Elimizde apta ishinde bolǵan kadrlyq taǵaıyndaýlar
ASTANA. KAZINFORM — Ótip bara jatqan apta ishinde elimizde birqatar kadrlyq aýys-túıis boldy.
20 shilde, ıaǵnı osy aptanyń alǵashqy kúni Qazaqstan temir joly kompanııasynyń basqarma tóraǵasy taǵaıyndaldy.
«Samuryq-Qazyna» AQ Basqarmasynyń sheshimimen bul qyzmetke Eljas Otynshıev kiristi.
Bilimi:
Eljas Otynshıev Máskeý fızıka-tehnıkalyq ınstıtýtynyń «Jalpy jáne qoldanbaly fızıka» mamandyǵy boıynsha bakalavrıat jáne magıstratýra baǵdarlamalaryn támamdaǵan.
Eńbek joly:
Eńbek jolyn 2007 jyly Ernst & Young kompanııasynyń Máskeý qalasyndaǵy keńsesinde bıznesti baǵalaý jáne mámilelerdi súıemeldeý departamentiniń konsýltanty retinde bastaǵan.
2009–2019 jyldary «Samuryq-Qazyna» AQ men onyń enshiles kompanııalarynda jumys istedi.
2021–2023 jyldary KIDF uıymynda basshylyq qyzmetter atqaryp, ınvestıtsııalyq portfeldi basqarý baǵytyna jetekshilik etti.
2023 jyly sáýirden bastap osy ýaqytqa deıin «Samuryq-Qazyna» AQ Strategııa jáne aktıvterdi basqarý jónindegi basqarýshy dırektory — Basqarma múshesi qyzmetin atqardy. Bul laýazymda qordyń munaı-gaz, temirjol, taý-ken jáne basqa da salalardaǵy portfeldik kompanııalaryn basqarýǵa jaýapty boldy.
2024 jylǵy aqpannan bastap «Qazaqstan temir joly» UK» AQ Dırektorlar keńesiniń múshesi.
2023 jyly Qazaqstan Respýblıkasynyń memlekettik nagradasy — «Eren eńbegi úshin» medalimen marapattalǵan.
Dál sol kúni Temirtaý qalasynyń ákimi bolyp Sapar Sataev taǵaıyndaldy.
Jańa basshyny Temirtaý qalasynyń aktıvine Qaraǵandy oblysynyń ákimi Ermaǵanbet Bólekpaev tanystyryp, qala basshysynyń aldyna qoıylǵan negizgi mindetterdi aıqyndap berdi.
— Sapar Sataevtyń memlekettik basqarý júıesinde tájirıbesi mol. Ol áleýmettik-ekonomıkalyq damý máselelerin jaqsy biledi ári qajetti kásibı biliktilikke ıe. Sapar Qaıyrkenuly, sizdiń basty mindetińiz — temirtaýlyqtardyń ómir súrý sapasyn arttyrý, turǵyndar úshin jaıly ári qaýipsiz qalalyq orta qalyptastyrý, sondaı-aq qalanyń ornyqty áleýmettik-ekonomıkalyq damýyn qamtamasyz etý, — dedi oblys ákimi.
Óz kezeginde Sapar Sataev búginde Temirtaýdyń tynys-tirshiligin jaqsy biletinin, qandaı máseleler erekshe nazar aýdarýdy qajet etetinin jáne turǵyndardyń qandaı sheshimderdi kútip otyrǵanyn atap ótti.
— Temirtaý qashanda adal eńbek, jaýapkershilik pen naqty nátıjeni baǵalaıtyn qala. Meniń jumysym da dál osy qaǵıdattarǵa negizdeletin bolady, — dep atap ótti Sapar Sataev.
Eńbek joly:
Sapar Sataev eńbek jolyn 2002 jyly «Qazaqavtojol» respýblıkalyq memlekettik kásipornynda bastaǵan.
Ár jyldary «Botaqara sý qojalyǵy» kommýnaldyq memlekettik qazynalyq kásiporny dırektorynyń orynbasary jáne dırektordyń mindetin atqarýshy qyzmetterin atqarǵan.
Memlekettik qyzmette 2010 jyldan beri eńbek etip keledi. Qaraǵandy oblysy Buqar jyraý aýdanyndaǵy Botaqara kentiniń ákimi boldy.
2013–2015 jyldary Abaı qalasynyń ákimi qyzmetin atqardy. Keıin Buqar jyraý aýdany ákiminiń orynbasary bolyp jumys istedi. Odan soń Prıozersk qalasynyń ákimi boldy.
2023 jyldyń mamyr aıynan bastap jańa qyzmetke taǵaıyndalǵanǵa deıin Balqash qalasynyń ákimi qyzmetin atqardy.
21 shildede Balqash qalasynyń ákimi bolyp Saıan Muratuly bekitildi.
Bul sheshim QR Prezıdenti Ákimshiliginiń jáne Balqash qalalyq máslıhaty depýtattarynyń kelisimimen qabyldanǵan.
Jańa qala basshysyn Balqash qalasynyń aktıvine Qaraǵandy oblysynyń ákimi Ermaǵanbet Bólekpaev tanystyrdy. Óz sózinde de biraqatar mindetterdi de júktedi.
— Sizdiń basty mindetińiz — balqashtyqtardyń ómir súrý sapasyn arttyrý, turǵyndarǵa jaıly ári qaýipsiz ómir súrý ortasyn qalyptastyrý, ınjenerlik jáne áleýmettik ınfraqurylymdy damytý. Sonymen qatar týrızm salasyn órkendetýge erekshe nazar aýdarý qajet. Atap aıtqanda, Balqash kóliniń biregeı tabıǵı áleýetin sporttyq jáne týrızmniń ózge de túrlerin damytý úshin barynsha tıimdi paıdalaný mańyzdy. Osyǵan baılanysty týrıstik ınfraqurylymdy jetildirý, jaǵalaý aımaǵyn abattandyrý, ınvestıtsııalar tartý qajet, — dedi Ermaǵanbet Bólekpaev.
Eńbek joly:
Saıan Muratuly memlekettik basqarý júıesinde 2015 jyldan beri eńbek etip keledi.
Memlekettik qyzmettegi eńbek jolyn Balqash qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminde abattandyrý, avtomobıl joldary, jolaýshylar kóligi jáne kommýnaldyq sharýashylyq sektorynyń bas mamany qyzmetinen bastaǵan.
Keıin Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynda sýmen jabdyqtaý jáne sý burý bóliminiń bas mamany, keıin osy bólimniń basshysy qyzmetterin atqardy.
2022–2024 jyldary Aqtoǵaı aýdany ákiminiń orynbasary boldy.
Odan keıin Qaraǵandy oblysynyń qurylys, sáýlet jáne qala qurylysy basqarmasy basshysynyń orynbasary qyzmetin atqardy.
2025 jyldyń tamyz aıynan bastap Balqash qalasynyń ákimi bolyp taǵaıyndalǵanǵa deıin Qaraǵandy oblysynyń qurylys, sáýlet jáne qala qurylysy basqarmasynyń basshysy boldy.
22 shildede Qasym-Jomart Toqaev birneshe eldegi elshini aýystyrdy
Memleket basshysy Qasym-Jomart Toqaev búgin, 2026 jylǵy 22 shildede birqatar kadrlyq ózgerister týraly jarlyqtarǵa qol qoıdy.
Eraly Luqpanuly Toǵjanov Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti elshisi laýazymyna taǵaıyndaldy;
Álibek Ásetuly Baqaev Qazaqstan Respýblıkasynyń Ulybrıtanııa jáne Soltústik Irlandııa Qurama Koroldigindegi Tótenshe jáne Ókiletti elshisi bolyp taǵaıyndaldy, ol burynǵy atqarǵan laýazymynan bosatyldy;
Amangeldi Ǵazezuly Saınov Qazaqstan Respýblıkasynyń Rýmynııadaǵy Tótenshe jáne Ókiletti elshisi laýazymyna taǵaıyndaldy.
Sonymen birge:
Beıbit Bákiruly Atamqulov Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti Elshisi laýazymynan bosatyldy;
Erlik Shákiruly Álı Qazaqstan Respýblıkasynyń Rýmynııadaǵy Tótenshe jáne Ókiletti Elshisi laýazymynan bosatyldy.
Dál osy kúni, ıaǵnı aptanyń sársenbisi Shyǵys Qazaqstan oblysy ákiminiń birinshi orynbasary aýysty.
Bul qyzmetke Shyǵys Qazaqstan oblysy ákiminiń ókimimen Darhan Baqytjanuly Sapanov bekitildi.
Darhan Sapanov 1985 jyly 2 qańtarda Shyǵys Qazaqstan oblysy Tarbaǵataı aýdanynyń Aqjar aýylynda dúnıege kelgen.
Bilimi:
Joǵary bilimdi birneshe oqý ornynda alǵan. 2007 jyly D. Serikbaev atyndaǵy Shyǵys Qazaqstan memlekettik tehnıkalyq ýnıversıtetin «Ónerkásiptik jylý energetıkasy» mamandyǵy boıynsha ınjener biliktiligimen bitirgen.
2009 jyly S. Amanjolov atyndaǵy Shyǵys Qazaqstan memlekettik ýnıversıtetin «Menedjment» mamandyǵy boıynsha támamdaǵan.
2022 jyly Reseı Federatsııasy Prezıdenti janyndaǵy Reseı halyq sharýashylyǵy jáne memlekettik qyzmet akademııasynda «Іskerlik ákimshilendirý doktory» (DBA) baǵdarlamasyn aıaqtaǵan.
Eńbek joly:
2007 jyldan bastap ár jyldary Shyǵys Qazaqstan oblysynyń Memlekettik sáýlet-qurylys baqylaýy departamentiniń ınspektsııalaý bóliminiń bas mamany, «Astanaenergosbyt» JShS-niń halyqpen jumys isteý departamentiniń ınjeneri, Qazaqstan Respýblıkasy Energetıka jáne mıneraldyq resýrstar mınıstrliginiń Elektr energetıkasy jáne kómir ónerkásibin damytý departamentiniń sarapshysy qyzmetterin atqarǵan.
2009-2020 jyldary Qazaqstan Respýblıkasy Premer-mınıstri keńsesinde ár túrli laýazymdarda eńbek etti. Atap aıtqanda, bas sarapshy, bas konsýltant, sektor meńgerýshisi, bas ınspektor jáne Indýstrııalyq-ınnovatsııalyq damý bólimi meńgerýshisiniń orynbasary qyzmetterin atqarǵan.
2020-2023 jyldary Qazaqstan Respýblıkasy Prezıdenti Ákimshiliginiń memlekettik ınspektory boldy.
2023 jylǵy aqpan aıynan bastap Shyǵys Qazaqstan oblysy ákiminiń orynbasary qyzmetin atqaryp keldi.
Memlekettik qyzmet salasyndaǵy eńbegi úshin 2018 jyly «Eren eńbegi úshin» memlekettik medalimen marapattalǵan.
23 shildede Ońtústik Qazaqstan pedagogıkalyq ýnıversıtetiniń rektory taǵaıyndaldy.
Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń rektory bolyp zań ǵylymdarynyń doktory, professor Qaırat Balabıev keldi.
Qaırat Balabıev 1965 jyly Túrkistan oblysynyń Kentaý qalasynda dúnıege kelgen.
Bilimi:
Ebineı Bóketov atyndaǵy Qaraǵandy memlekettik ýnıversıtetiniń zań fakýltetin «Quqyqtaný» mamandyǵy boıynsha, sondaı-aq Ońtústik Qazaqstan Ashyq ýnıversıtetin «Qarjy jáne nesıe» mamandyǵy boıynsha támamdaǵan.
Eńbek joly:
Eńbek jolynda prokýratýra, ádilet organdary, joǵary bilim berý júıesi jáne memlekettik qyzmet salalarynda jaýapty laýazymdardy atqarǵan.
Ár jyldary burynǵy Ońtústik Qazaqstan oblystyq prokýratýrasynda, Shymkent qalasy men óńirlik prokýratýralarda, Ádilet basqarmasynda qyzmet atqaryp, Ońtústik Qazaqstan zań ınstıtýtynyń rektory boldy.
Sonymen qatar ǵylymı-pedagogıkalyq qyzmetpen aınalysyp, joǵary oqý oryndarynda professor retinde eńbek etken.
2016-2021 jyldary Túrkistan oblystyq máslıhatynyń VI shaqyrylymynyń hatshysy, 2021 jyldan VII shaqyrylymynyń hatshysy qyzmetterin atqardy. Keıin QR Parlamenti Májilisiniń depýtaty boldy.
Qaırat Balabıev — ákimshilik quqyq jáne memlekettik qyzmet salasyndaǵy ǵylymı eńbekterdiń avtory. Onyń «Qazaqstan Respýblıkasynyń ákimshilik-is júrgizý quqyǵy: jaǵdaıy men máseleleri» jáne «Qazaqstan Respýblıkasynda memlekettik qyzmettiń ákimshilik-quqyqtyq rettelýi: qalyptasýy jáne damý perspektıvalary» atty monografııalary ǵylymı qaýymdastyq tarapynan joǵary baǵalanǵan.
«Qurmet», «Parasat» ordenderimen, mereıtoılyq medaldarmen jáne «Ybyraı Altynsarın» tósbelgisimen marapattalǵan.
Sonymen qatar «Qazaqstan máslıhattarynyń Qurmetti depýtaty» ataǵynyń ıegeri, Túrkistan oblysynyń, Shymkent jáne Kentaý qalalarynyń, Maqtaaral aýdanynyń Qurmetti azamaty.
Dál osy kúni Bekjan Bapyshev Abaı oblysy ákiminiń orynbasary bolyp bekitildi.
Aımaq basshysy Berik Ýálı búgin oblys aktıvine jańa ákimdi tanystyrdy. Bul týraly Abaı oblysy ákimdiginiń baspasóz qyzmeti habarlady.
Bekjan Meırambekuly Bapyshev Shyǵys Qazaqstan oblysynda dúnıege kelgen.
Bilimi:
2011 jyly S. Amanjolov atyndaǵy Shyǵys Qazaqstan ýnıversıtetin «Quqyqtaný» mamandyǵy, 2024 jyly Qazaqstan Respýblıkasy Prezıdentiniń janyndaǵy Memlekettik basqarý akademııasynyń magıstratýrasyn «Memlekettik saıasat» mamandyǵy boıynsha támámdady.
Eńbek joly:
Eńbek jolyn Astana qalasy Almaty aýdany ákiminiń apparatynda bastaǵan.
2013-2015 jyldary Astana qalasy Saryarqa aýdany ákiminiń apparatynda óndiristik-tehnıkalyq, tynys-tirshilikti qamtamasyz etý jáne ınfraqurylym bólimderinde bas maman, 2015-2016 jyldary Almaty aýdany ákiminiń apparatynyń múlikti jarııa etý komıssııasynda, óndiristik-tehnıkalyq bólimde tehnık, bas maman, bólim basshysy bolyp eńbek etti.
Ár jyldary Astana qalasy Esil aýdany ákiminiń apparatynda ınfraqurylym bólimi men Astana qalasy Almaty aýdany ákiminiń apparatynda abattandyrý jáne óndiristik-tehnıkalyq bólimderin basqaryp, Astana qalasy Almaty aýdany ákiminiń orynbasary qyzmetin atqardy.
2025-2026 jyldary Semeı qalasy ákiminiń orynbasary, qala ákiminiń mindetin atqarýshy (alty aı), oblystyq Qurylys basqarmasynyń basshysy boldy.
Taǵaıyndalǵanǵa deıin Abaı oblysy týrızm basqarmasynyń basshysy qyzmetin atqardy.
Shymkent qalasy Tótenshe jaǵdaılar departamentiniń bastyǵy taǵaıyndaldy.
QR Tótenshe jaǵdaılar mınıstriniń buıryǵymen polkovnık Tileýberdi Mádıev Shymkent qalasy Tótenshe jaǵdaılar departamentiniń bastyǵy bolyp, jańa qyzmetine kiristi.
Eńbek joly:
Osyǵan deıin ol atalǵan departament bastyǵynyń birinshi orynbasary qyzmetin atqarǵan.
Tileýberdi Serikbaıuly 2009 jyly Tótenshe jaǵdaılar mınıstrliginiń Kókshetaý tehnıkalyq ınstıtýtyn, al 2022 jyly Reseı TJM Azamattyq qorǵaý akademııasyn bitirgen.
Azamattyq qorǵaý organdaryndaǵy eńbek jolyn 2005 jyldyń tamyzynda bastaǵan. Ár jyldary qaraýyl bastyǵynan aýmaqtyq bólimshe basshysyna deıingi túrli laýazymdardy atqardy.
Sondaı-aq Shyǵys Qazaqstan oblysy jáne Almaty qalasy Tótenshe jaǵdaılar departamentterinde, Málik Ǵabdýllın atyndaǵy Azamattyq qorǵaý akademııasynda, QR Tótenshe jaǵdaılar mınıstrliginiń ortalyq apparatynda qyzmet etken.
Dál osy kúni Ulytaý oblysy polıtsııa departamentiniń basshysy ózgerdi.
Іshki ister mınıstriniń buıryǵymen bul qyzmetke polıtsııa polkovnıgi Baýyrjan Sapar taǵaıyndaldy.
Jańa basshyny jeke quramǵa Іshki ister mınıstriniń orynbasary polıtsııa general-maıory Aıdar Saıtbekov tanystyrdy.
Baýyrjan Sapardyń ishki ister organdaryndaǵy qyzmet ótili 30 jyldan asady. Qyzmettik joldyń barlyq satylarynan ótken.
Keıingi jyldary Túrkistan oblysy polıtsııa departamenti bastyǵynyń orynbasary jáne Jetisý oblysy polıtsııa departamenti bastyǵynyń birinshi orynbasary qyzmetterin atqarǵan.
Aıta keteıik, buǵan deıin ótken apta ishinde elimizde birqatar kadrlyq aýys-túıis bolǵanyn jazǵanbyz.
