Elimizde apta ishinde qandaı kadrlyq ózgeris boldy
ASTANA. KAZINFORM – 9-15 qarasha aralyǵynda Qazaqstanda birqatar kadrlyq aýys-túıis boldy. Apta ishinde memlekettik organdar men túrli saladaǵy laýazymdy qyzmetterge taǵaıyndalǵan tulǵalar týraly Kazinform agenttiginiń sholý materıalynan oqı alasyz.
Apta basynda respýblıkalyq fızıka-matematıka mektebiniń Almaty fılıalynyń dırektory aýysty. Dırektor qyzmetine Almaz Kúnǵojın keldi. Ol «Matematıka» mamandyǵy boıynsha PhD doktory.
Kúnǵojın 2018-2023 jyldary mektepti basqarǵan. Ár jyldary RFMM-da muǵalim, matematıka páninen olımpıadaǵa daıyndaý boıynsha jattyqtyrýshy, dırektordyń beıindik-eksperımenttik jumys jónindegi orynbasary qyzmetterin atqarǵan. 2023 jyldyń qyrkúıeginen bastap «RFMM» KeAQ Basqarma tóraǵasynyń birinshi orynbasary qyzmetin atqardy. Sondaı-aq buǵan deıin RFMM-da bilim alǵan.
Sonymen qatar Qazaqstan Respýblıkasyndaǵy Adam quqyqtary jónindegi ýákildiń buıryǵymen Natalıa Qojabekova Qazaqstan Respýblıkasyndaǵy Adam quqyqtary jónindegi ýákildiń Soltústik Qazaqstan oblysy boıynsha ókili bolyp taǵaıyndaldy.
Natalıa Suńǵatqyzy 1970 jyly Aqtóbe oblysynda týǵan. Qazaqstan Respýblıkasy Іshki ister mınıstrliginiń Qostanaı zań ınstıtýtyn «Zańger» mamandyǵy boıynsha támamdaǵan.
Eńbek jolyn Qazaqstan Respýblıkasynyń ishki ister organdarynda bastaǵan. Ár jyldary ınspektor, aǵa ınspektor, zańger-keńesshi laýazymdarynda qyzmet atqarǵan.
Osy taǵaıyndaýǵa deıin Natalıa Suńǵatqyzy Qazaqstan Respýblıkasyndaǵy Adam quqyqtary jónindegi ýákildiń Túrkistan oblysy boıynsha ókili qyzmetin atqardy.
Sondaı-aq Qaırat Ábdirov Qostanaı qalasynyń prokýrory bolyp taǵaıyndaldy.
Qaırat Nurseıituly Ábdirov 1980 jyly 4 shildede Qaraǵandy oblysynyń Qaraǵandy qalasynda týǵan.
Prokýratýra organdaryndaǵy eńbek jolyn 2003 jyly Qostanaı qalasy prokýrorynyń kómekshisi mindetin atqarýshy qyzmetinen bastaǵan.
Qostanaı oblysy prokýratýrasynyń ishki ister organdaryndaǵy tergeý men anyqtaýdyń zańdylyǵyn qadaǵalaý basqarmasynyń bólim bastyǵy (2009 j.), Qostanaı oblysy Qarabalyq aýdany prokýrorynyń orynbasary (2009–2010 jj.), Qostanaı oblysy prokýratýrasynyń tergeý men anyqtaýdyń zańdylyǵyn qadaǵalaý basqarmasynyń aǵa prokýrory (2011–2012 jj.), Bas kólik prokýratýrasynyń Qostanaı kólik prokýrorynyń orynbasary (2012–2017 jj.), Qostanaı oblysy prokýratýrasynyń úkimderdiń oryndalýyn qadaǵalaý basqarmasynyń bastyǵy (2018–2019 jj.), Qostanaı oblysy Áýlıekól aýdanynyń prokýrory (2019–2023 jj.) qyzmetterin atqarǵan.
2023 jyldan bastap Qostanaı oblysy Denısov aýdanynyń prokýrory qyzmetin atqardy. Sondaı-aq Qostanaı aýdanynyń prokýrory boldy.
Synyptyq sheni aǵa ádilet keńesshisi.
Sonymen qatar apta ishinde QR Kólik mınıstrliginiń baspasóz hatshysy bolyp Bolat Buharbaı taǵaıyndaldy.
Ol ár jyldary «Ádilet» partııasynyń qurylymynda, «Medıa Damytý Qory» korporatıvtik qorynda jumys istegen, «Qazposhta» AQ baspasóz hatshysy qyzmetin atqarǵan. Medıajobalardy prodıýserleýmen jáne saılaý naýqandaryn aqparattyq-kommýnıkatsııalyq súıemeldeýmen aınalysqan.
Suleyman Demirel University men Qarjy akademııasynyń túlegi.
Quryltaıdyń jalpy otyrysynda QR Joǵarǵy Sotynyń sýdıasy laýazymyna Asan Eskendirov saılandy.
Asan Eskendirov 1971 jyly dúnıege kelgen. Ol Býketov atyndaǵy Qaraǵandy memlekettik ýnıversıtetin (1996) támamdaǵan.
A.Qaırýllauly eńbek jolyn Kókshetaý oblysy Іshki ister departamentiniń EKO sarapshysy bolyp bastady (1991-1994).
- Kókshetaý oblysy Ádilet departamentiniń keńesshisi, jetekshi mamany, bas mamany qyzmetterin atqarǵan (1994-1996);
- Kókshetaý qalalyq sotynyń sýdıasy (1996-1998);
- Astana qalasy Almaty aýdandyq sotynyń sýdıasy (1998-1999);
- Aqmola oblystyq sotynyń sýdıasy (1999-2002);
- Aqmola oblysynyń Mamandandyrylǵan aýdanaralyq ekonomıkalyq sotynyń tóraǵasy (2002-2008);
- Pavlodar oblysynyń mamandandyrylǵan aýdanaralyq ekonomıkalyq sotynyń tóraǵasy (2008-2012);
- Aqmola oblystyq sotynyń azamattyq jáne ákimshilik ister jónindegi apellıatsııalyq sot alqasynyń tóraǵasy (02.07.2012-18.12.2015).
Sonymen birge Atyraý qalasy ákiminiń orynbasary qyzmetine Aıdýlat Kenjebekov taǵaıyndaldy. Osy laýazymda ol ishki saıasat, qarjy, ekonomıka jáne bıýdjetti josparlaý, jumyspen qamtý jáne áleýmettik baǵdarlamalar bólimine jetekshilik etedi.
Aıdýlat Kenjebekov 1987 jyly Atyraý oblysynda dúnıege kelgen. 2008 jyly Halel Dosmuhamedov atyndaǵy Atyraý ýnıversıtetin «Memlekettik jáne jergilikti basqarý» mamandyǵy boıynsha bitirgen.
Eńbek jolyn 2008 jyly Atyraý oblysynyń Energetıka jáne kommýnaldyq sharýashylyq basqarmasynda josparlaý-shart bóliminiń bas mamany mindetin atqarýshy bolyp bastaǵan. Keıin osy basqarmada bas maman, bólim basshysy jáne basqarma basshysynyń orynbasary qyzmetterin atqarǵan.
2019-2022 jyldary Qyzylqoǵa aýdany ákiminiń orynbasary boldy. Al 2022 jyldyń jeltoqsanynan bastap jańa qyzmetke taǵaıyndalǵanǵa deıin Atyraý oblystyq energetıka jáne turǵyn úı-kommýnaldyq sharýashylyq basqarmasyn basqardy.
Energetıka vıtse-mınıstri Erjan Ertaev «Jańartylatyn energııa kózderin qoldaý jónindegi qarjy-esep aıyrysý ortalyǵy» JShS bas dırektory bolyp taǵaıyndalǵan Sergeı Aleevti ujymǵa tanystyrdy.
Sergeı Maratuly Aleev Tselınograd qalasynda dúnıege kelgen. 2009 jyly «Qarjy» mamandyǵy boıynsha Eýrazııa gýmanıtarlyq ınstıtýtyn, 2013 jyly «Quqyqtaný» mamandyǵy boıynsha Qonaev atyndaǵy Gýmanıtarlyq Ýnıversıtetin bitirgen.
Eńbek jolyn 2009 jyly Astana qalasy boıynsha Salyq departamentiniń Almaty aýdany boıynsha salyq basqarmasynda bastaǵan. 2021 jyldan bastap Astana qalasy boıynsha Memlekettik kirister departamenti Aýdıt basqarmasynyń aýdıt bóliminiń basshysy bolyp jumys istedi. 2024 jyldan bastap «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ Іshki aýdıt qyzmetiniń basshysy bolyp qyzmet atqardy.
2025 jylǵy qazan aıynan bastap «JEKQ jónindegi QEAO» JShS Bas dırektorynyń orynbasary qyzmetin atqardy.
Oǵan qosa Energetıka vıtse-mınıstri Erjan Ertaev «Elektr energııasy men qýaty naryǵynyń qazaqstandyq operatory» aktsıonerlik qoǵamynyń basqarma tóraǵasy bolyp taǵaıyndalǵan Arman Shaıhanovty qoǵam ujymyna tanystyrdy.
Arman Shaıhanov Ekibastuz qalasyndaǵy Injenerlik-tehnıkalyq ınstıtýtty «Jylý elektr stantsııalary» mamandyǵy boıynsha, sondaı-aq Qaraǵandy qalasyndaǵy Qaztutynýodaǵynyń Ekonomıkalyq ýnıversıtetin «Ekonomıka» mamandyǵy boıynsha támamdaǵan.
Eńbek jolyn 2000 jyly Ekibastuz qalasynyń energetıkalyq nysandarynda bastaǵan. Kásibı jolynda mashınıst-obhodchıkten qazandyq bólimshesiniń aǵa mashınısi jáne energoblok mashınısi laýazymdaryna deıin kóterilgen.
2006 jyly «KEGOC» AQ-da eńbek jolyn jalǵastyryp, jetekshi jáne bas maman, bólim bastyǵynyń orynbasary jáne bólim bastyǵy, bas tehnolog-júıetanýshy, Ulttyq elektr jelisin damytý, syrtqy baılanystar jáne treıdıng departamentteriniń dırektory, Ulttyq elektr jelisin damytý jáne júıelik qyzmetter jónindegi basqarýshy dırektor qyzmetterin atqarǵan.
2022 jylǵy qyrkúıekten 2025 jylǵy qarashaǵa deıin «KEGOC» AQ-nyń «Almaty elektr jelileriniń» fılıalyn basqardy.
2025 jylǵy qarashadan bastap osy taǵaıyndaýǵa deıin «Jańartylatyn energııa kózderin qoldaý jónindegi esep aıyrysý-qarjy ortalyǵy» JShS-niń bas dırektory qyzmetin atqardy.