Elimizde apta ishinde bolǵan kadrlyq taǵaıyndaýlar

Apta basynda Oljas Bektenov Premer-Mınıstr laýazymyna qaıta taǵaıyndaldy.

Oljas Abaıuly Bektenov 1980 jyly 13 jeltoqsanda Almaty qalasynda týǵan. 2001 jyly Qazaq memlekettik zań akademııasyn «Zańger» mamandyǵy boıynsha úzdik bitirgen. ІІ dárejeli «Aıbyn» (2014) jáne «Dańq» (2021) ordenderimen nagradtalǵan.

Eńbek jolyn 2002 jyly Almaty qalasy Ádilet basqarmasynda bastady. Keıin Premer-Mınıstr Keńsesiniń zań bóliminde, Prezıdent Ákimshiliginde jáne Ádilet mınıstrliginde jumys istedi. 2012-2014 jyldary Ekonomıkalyq qylmysqa jáne sybaılas jemqorlyqqa qarsy agenttiktiń ortalyq apparatynda departament basqardy. 2015-2018 jyldary Astana qalasy ákiminiń apparat basshysy, Prezıdent Ákimshiligi Basshysy Hatshylyǵynyń meńgerýshisi, Sybaılas jemqorlyqqa qarsy is-qımyl ulttyq bıýrosynyń Astana qalasy boıynsha departamentiniń basshysy, Aqmola oblysy ákiminiń orynbasary qyzmetterin atqardy. 2018-2023 jyldary Sybaılas jemqorlyqqa qarsy is-qımyl agenttigi tóraǵasynyń orynbasary, birinshi orynbasary jáne tóraǵasy boldy. 2023-2024 jyldary Prezıdent Ákimshiliginiń basshysy qyzmetin atqardy. 2024 jylǵy aqpanda Májilis depýtattary Memleket basshysy Qasym-Jomart Toqaevtyń Oljas Bektenovti Premer-Mınıstr etip taǵaıyndaý týraly usynysyn qoldady. Sol jyly Úkimet basshysy bolyp taǵaıyndaldy.

«Habar» agenttiginiń basqarma tóraǵasy qyzmetine Lázzat Tanysbaıtaǵaıyndaldy.

Lázzat Tanysbaıdyń televızııa jáne medıa salasyndaǵy eńbek ótili 30 jyldan asady. Ár jyldary ol «Astana» telearnasyn, «Nur-Medıa» medıaholdıngin, «Qazaqstan» RTRK» AQ-ny jáne «Birinshi arna Eýrazııa» telearnasyn basqardy. Sondaı-aq Qazaqstan Respýblıkasynyń Baılanys jáne aqparat vıtse-mınıstri qyzmetin atqardy.
«Habar» agenttiginiń» basqarma tóraǵasy retinde Lázzat Tanysbaıǵa agenttiktiń qalyptasqan áleýetin saqtaı otyryp, onyń negizgi qyzmet baǵyttaryn kezeń-kezeńimen jańǵyrtý, sondaı-aq «24KZ» telearnasynyń elimizdiń jetekshi qoǵamdyq-saıası arnasy retindegi ornyn nyǵaıtý mindeti qoıyldy.
Qazaqstan Respýblıkasy Qaýipsizdik Keńesi tóraǵasynyń orynbasary bolyp Aıda Balaevataǵaıyndaldy.

Aıda Ǵalymqyzy Balaeva 1974 jyly 4 shildede Almaty oblysynda týǵan. 2000 jyly Abaı atyndaǵy Almaty memlekettik ýnıversıtetin orys tili men ádebıeti pániniń muǵalimi, 2007 jyly Qazaq ulttyq agrarlyq ýnıversıtetin zańger mamandyǵy boıynsha bitirgen. «Qurmet» (2010) jáne «Parasat» (2016) ordenderimen, sondaı-aq Ózbekstannyń «Dostyq» ordenimen (2024) marapattalǵan.

Eńbek jolyn 1999 jyly Almaty oblystyq aqparat jáne qoǵamdyq kelisim basqarmasynda bastady. 2002-2004 jyldary Almaty qalalyq aqparat jáne qoǵamdyq kelisim basqarmasynyń, 2004-2008 jyldary Almaty qalasy boıynsha aqparat basqarmasynyń bólimderine jetekshilik etti. 2005-2008 jyldary Almaty qalasynyń ishki saıasat departamenti dırektorynyń orynbasary, keıin dırektory qyzmetin atqardy.

2008-2010 jyldary Astana qalasynyń ishki saıasat basqarmasynyń basshysy, 2010-2014 jyldary Astana qalasy ákiminiń orynbasary boldy. 2014-2019 jyldary Prezıdent Ákimshiliginiń Іshki saıasat bólimin basqardy.

2019-2020 jyldary Prezıdenttiń kómekshisi — Prezıdent Ákimshiliginiń Ótinishterdi qaraýdy baqylaý bóliminiń meńgerýshisi, 2020-2022 jyldary Aqparat jáne qoǵamdyq damý mınıstri, 2022-2023 jyldary Prezıdent Ákimshiligi basshysynyń orynbasary qyzmetterin atqardy.

2023 jylǵy 2 qyrkúıekte Mádenıet jáne aqparat mınıstri bolyp taǵaıyndaldy. 2025 jylǵy 1 jeltoqsanda Premer-Mınıstrdiń orynbasary — Mádenıet jáne aqparat mınıstri qyzmetine taǵaıyndaldy.

«Qazaq gazetteri» JShS bas dırektory bolyp Erjan Baıtilestaǵaıyndaldy.

Erjan Aıtóreuly Baıtiles 1981 jyly Qyzylorda oblysynda dúnıege kelgen. Ál-Farabı atyndaǵy Qazaq ulttyq ýnıversıtetin jýrnalıstıka mamandyǵy boıynsha támamdaǵan.

Qarymdy qalamger «Almaty aqshamy», «Alty Alash», «Ana tili», «Egemen Qazaqstan» sekildi elimizdiń irgeli basylymdarynda tilshi qyzmetin atqaryp, jýrnalıstıkanyń barlyq satysynan ótti.2008-2011 jyldary respýblıkalyq «Ana tili» gazeti bas redaktorynyń birinshi orynbasary boldy. Keıin respýblıkalyq «Egemen Qazaqstan» gazetiniń menshikti tilshisi bolyp jumys istegen.2018-2019 jyldary «Nur Otan» partııasy Qyzylorda oblystyq fılıaly tóraǵasynyń orynbasary boldy.2019 jyly Prezıdenttiń baspasóz qyzmeti sektorynyń meńgerýshisi, 2021 jyldan 2023 jylǵa deıin Memlekettik keńesshi Hatshylyǵy meńgerýshisiniń orynbasary qyzmetin atqardy.Al 2023 jyldan QR Prezıdenti Baspasóz hatshysynyń orynbasary qyzmetin atqardy.

QR Prezıdenti Ákimshiliginiń Jalpy bóliminiń meńgerýshisi laýazymynaRınat Muhametqalı
taǵaıyndaldy.

QR Syrtqy ister mınıstri bolyp Muhtar Tileýberditaǵaıyndaldy.

Muhtar Beskenuly Tileýberdi 1968 jyly 30 maýsymda dúnıege kelgen. S. M. Kırov atyndaǵy Qazaq memlekettik ýnıversıtetiniń fılosofııa-ekonomıka fakýltetin bitirgen. M. V. Lomonosov atyndaǵy Máskeý memlekettik ýnıversıteti janyndaǵy Azııa jáne Afrıka ınstıtýtynda, sondaı-aq Koreıa Respýblıkasyndaǵy Iense ýnıversıteti janyndaǵy Tilder ınstıtýtynda bilimin jetildirgen. Eńbek jolyn Ál-Farabı atyndaǵy QazUÝ-de fılosofııa tarıhy jáne qytaı fılologııasy kafedralarynda bastady.

Dıplomatııalyq qyzmetke 1993 jyly attashe retinde keldi. Syrtqy ister mınıstrliginiń ortalyq apparatynda Azııa elderi basqarmasynyń úshinshi hatshysy, Azııa departamentiniń birinshi hatshysy, Ekijaqty yntymaqtastyq departamenti bóliminiń bastyǵy qyzmetterin atqardy. Keıin Qazaqstannyń Koreıa Respýblıkasyndaǵy Elshiliginde ekinshi hatshy, Izraıldegi Elshiliginde keńesshi, Prezıdent Ákimshiliginde Memlekettik hatshynyń syrtqy saıasat máseleleri jónindegi keńesshisi boldy.

2003 jyly Syrtqy ister vıtse-mınıstri bolyp taǵaıyndaldy. 2004-2009 jyldary Qazaqstannyń Malaızııadaǵy, Indonezııadaǵy, Brýneı-Darýssalamdaǵy jáne Fılıppındegi elshisi qyzmetterin atqardy. 2009-2016 jyldary Qazaqstannyń Shveıtsarııadaǵy elshisi, Lıhtenshteın men Vatıkandaǵy elshisi, sondaı-aq Jenevadaǵy BUU bólimshesi jáne basqa da halyqaralyq uıymdar janyndaǵy turaqty ókili boldy.

2016-2019 jyldary Syrtqy ister mınıstriniń birinshi orynbasary, 2019-2021 jyldary Syrtqy ister mınıstri qyzmetin atqardy. 2021 jylǵy qańtardan 2023 jylǵy sáýirge deıin Premer-Mınıstrdiń orynbasary — Syrtqy ister mınıstri boldy.

2023 jyldan Qazaqstannyń Aýstrııadaǵy Tótenshe jáne Ókiletti Elshisi ári Venadaǵy halyqaralyq uıymdar janyndaǵy turaqty ókili qyzmetin atqardy.

Tótenshe jáne Ókiletti Elshi dıplomatııalyq dárejesine ıe. Aǵylshyn jáne koreı tilderin meńgergen.

Ermek Abdramanov Qazaqstan Respýblıkasy Prezıdenti Іs basqarýshysynyń orynbasary bolyp taǵaıyndaldy.

Qazaqstan Respýblıkasynyń Qorǵanys mınıstri bolyp Dáýren Qosanov taǵaıyndaldy.

Dáýren Jumataıuly Qosanov 1990 jyly Armavır joǵary áskerı ushqyshtar avıatsııalyq ýchılışesin, 2005 jyly ıÝ. A. Gagarın atyndaǵy Áýe kúshteri áskerı akademııasyn, 2013 jyly Reseı Qarýly Kúshteri Bas shtabynyń áskerı akademııasyn bitirgen. Avıatsııa general-leıtenanty.

Áskerı qyzmetin Úsharaldaǵy ıstrebıteldik polkten bastady. Keıin Taldyqorǵandaǵy «Sý-27» eskadrılıasynyń komandıri, Qaraǵandy avıatsııa bazasynyń shtab bastyǵy, Shymkent avıatsııa bazasynyń komandıri qyzmetterin atqardy.

2013-2019 jyldary Qazaqstan Qarýly Kúshteri Áýe qorǵanysy kúshteriniń Áskerı-áýe kúshteriniń qolbasshysy boldy. 2019-2022 jyldary Aqtóbedegi Áýe qorǵanysy kúshteriniń Áskerı ınstıtýtyn basqardy. 2022-2024 jyldary Áýe qorǵanysy kúshteriniń Bas qolbasshysy, 2024-2025 jyldary Qorǵanys mınıstriniń orynbasary — Áýe qorǵanysy kúshteriniń Bas qolbasshysy qyzmetin atqardy.

2025 jylǵy maýsymda Qazaqstan Respýblıkasynyń Qorǵanys mınıstri bolyp taǵaıyndaldy.

ІІ dárejeli «Aıbyn» ordenimen, sondaı-aq «Jaýyngerlik erligi úshin» jáne «Minsiz qyzmeti úshin» medaldarymen marapattalǵan.

Qazaqstan Respýblıkasynyń Іshki ister mınıstri bolyp Erjan Sádenov qaıta taǵaıyndaldy.

Erjan Saparbekuly Sádenov 1993 jyly S. Amanjolov atyndaǵy Shyǵys Qazaqstan memlekettik ýnıversıtetin, 1998 jyly QR UQK Qaraǵandy joǵary mektebin bitirgen. Polıtsııa general-leıtenanty.

Eńbek jolyn 1993 jyly Shyǵys Qazaqstan oblysy ishki ister departamentiniń qylmystyq izdestirý bóliminde jedel ýákil bolyp bastady. Keıin Óskemen qalasynda qylmystyq izdestirý jáne asa qaýipti qylmystarǵa qarsy kúres bólimshelerinde basshylyq qyzmetter atqaryp, Zaısan jáne Tarbaǵataı aýdandarynyń ishki ister organdaryn basqardy.

2006-2009 jyldary ShQO ІІD esirtki bıznesimen kúres basqarmasynyń, Rıdder jáne Óskemen qalalary ishki ister organdarynyń basshysy boldy. 2009-2013 jyldary Mańǵystaý oblysy ІІD bastyǵynyń birinshi orynbasary, 2013-2016 jyldary Іshki ister mınıstrligi júıesinde jáne Kóliktegi ishki ister departamentinde basshylyq qyzmetter atqardy.

2016-2019 jyldary Aqmola oblysy polıtsııa departamentin, 2019-2022 jyldary Nur-Sultan qalasy polıtsııa departamentin basqardy. 2022-2023 jyldary Іshki ister mınıstriniń orynbasary boldy.

2023 jyly Qazaqstan Respýblıkasynyń Іshki ister mınıstri bolyp taǵaıyndalǵan edi.

Ǵalymjan Qoıshybaev Qazaqstan Respýblıkasy Premer-Mınıstriniń orynbasary — Úkimet Apparatynyń basshysy bolyp taǵaıyndaldy.

Ǵalymjan Telmanuly Qoıshybaev 1991 jyly M. V. Lomonosov atyndaǵy Máskeý memlekettik ýnıversıtetin, 1991-1994 jyldary osy ýnıversıtettiń aspırantýrasyn bitirgen.

Dıplomatııalyq qyzmetin 1995 jyly Qazaqstannyń Reseıdegi Elshiliginde attashe bolyp bastady. Keıin sol elshilikte úshinshi, birinshi hatshy, keńesshi jáne keńesshi-ýákil qyzmetterin atqardy. 2004 jyly Ujymdyq qaýipsizdik týraly shart uıymy janyndaǵy Qazaqstannyń ókiletti ókili, 2004-2006 jyldary Prezıdent Ákimshiliginiń Bas ınspektory boldy. 2006-2008 jyldary Syrtqy ister mınıstrliginiń erekshe tapsyrmalar jónindegi elshisi qyzmetin atqardy.

2008-2016 jyldary Qazaqstannyń Lıtvadaǵy, Latvııadaǵy, Estonııadaǵy jáne Fınlıandııadaǵy elshisi boldy. 2016-2019 jyldary Syrtqy ister mınıstriniń orynbasary qyzmetin atqardy.

2019 jyly jáne 2022 jyly Premer-Mınıstr Keńsesin basqardy. 2023 jyldan Premer-Mınıstrdiń orynbasary — Úkimet Apparatynyń basshysy qyzmetin atqaryp keledi.

«Qurmet» jáne «Parasat» ordenderimen, sondaı-aq Latvııanyń «Krest prıznanııa» jáne Fınlıandııanyń Lev ordenderimen marapattalǵan.

Serik Jumanǵarın Premer-Mınıstrdiń orynbasary — Ulttyq ekonomıka mınıstri qyzmetine qaıta taǵaıyndaldy.

Serik Maqashuly Jumanǵarın 1969 jyly Aqtóbe qalasynda dúnıege kelgen. Máskeý energetıka ınstıtýtyn, E.A. Bóketov atyndaǵy Qaraǵandy memlekettik ýnıversıtetin jáne Halyqaralyq bıznes akademııasyn bitirgen. 1993-2004 jyldary kásipkerlikpen aınalysqan.

Memlekettik qyzmetke 2005 jyly Aqtóbe qalasynyń ekonomıka jáne bıýdjettik josparlaý bóliminde basshy orynbasary retinde keldi. Keıin Aqtóbe qalasynyń kásipkerlik bólimin, Tabıǵı monopolııalardy retteý agenttiginiń Aqtóbe oblysy boıynsha basqarmasy men departamentin basqardy. 2008-2013 jyldary Indýstrııa jáne saýda, Ekonomıkalyq damý jáne saýda mınıstrlikterinde basshylyq qyzmetter atqaryp, 2013-2014 jyldary óńirlik damý vıtse-mınıstri boldy.

2014-2017 jyldary Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetin basqardy. 2017-2019 jyldary Ulttyq ekonomıka vıtse-mınıstri, 2019-2020 jyldary Eýrazııalyq ekonomıkalyq komıssııanyń Básekelestik jáne monopolııaǵa qarsy retteý jónindegi alqa múshesi qyzmetin atqardy. 2020-2022 jyldary Básekelestikti qorǵaý jáne damytý agenttiginiń tóraǵasy boldy.

2022-2023 jyldary Premer-Mınıstrdiń orynbasary — Saýda jáne ıntegratsııa mınıstri, 2023 jyldan Premer-Mınıstrdiń orynbasary qyzmetin atqardy. 2024 jylǵy jeltoqsanda Premer-Mınıstrdiń orynbasary — Ulttyq ekonomıka mınıstri bolyp taǵaıyndaldy.

Jaslan Mádıev Qazaqstan Respýblıkasy Premer-Mınıstriniń orynbasary — Jasandy ıntellekt jáne tsıfrlyq damý mınıstri qyzmetine qaıta taǵaıyndaldy.

Jaslan Hasenuly Mádıev 2000-2004 jyldary Ál-Farabı atyndaǵy Qazaq ulttyq ýnıversıtetinde bilim alǵan. 2006-2007 jyldary Kolýmbııa ýnıversıtetiniń Halyqaralyq qatynastar jáne memlekettik basqarý mektebinde, 2015-2016 jyldary Massachýsets tehnologııalyq ınstıtýtynyń (MIT) Sloan bıznes mektebinde bilimin jetildirgen.

Eńbek jolyn Londondaǵy «Morgan Stanley» ınvestıtsııalyq bankiniń baǵaly qaǵazdar jáne oblıgatsııalar saýdasy departamentinde jetekshi treıder bolyp bastady. Keıin Prezıdent Ákimshiliginiń Strategııalyq ázirlemeler jáne taldaý ortalyǵynda sarapshy, «Samuryq-Qazyna» UÁQ» AQ Qazynashylyq departamentiniń dırektory qyzmetterin atqardy.

Sondaı-aq «Kazyna Capital Management» AQ jáne «Qazaqstannyń damý banki» AQ basqarma tóraǵasynyń orynbasary, Ulttyq bank dırektorynyń Monetarlyq operatsııalar jáne aktıvterdi basqarý jónindegi orynbasary, Premer-Mınıstrdiń keńesshisi boldy. Ulttyq bank pen «Qazaqstan temir joly» AQ qurylymdarynda basshylyq qyzmetter atqardy.

2020-2022 jyldary Strategııalyq josparlaý jáne reformalar agenttigi tóraǵasynyń orynbasary boldy. 2022-2024 jyldary Binance Kazakhstan bas menedjeri qyzmetin atqardy.

2025 jylǵy 29 qyrkúıekte Premer-Mınıstrdiń orynbasary — Jasandy ıntellekt jáne tsıfrlyq damý mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

«Eren eńbegi úshin» medalimen (2020), «Qazaqstan Táýelsizdigine 20 jyl» mereıtoılyq medalimen (2011) marapattalǵan.

Nurlybek Nálibaev Qazaqstan Respýblıkasy Premer-Mınıstriniń birinshi orynbasary bolyp taǵaıyndaldy.

Nurlybek Mashbekuly Nálibaev 1976 jyly Qyzylorda oblysynda dúnıege kelgen. Qazaq memlekettik agrarlyq ýnıversıtetin jáne Qazaq gýmanıtarlyq zań ýnıversıtetin bitirgen. Reseı Federatsııasy Prezıdenti janyndaǵy Reseı halyq sharýashylyǵy jáne memlekettik qyzmet akademııasynyń doktorantýrasynda bilim alyp jatyr.

Eńbek jolyn 1997 jyly «Qazahoıl-kommertsııa» JShS-de munaı jáne munaı ónimderi boıynsha sarapshy bolyp bastady. 1998-2005 jyldary jeke kommertsııalyq qurylymdarda basshylyq qyzmetter atqardy.

2005-2007 jyldary Qyzylorda qalasy ákiminiń orynbasary, keıin birinshi orynbasary boldy. 2007-2008 jyldary Qyzylorda oblysy ákimi apparatynyń basshysy, 2008-2013 jyldary Shıeli aýdanynyń ákimi qyzmetin atqardy.

2013-2021 jyldary Qyzylorda qalasyn basqardy. 2021-2022 jyldary Premer-Mınıstr Keńsesiniń Óńirlik damý bóliminiń meńgerýshisi boldy.

2022-2026 jyldary Qyzylorda oblysynyń ákimi qyzmetin atqardy.

Qanat Bozymbaev Qazaqstan Respýblıkasy Premer-Mınıstriniń orynbasary bolyp qaıta taǵaıyndaldy.

Qanat Aldabergenuly Bozymbaev 1993 jyly Qazaq memlekettik basqarý akademııasyn bitirgen. Eńbek jolyn sol jyly «Edem Ltd» kommertsııalyq uıymynda ekonomıst bolyp bastady.

1994-1997 jyldary Almaty qalasy ákiminiń kómekshisi, 1997-1998 jyldary «QazTransOıl» kompanııasynda basshylyq qyzmetter atqardy. 1998-2000 jyldary Energetıka, ındýstrııa jáne saýda mınıstrliginiń Munaı jáne gaz departamentin basqardy. 2000 jyly energetıka, ındýstrııa jáne saýda vıtse-mınıstri, 2001-2007 jyldary «KEGOC» AQ prezıdenti boldy.

2007-2009 jyldary «Samuryq» memlekettik aktıvterdi basqarý jónindegi qazaqstandyq holdıngi» AQ jáne «KEGOC» AQ basqarma tóraǵasy qyzmetterin atqardy. 2009-2013 jyldary Jambyl oblysynyń, 2013-2016 jyldary Pavlodar oblysynyń ákimi boldy.

2016-2019 jyldary Energetıka mınıstri, 2019-2021 jyldary Prezıdenttiń kómekshisi, 2021-2022 jyldary Almaty oblysynyń ákimi qyzmetterin atqardy. 2023-2024 jyldary Prezıdenttiń keńesshisi boldy.

2024 jylǵy 31 naýryzda Premer-Mınıstrdiń orynbasary bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

«Qurmet», «Parasat», III dárejeli «Barys» ordenderimen jáne birqatar merekelik medaldarmen marapattalǵan. «TMD-nyń eńbek sińirgen energetıgi» ataǵy bar.

Mádı Takıev Qazaqstan Respýblıkasynyń Qarjy mınıstri bolyp qaıta taǵaıyndaldy.

Mádı Tókeshuly Takıev 1978 jyly Almaty oblysynda dúnıege kelgen. Qazaq memlekettik basqarý akademııasyn, D. Qonaev atyndaǵy gýmanıtarlyq ýnıversıtetin jáne Halyqaralyq bıznes ýnıversıtetin bitirgen.

Eńbek jolyn 1998 jyly QR Ǵylym mınıstrligi — Ǵylym akademııasynyń Memleket jáne quqyq ınstıtýtynda bas esepshi bolyp bastady. 2000-2014 jyldary salyq organdarynda túrli basshylyq qyzmetter atqaryp, Almaty qalasy men Almaty oblysy boıynsha salyq departamentterinde, sondaı-aq Qarjy mınıstrliginiń Salyq komıtetinde eńbek etti.

2014-2017 jyldary Memlekettik kirister departamentiniń Atyraý oblysy boıynsha basshysy, 2017-2019 jyldary Qarjy mınıstrligi Memlekettik kirister komıtetiniń Salyqtyq baqylaý departamentiniń dırektory boldy. 2019-2020 jyldary Ulttyq ekonomıka vıtse-mınıstri, 2020-2023 jyldary Prezıdent Ákimshiliginiń Áleýmettik-ekonomıkalyq monıtorıng bóliminiń meńgerýshisi qyzmetin atqardy.

2023-2024 jyldary Parlament Májilisiniń depýtaty ári Qarjy jáne bıýdjet komıtetiniń tóraǵasy boldy. 2024 jylǵy 6 aqpanda Qarjy mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Nurlan Saýranbaev Qazaqstan Respýblıkasynyń Kólik mınıstri bolyp qaıta taǵaıyndaldy.

Nurlan Ermekuly Saýranbaev 1967 jylǵy 20 mamyrda dúnıege kelgen. 1991 jyly S. M. Kırov atyndaǵy Qazaq memlekettik ýnıversıtetin «Saıası ekonomıka» mamandyǵy boıynsha bitirgen.

Eńbek jolyn kásipkerlik salasynda bastap, 1997-2011 jyldary temirjol jáne munaı-gaz salalaryndaǵy ulttyq kompanııalarda jumys istedi. 2011 jyly Indýstrııa jáne jańa tehnologııalar vıtse-mınıstri, 2014-2016 jyldary Qorǵanys mınıstriniń orynbasary boldy. 2017-2018 jyldary Shymkent qalasynyń ákimi, 2019-2021 jyldary Prezıdent Ákimshiliginiń Memlekettik baqylaý jáne uıymdastyrý-aýmaqtyq jumys bóliminiń meńgerýshisi qyzmetterin atqardy.

Keıin «QTJ» UK» AQ basqarma tóraǵasy boldy. 2025 jylǵy maýsymda Kólik mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

Erlan Sársembaev Qazaqstan Respýblıkasynyń Ádilet mınıstri bolyp qaıta taǵaıyndaldy.

Erlan Jaqsylyquly Sársembaev 1975 jyly Almaty oblysynda dúnıege kelgen. Almaty energetıka jáne baılanys ınstıtýtyn, D. Qonaev atyndaǵy Gýmanıtarlyq ýnıversıtetti bitirgen.

Eńbek jolyn 1998 jyly Qarýly Kúshter qatarynda ofıtser bolyp bastady. 2002-2011 jyldary Premer-Mınıstr Keńsesi men Parlament Senaty Apparatynda túrli qyzmetter atqardy. 2011-2016 jyldary Ulttyq qaýipsizdik organdarynda basshylyq qyzmetterde boldy.

2016-2022 jyldary Parlament Senaty Apparatynda bólim meńgerýshisi jáne basshy orynbasary qyzmetterin atqardy. 2023-2025 jyldary Konstıtýtsııalyq Sottyń sýdıasy boldy.

2025 jylǵy 9 qańtarda Ádilet mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Qazaqstan Respýblıkasynyń Tótenshe jaǵdaılar mınıstri bolyp Murat Muhanov taǵaıyndaldy.

Murat Seıtmoldauly Muhanov 1985 jyly Mańǵystaý oblysynda dúnıege kelgen. QR TJM Kókshetaý tehnıkalyq ınstıtýtyn jáne Reseı TJM Sankt-Peterbýrg memlekettik órtke qarsy qyzmet ýnıversıtetin bitirgen.

Eńbek jolyn 2006 jyly Mańǵystaý oblysynyń tótenshe jaǵdaılar salasyndaǵy memlekettik baqylaý jáne qadaǵalaý basqarmasynda bas maman bolyp bastady. 2006-2014 jyldary osy salada túrli qyzmetter atqardy.

2014-2017 jyldary órt qaýipsizdigi salasyndaǵy baqylaý jáne profılaktıkalyq qyzmet bólimderi men basqarmasyn basqardy. 2017-2020 jyldary Mańǵystaý oblysy Tótenshe jaǵdaılar departamenti bastyǵynyń orynbasary, 2020-2023 jyldary departament bastyǵy boldy.

2023-2024 jyldary QR TJM Órtke qarsy qyzmet komıteti tóraǵasynyń orynbasary mindetin atqarýshy boldy. 2024 jylǵy sáýirden osy aptaǵa deıin Mańǵystaý oblysy Tótenshe jaǵdaılar departamentin basqardy.

Erlan Aqkenjenov Qazaqstan Respýblıkasynyń Energetıka mınıstri bolyp qaıta taǵaıyndaldy.

Erlan Qudaıbergenuly Aqkenjenov 1979 jyly Almaty qalasynda dúnıege kelgen. «Ádilet» joǵary quqyq mektebin jáne «Astana» ýnıversıtetin bitirgen.

Eńbek jolyn 2002 jyly «Qazmunaıgaz» saýda úıinde munaı jáne munaı ónimderin eksporttaý salasynda bastady. 2002-2016 jyldary «Qazmunaıgaz» jáne onyń enshiles kompanııalarynda, sondaı-aq Bolgarııa men Rýmynııadaǵy munaı-gaz qurylymdarynda basshylyq qyzmetter atqardy. 2016-2020 jyldary munaı jáne munaı ónimderin óńdeý men tasymaldaý salasyndaǵy jeke qurylymdarda jumys istedi.

2022-2023 jyldary «QazMunaıGaz» UK» AQ munaı ónimderi marketıngi basqarmasynyń basshysy, 2023-2025 jyldary Energetıka vıtse-mınıstri boldy.

2025 jylǵy 19 naýryzda Energetıka mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Ersaıyn Naǵaspaev Qazaqstan Respýblıkasynyń Ónerkásip jáne qurylys mınıstri bolyp qaıta taǵaıyndaldy.

Ersaıyn Qaıyrǵazyuly Naǵaspaev 2001 jyly E.A. Bóketov atyndaǵy Qaraǵandy memlekettik ýnıversıtetin «Halyqaralyq ekonomıkalyq qatynastar» mamandyǵy boıynsha bitirgen.

Eńbek jolyn 2001 jyly Temirtaý qalasy ákiminiń apparatynda bastady. 2002-2006 jyldary Investıtsııalar komıteti, Syrtqy ister mınıstrligi jáne Qazaqstannyń Reseıdegi elshiliginde qyzmet etti. 2006-2009 jyldary Kólik jáne kommýnıkatsııalar mınıstrliginde, «Aqtaý teńiz halyqaralyq saýda porty» RMK-da jáne Premer-Mınıstr orynbasarynyń keńesshisi qyzmetterin atqardy.

2009-2013 jyldary Qaraǵandy oblysy men Shahtınsk qalasynda basshylyq qyzmetter atqaryp, 2013-2014 jyldary Astana qalasy ákiminiń orynbasary boldy. 2014-2016 jyldary «Astana» ÁKK» AQ basqarma tóraǵasy, 2016-2020 jyldary «Novostroı Astana» JShS strategııalyq damý jónindegi dırektordyń orynbasary qyzmetin atqardy.

2021-2025 jyldary «QTJ» UK» AQ-da basqarýshy dırektor boldy. 2025 jylǵy 28 aqpanda Ónerkásip jáne qurylys mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

Juldyz Súleımenova Qazaqstan Respýblıkasynyń Oqý-aǵartý mınıstri bolyp qaıta taǵaıyndaldy.

Juldyz Dosbergenqyzy Súleımenova 1983 jyly Aqtóbe oblysynda dúnıege kelgen. Ál-Farabı atyndaǵy Qazaq ulttyq ýnıversıtetiniń tarıh fakýltetin bitirip, fılosofııa jáne saıasattaný boıynsha magıstr, mádenıettaný boıynsha PhD dárejesin alǵan.

2012-2021 jyldary «Nazarbaev Zııatkerlik mektepteri» júıesinde túrli qyzmetter atqaryp, Almaty qalasyndaǵy fızıka-matematıka baǵytyndaǵy Zııatkerlik mekteptiń dırektory boldy. 2021-2025 jyldary Parlament Májilisiniń depýtaty qyzmetin atqardy.

2025 jylǵy 29 qyrkúıekte Oqý-aǵartý mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Arman Shaqqalıev Qazaqstan Respýblıkasynyń Saýda jáne ıntegratsııa mınıstri bolyp qaıta taǵaıyndaldy.

Arman Abaıuly Shaqqalıev Qostanaı ınjenerlik-ekonomıkalyq ýnıversıtetin, L. Gýmılev atyndaǵy Eýrazııa ulttyq ýnıversıtetin jáne E. Bóketov atyndaǵy Qaraǵandy memlekettik ýnıversıtetin bitirgen.

Eńbek jolynda qarjy, ekonomıka jáne memlekettik aktıvter salasynda qyzmet atqardy. 2008-2016 jyldary «Qazaqstan standarttaý jáne sertıfıkattaý ınstıtýtyn», 2018-2019 jyldary Tehnıkalyq retteý jáne metrologııa komıtetin basqardy. 2020-2022 jyldary Eýrazııalyq ekonomıkalyq komıssııa alqasynyń múshesi — Básekelestik jáne monopolııaǵa qarsy retteý jónindegi mınıstri boldy.

2022-2023 jyldary Saýda jáne ıntegratsııa birinshi vıtse-mınıstri qyzmetin atqardy. 2023 jylǵy qyrkúıekte Saýda jáne ıntegratsııa mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

«Qurmet» ordenimen jáne birqatar merekelik medaldarmen marapattalǵan.

Nurjan Nurjigitov Qazaqstan Respýblıkasynyń Sý resýrstary jáne ırrıgatsııa mınıstri bolyp qaıta taǵaıyndaldy.

Nurjan Moldııaruly Nurjigitov 1967 jyly Jambyl oblysynda dúnıege kelgen. Lenıngrad aýyl sharýashylyǵy ınstıtýtyn ınjener-mehanık, Jambyl gýmanıtarlyq-tehnıkalyq ýnıversıtetin ekonomıst mamandyqtary boıynsha bitirgen.

Eńbek jolyn 1988 jyly óndiris salasynda bastap, keıin Jýaly aýdany ákimdiginde túrli qyzmetter atqardy. 2015-2019 jyldary Jambyl oblysy ákimdiginiń aýyl sharýashylyǵy jáne tabıǵı resýrstar basqarmalaryn basqardy. 2019-2021 jyldary Baızaq aýdanynyń ákimi, 2021-2022 jyldary Jambyl oblysy ákiminiń orynbasary boldy.

2022-2023 jyldary Jambyl oblysynyń ákimi qyzmetin atqardy. 2023 jylǵy 4 qyrkúıekte Sý resýrstary jáne ırrıgatsııa mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

Aqmaral Álnazarova Qazaqstan Respýblıkasynyń Densaýlyq saqtaý mınıstri bolyp qaıta taǵaıyndaldy.

Aqmaral Sháripbaıqyzy Álnazarova 1967 jyly Qyzylorda oblysynda dúnıege kelgen. Almaty memlekettik medıtsına ınstıtýtyn «Pedıatrııa» mamandyǵy boıynsha bitirgen.

Eńbek jolyn 1994 jyly Qyzylorda qalalyq balalar aýrýhanasynda dáriger bolyp bastady. 1999-2004 jyldary Qyzylorda oblysy Densaýlyq saqtaý basqarmasynda basshylyq qyzmetter atqaryp, 2001-2003 jyldary oblystyq balalar aýrýhanasyn basqardy. 2007-2013 jyldary Qyzylorda medıtsınalyq kolledjiniń dırektory boldy.

2013-2014 jyldary Qyzylorda oblysy ákiminiń orynbasary, 2014-2015 jyldary oblystyq máslıhat hatshysy qyzmetin atqardy. 2015-2019 jyldary oblystyń densaýlyq saqtaý basqarmasyn basqardy.

2020-2024 jyldary Parlament Senatynyń depýtaty boldy. 2024 jylǵy 6 aqpanda Densaýlyq saqtaý mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

Qazaqstan Respýblıkasynyń Ekologııa jáne tabıǵı resýrstar mınıstri bolyp Álibek Qýantyrov taǵaıyndaldy.

Álibek Sakenuly Qýantyrov Tomsk memlekettik ýnıversıtetin jáne Mıchıgan ýnıversıtetin bitirgen.

Eńbek jolyn 2005 jyly Ekonomıka jáne bıýdjettik josparlaý mınıstrliginde bastady. Keıin Prezıdent Ákimshiliginde jáne ekonomıka salasyndaǵy memlekettik organdarda basshylyq qyzmetter atqardy.

2021 jyly Ulttyq ekonomıka vıtse-mınıstri, 2022-2024 jyldary Ulttyq ekonomıka mınıstri boldy. 2024 jyly «KAZENERGY» qaýymdastyǵynyń bas dırektory, keıin Syrtqy ister mınıstriniń orynbasary qyzmetin atqardy.

Aıdarbek Saparov Qazaqstan Respýblıkasynyń Aýyl sharýashylyǵy mınıstri bolyp qaıta taǵaıyndaldy.

Aıdarbek Seıpiluly Saparov 1966 jyly Soltústik Qazaqstan oblysynda dúnıege kelgen. Omby aýyl sharýashylyǵy ınstıtýtyn jáne M. Qozybaev atyndaǵy Soltústik Qazaqstan memlekettik ýnıversıtetin bitirgen.

Eńbek jolyn aýyl sharýashylyǵy salasynda bastap, keıin Soltústik Qazaqstan oblysy ákimdiginde túrli qyzmetter atqardy. 2011-2019 jyldary oblys ákiminiń birinshi orynbasary boldy. 2019-2022 jyldary aýyl sharýashylyǵynyń birinshi vıtse-mınıstri qyzmetin atqardy.

2022 jyly Soltústik Qazaqstan oblysynyń ákimi, 2023 jylǵy qyrkúıekte Aýyl sharýashylyǵy mınıstri bolyp taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Asqarbek Ertaev Qazaqstan Respýblıkasynyń Eńbek jáne halyqty áleýmettik qorǵaý mınıstri bolyp qaıta taǵaıyndaldy.

Asqarbek Maratuly Ertaev 1977 jyly Aqtóbe qalasynda dúnıege kelgen. Q. Jubanov atyndaǵy Aqtóbe memlekettik ýnıversıtetin jáne «Nur» Aqtóbe menedjment, bıznes jáne quqyq ınstıtýtyn bitirgen.

Eńbek jolyn 1997 jyly Aqtóbe oblysy Muǵaljar aýdany ákimdiginde bastady. 2000-2014 jyldary bank salasynda jumys istedi. Keıin Ulttyq ekonomıka mınıstrliginde jáne Prezıdent Ákimshiliginde basshylyq qyzmetter atqardy.

2022-2023 jyldary Premer-Mınıstr Keńsesiniń ekonomıkalyq bólimin basqardy. 2023-2024 jyldary Eńbek jáne halyqty áleýmettik qorǵaý mınıstrliginiń Kóshi-qon komıtetine tóraǵalyq etti. 2024-2026 jyldary osy mınıstrlikte vıtse-mınıstr jáne birinshi vıtse-mınıstr qyzmetterin atqardy.

2026 jylǵy 27 qańtardan bastap Eńbek jáne halyqty áleýmettik qorǵaý mınıstri qyzmetin atqaryp keledi.

Qazaqstan Respýblıkasynyń Týrızm jáne sport mınıstri bolyp Erbol Myrzabosynov qaıta taǵaıyndaldy.

Erbol Qýantaıuly Myrzabosynov 1983 jyly Semeı qalasynda dúnıege kelgen. Semeı memlekettik pedagogıkalyq ınstıtýtyn jáne Qazaq gýmanıtarlyq-zań ınnovatsııalyq ýnıversıtetin bitirgen, PhD doktory.

Eńbek jolyn 2005 jyly dene shynyqtyrý jáne sport salasynda bastap, Semeıdegi joǵary oqý oryndarynda oqytýshy jáne kafedra meńgerýshisi boldy. 2021-2023 jyldary Dene shynyqtyrý jáne buqaralyq sport akademııasynyń rektory qyzmetin atqardy.

2023-2024 jyldary Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy boldy. 2024 jylǵy 2 qyrkúıekte Týrızm jáne sport mınıstri bolyp taǵaıyndalyp, 2026 jylǵy 3 qyrkúıekte osy qyzmetine qaıta taǵaıyndaldy.

Saıasat Nurbek Qazaqstan Respýblıkasynyń Ǵylym jáne joǵary bilim mınıstri bolyp qaıta taǵaıyndaldy.

Saıasat Nurbek 1981 jyly Semeı qalasynda dúnıege kelgen. AQSh-taǵy Marshalltaýn kolledjin, L. N. Gýmılev atyndaǵy Eýrazııa ulttyq ýnıversıtetin jáne Italııadaǵy La Sapienza ýnıversıtetin bitirgen.

Eńbek jolynda Prezıdent Ákimshiliginde, Memlekettik basqarý akademııasynda jáne «Samuryq-Qazyna» qorynda basshylyq qyzmetter atqardy. 2010-2013 jyldary Bilim jáne ǵylym mınıstrliginiń «Halyqaralyq baǵdarlamalar ortalyǵyn» basqardy.

2022 jylǵy aqpanda Parlament Májilisiniń depýtaty bolyp saılanyp, sol jyly Ǵylym jáne joǵary bilim mınıstri qyzmetine taǵaıyndaldy. 2026 jylǵy 3 qyrkúıekte osy qyzmetine qaıta taǵaıyndaldy.

Qazaqstan Respýblıkasynyń Mádenıet jáne aqparat mınıstri bolyp Arman Qyryqbaev taǵaıyndaldy.

Arman Orazbaıuly Qyryqbaev 1976 jyly Astana qalasynda dúnıege kelgen. Qazaq memlekettik basqarý akademııasyn «Ekonomıst» mamandyǵy boıynsha jáne QR Syrtqy ister mınıstrliginiń Dıplomatııalyq akademııasyn «Halyqaralyq qatynastar» mamandyǵy boıynsha bitirgen.

Eńbek jolyn 1996 jyly Syrtqy ister mınıstrliginde bastady. Keıin Mádenıet jáne aqparat mınıstrliginde, Qaraǵandy oblysy men Almaty qalasy ákimdikterinde basshylyq qyzmetter atqardy. 2012-2013 jyldary Mádenıet jáne aqparat vıtse-mınıstri boldy.

2020-2022 jyldary «Nur Otan» partııasynyń hatshysy, 2022-2024 jyldary Almaty qalasy ákiminiń orynbasary qyzmetin atqardy. 2024-2025 jyldary Prezıdent Ákimshiliginiń Kommýnıkatsııalar bólimin basqardy. 2025 jylǵy aqpannan Prezıdenttiń ishki saıasat jáne kommýnıkatsııalar jónindegi kómekshisi boldy.

Qazaqstan Respýblıkasy Prezıdentiniń Qazaqstan Respýblıkasynyń Quryltaıyndaǵy Ókildiginiń basshysy bolyp Murat Qaıyrbek taǵaıyndaldy.

Murat Ádilǵazyuly Qaıyrbek 2001 jyly Qazaq memlekettik zań akademııasyn, 2003 jyly Ál-Farabı atyndaǵy Qazaq ulttyq ýnıversıtetin, 2009 jyly Memlekettik basqarý akademııasyn, 2012 jyly Ulybrıtanııanyń Ekseter ýnıversıtetin bitirgen.

Eńbek jolyn 2003 jyly oqytýshy bolyp bastap, 2004-2016 jyldary Parlament Májilisi Apparatynda túrli qyzmetter atqardy. 2016-2019 jyldary Prezıdenttiń Baspasóz qyzmetinde, 2019-2026 jyldary Prezıdent Ákimshiliginde eńbek etti.

«Qurmet» ordenimen jáne «Eren eńbegi úshin» medalimen marapattalǵan.

Qazaqstan Respýblıkasy Qaýipsizdik keńesi apparatynyń basshysy bolyp Murat Baımuqashev taǵaıyndaldy.

Murat Qalıuly Baımuqashev 1994 jyly eńbek jolyn ishki ister organdarynda bastap, keıin ІІM júıesinde basshylyq qyzmetter atqardy. 2009-2019 jyldary Premer-Mınıstr Keńsesiniń qorǵanys jáne quqyq qorǵaý baǵytyna jetekshilik etti.

2019-2020 jyldary Qaýipsizdik keńesi hatshysynyń orynbasary, 2020-2021 jyldary ІІM Ákimshilik polıtsııa komıtetiniń tóraǵasy, 2021-2022 jyldary Іshki ister mınıstriniń orynbasary boldy.

2022 jyldan Qaýipsizdik keńesi hatshysynyń birinshi orynbasary jáne orynbasary qyzmetterin atqaryp keldi. «Qurmet» jáne «Aıbyn» ordenderimen marapattalǵan.

Almaty oblysynyń ákimi bolyp Shyńǵys Árinov taǵaıyndaldy.

Shyńǵys Saıranuly Árinov Ál-Farabı atyndaǵy Qazaq ulttyq ýnıversıtetin «Halyqaralyq qatynastar», Qazaq eńbek jáne áleýmettik qatynastar akademııasyn «Quqyqtaný» mamandyǵy boıynsha bitirgen. Sondaı-aq Azamattyq avıatsııa akademııasynda bilim alǵan.

Eńbek jolyn 2006 jyly Memlekettik kúzet qyzmetinde bastap, túrli ofıtserlik jáne basshylyq qyzmetter atqardy. 2022-2024 jyldary Memlekettik kúzet qyzmeti bastyǵynyń orynbasary — Prezıdent kúzet qyzmetiniń bastyǵy boldy.

2024 jylǵy aqpanda Tótenshe jaǵdaılar mınıstri bolyp taǵaıyndaldy. 2026 jylǵy 4 qyrkúıekte Almaty oblysynyń ákimi qyzmetine keldi.

Tekeli qalasynyń ákimi bolyp Aıdos Beketaev taǵaıyndaldy.

Aıdos Beketaev memlekettik qyzmettegi eńbek jolyn 2010 jyly Almaty qalasy Túrksib aýdany ákimdiginde bastady. Keıin aýdan ákiminiń orynbasaryna deıin kóterildi.

2023 jylǵy qazannan bastap Jetisý oblysynyń energetıka jáne turǵyn úı-kommýnaldyq sharýashylyq basqarmasyn basqardy. 2026 jylǵy 4 qyrkúıekte Tekeli qalasynyń ákimi bolyp taǵaıyndaldy.

Qazaqstan Respýblıkasy Qaýipsizdik keńesi apparaty basshysynyń orynbasarlary taǵaıyndaldy.

Memleket basshysynyń ókimderimen Nurjan Hajımuratuly Kadjıaqbarov Qazaqstan Respýblıkasy Qaýipsizdik keńesi apparaty basshysynyń birinshi orynbasary bolyp taǵaıyndaldy jáne burynǵy atqarǵan laýazymynan bosatyldy.

Rýslan Fatıhuly Jaqsylyqov Qazaqstan Respýblıkasy Qaýipsizdik keńesi apparaty basshysynyń orynbasary bolyp taǵaıyndaldy jáne burynǵy atqarǵan laýazymynan bosatyldy.

Gennadıı Ivanovıch Zýev Qazaqstan Respýblıkasy Qaýipsizdik keńesi apparaty basshysynyń orynbasary bolyp taǵaıyndaldy.

Aıta keteıik, buǵan deıin, 24-30 tamyz aralyǵyndaǵy kadrlyq taǵaıyndaýlardy jazǵan edik.