýazymyna taǵaıyndaldy
Aıta keteıik, buǵan deıin ótken aptadaǵy kadrlyq taǵaıyndaýlar týraly jazǵanbyz.
