Elimizde apta ishinde bolǵan kadrlyq taǵaıyndaýlar
ASTANA. KAZINFORM — Ótip bara jatqan apta ishinde jergilikti ákimdikter deńgeıinde birneshe kadrlyq aýys-túıis boldy
Energetıka mınıstrligi Atomdyq jáne energetıkalyq qadaǵalaý men baqylaý komıtetiniń Qaraǵandy oblysy boıynsha aýmaqtyq departamentin Aırat Qaramurzın basqaratyny belgili boldy.
Buryn ol osy vedomstvoda basshynyń orynbasary bolyp jumys istegen, sodan keıin basshynyń mindetin atqarǵan.
Aırat Qaramurzın — «elektr energetıkasy» mamandyǵy boıynsha tehnıka jáne tehnologııalar magıstri, sondaı-aq «quqyqtaný» mamandyǵy boıynsha joǵary bilimi bar.
Qaraǵandy qalasy Qazybek bı atyndaǵy aýdan ákimi apparatynda túrli laýazymdarda jumys istedi. Balqash qalasynyń TKSh, jolaýshylar kóligi jáne avtomobıl joldary bóliminiń basshysy, Balqash ákiminiń orynbasary bolǵan. 2022 jyldyń qarashasynan bastap aýmaqtyq energetıkalyq qadaǵalaý departamentinde jumys istedi.
Almaty oblysy ákiminiń ókimimen Erjan Ábilhasymuly Súleımenov oblystyq densaýlyq saqtaý basqarmasynyń basshysy bolyp taǵaıyndaldy.
Ol 1979 jyly dúnıege kelgen, medıtsına ǵylymdarynyń doktory.
Eńbek jolyn 2003 jyly bastaǵan. Ár jyldary densaýlyq saqtaý uıymdary men medıtsınalyq bilim berý mekemelerinde basshylyq qyzmetter atqarǵan.
2015–2017 jyldary Almaty oblysy densaýlyq saqtaý basqarmasy basshysynyń orynbasary boldy.
2024 jyldyń shildesinen beri «Global Health Solutions» JShS-da bas medıtsınalyq keńesshi bolyp jumys istedi.
Al Qaraǵandy oblysynyń mádenıet, muraǵattar jáne qujattama basqarmasynyń basshysy bolyp Ǵalymjan Ótelbaıuly taǵaıyndaldy.
Ǵalymjan Ótelbaıuly Qoja Ahmet ıAsaýı atyndaǵy Memlekettik halyqaralyq qazaq-túrik ýnıversıtetin jáne ál-Farabı atyndaǵy Qazaq ulttyq ýnıversıtetiniń magıstratýrasyn támamdaǵan, tarıh magıstri.
Eńbek jolyn BAQ-ta bastady. Qazaq radıosynda qoǵamdyq-tanymdyq baǵdarlamalardyń redaktory, sondaı-aq Qazaqstan UTA redaktory bolǵan. QR Mádenıet jáne aqparat mınıstrliginde túrli laýazymdarda jumys istedi.
2012 jyly Qaraǵandy oblysy mádenıet basqarmasy bastyǵynyń orynbasary, 2016-2018 jyldary Almaty qalasy mádenıet jáne muraǵattar basqarmasynyń basshysy boldy. 2022-2024 jyldary QR Mádenıet jáne aqparat mınıstrliginiń «Qazaq áýenderi» AQ prezıdenti qyzmetin atqardy.
Taraz qalasy Áýlıeata aýdany ákimi bolyp Barlyq Tórehanov taǵaıyndaldy.
Barlyq Tórehanov 1979 jyly dúnıege kelgen.
Eńbek jolyn 2000 jyldan bastaǵan:
Sońǵy jyldary Ulttyq ekonomıka mınıstrligi Tabıǵı monopolııalardy retteý komıtetiniń Jambyl oblysy departamenti basshysynyń orynbasary jáne joǵaryda atalǵan komıtettiń Almaty oblysy boıynsha departamentiniń basshysy qyzmetterin atqarǵan.