Elimizde apta ishinde bolǵan kadrlyq aýys-túıis

ASTANA. KAZINFORM — Ótip bara jatqan apta ishinde elimizdiń jergilikti atqarýshy organdarynda birqatar kadrlyq aýys-túıis boldy. 

Ǵanı Ótepbaıuly Japıshov QR Qorǵanys mınıstrligi Aqparat jáne kommýnıkatsııalar departamentiniń bastyǵy bolyp taǵaıyndaldy. 

Ol 1986 jylǵy 13 aqpanda Aqtóbe qalasynda dúnıege kelgen. Túrkistan qalasyndaǵy Q.A. ıAsaýı atyndaǵy Halyqaralyq qazaq-túrik ýnıversıtetin «jýrnalıstıka» mamandyǵy boıynsha, sondaı-aq Qaraǵandy qalasynda «Bolashaq» akademııasyn «quqyqtaný» mamandyǵy boıynsha bitirgen. Prezıdenttik «Bolashaq» baǵdarlamasynyń stıpendıaty, Broadcast Journalism mamandyǵy boıynsha AQSh-ta Nıý-Iork kıno akademııasyn (NYFA) támamdaǵan.

Sońǵy atqarǵan qyzmeti — Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetiniń keńesshisi.

Almaty oblysy boıynsha ekologııa departamentiniń basshysy laýazymyna Baqytjan Moldahmetov taǵaıyndaldy. 

B. Moldahmetov 1976 jyly týylǵan, bilimi joǵary, 1998 jyly Almaty tehnologııalyq ınstıtýtyn «ınjener-tehnolog», 2002 jyly T.Rysqulov atyndaǵy Qazaq ekonomıkalyq ýnıversıtetin «qarjy jáne nesıe», 2009 jyly Abaı atyndaǵy Qazaq ulttyq pedogogıkalyq ýnıversıtetin «quqyqtaný», 2024 jyly M.Áýezov atyndaǵy Ońtústik Qazaqstan ýnıversıtetin «ekologııa» mamandyqtary boıynsha bitirgen.

2022 jyldyń qarasha aıynan Almaty oblysy boıynsha Ekologııa departamenti basshysynyń orynbasary laýazymynda eńbek etken.

Qaraǵandy oblysynyń bilim sapasyn qamtamasyz etý departamentiniń jańa basshysy bolyp Sanat Qabıdenuly Mýsın taǵaıyndaldy. 

S. Mýsınniń eńbek ótili 26 jyldan asady. Sonyń 19 jyldan astamy memlekettik qyzmet salasyna tıesili. Ár jyldary atqarýshy bılik organdarynda túrli laýazymdardy atqarǵan. 2003 jyldan bastap sot oryndaýshylyǵy, quqyqtyq qamtamasyz etý jáne ákimshilik basqarý baǵyttarynda qyzmet etti.

Ermek Shýaqpaev Qostanaı qalasynyń prokýrory qyzmetine aýysty. 

Ermek. Bolatuly 1980 jyly týǵan, Qostanaı oblysynyń týmasy, A.Baıtursynov atyndaǵy Qostanaı memlekettik ýnıversıtetin bitirgen. Osy taǵaıyndaýǵa deıin Qarasý aýdanynyń prokýratýrasyn basqardy.

Almashan Smatlaev Almaty ákiminiń orynbasary bolyp taǵaıyndaldy. 

A. Smatlaev Reseı Federatsııasyndaǵy Qarjy ýnıversıtetin «ekonomıka» jáne «memlekettik jáne mýnıtsıpaldyq basqarý» mamandyqtary boıynsha, sondaı-aq, AQSh-taǵy Blýmsberg ýnıversıtetin «halyqaralyq ekonomıka» mamandyǵy boıynsha támamdaǵan.

Osyǵan deıin Qazaqstan Respýblıkasy Prezıdenti Ákimshiliginiń memlekettik ınspektory bolyp eńbek etken.

Osy aptada Óskemen qalasy ákiminiń orynbasary bolyp Maqsat Shakırov taǵaıyndaldy.

M. Asanuly 1986 jyly 24 qyrkúıekte Abaı oblysy Aıagóz aýdany Aıagóz qalasynda týǵan. S. Amanjolov atyndaǵy Shyǵys Qazaqstan ýnıversıtetin «Esep jáne aýdıt», «Quqyqtaný» mamandyqtary boıynsha jáne D. Serikbaev atyndaǵy Shyǵys Qazaqstan tehnıkalyq ýnıversıtetin «Qurylys» mamandyǵy boıynsha bitirgen.

Shyǵys Qazaqstan oblysy Bilim basqarmasynyń basshysy laýazymyna Qýat Oqasov taǵaıyndaldy. 

Ol buǵan deıin Ulan aýdany ákiminiń orynbasary bolǵan.

Q. Barysuly 1969 jyly 12 mamyrda Shyǵys Qazaqstan oblysy Ulan aýdany Asýbulaq aýylynda dúnıege kelgen. S. Amanjolov atyndaǵy Shyǵys Qazaqstan memlekettik ýnıversıtetinde «Dúnıejúzi tarıhy» mamandyǵy boıynsha joǵary bilim alǵan.

Shymkent qalasynyń sáýlet jáne qala qurylysy basqarmasynyń ýaqytsha basshysy bolyp basqarma basshysynyń orynbasary Dáýren Muqanov taǵaıyndaldy. 

Dáýren Muqanov 1991 jyly Almaty qalasynda dúnıege kelgen. Ol kásibı jolyn sáýlet salasynan bastaǵan. 2010 jyly Qazaq bas sáýlet -qurylys akademııasy janynydǵy Sáýlet kolledji bitirip, keıin Qazaq bas sáýlet-qurylys akademııa kampýsynda oqýyn jalǵastyryp, sáýletshi mamandyǵyn aldy. Keıinnen biliktiligin keńeıtip, Almaty ýnıversıtetinde jáne D. Qonaev atyndaǵy Eýrazııalyq zań akademııasynda bilim alyp, zańgerlik mamandyq boıynsha oqýdy támamdady.

Soltústik Qazaqstan oblysynyń dene shynyqtyrý jáne sport basqarmasyna Qarlyǵash Ramazanova jetekshilik etedi. 

Eńbek jolyn 2004 jyly M.Qozybaev atyndaǵy SQMÝ-dyń sporttyq pánder kafedrasynda oqytýshy bolyp bastaǵan. Sport salasynda mol tájirıbesi bar. Buǵan deıin Ulttyq jáne at sporty túrleri ortalyǵy dırektorynyń orynbasary qyzmetin atqarǵan.

Sáken Amrın Soltústik Qazaqstan oblysy ákimdiginiń Densaýlyq saqtaý basqarmasyn basqaratyn boldy. 

S. Ómerserikuly 1984 jyly Shal aqyn aýdany, Sergeevka qalasynda dúnıege kelgen. 2007 jyly Astana qalasyndaǵy Qazaq memlekettik medıtsına akademııasyn «Emdeý isi» mamandyǵy boıynsha támamdaǵan.

Sońǵy jyldary «Kópsalaly oblystyq aýrýhananyń» bas dırektory qyzmetin atqardy.

Abaı oblysy Tabıǵı resýrstar jáne tabıǵat paıdalanýdy retteý basqarmasynyń basshysy bolyp Marat Temirjanov taǵaıyndaldy. 

M. Qaparuly 1972 jyly 1 qańtarda Abaı oblysy Kókpekti aýdany Uzynbulaq aýylynda dúnıege kelgen. 1997 jyly «Semeı» memlekettik ýnıversıtetin «Zootehnııa» mamandyǵy boıynsha, 2009 jyly Shákárim atyndaǵy Semeı memlekettik ýnıversıtetin «Ekonomıka» mamandyǵy boıynsha támamdaǵan.

2025 jyldyń aqpan aıynan bastap osy ýaqytqa deıin Borodýlıha aýdany ákiminiń orynbasary qyzmetin atqardy.

Belgili medıamenedjer Lázzat Tanysbaı «Eýrazııa» birinshi arnasynyń dırektory laýazymyna taǵaıyndaldy.

L.Tanysbaı osyǵan deıin «Qazaqstan» respýblıkalyq teleradıokorporatsııasyn 2019 jyldyń sáýir aıynan beri basqaryp keldi. Korporatsııa osy jyldar aralyǵynda aıtarlyqtaı jetistikterge jetti jáne bul kórsetkishter ujym úshin óte mańyzdy. Alty jyl ishinde Korporatsııanyń tele jáne radıo arnalarynyń reıtıngi ósip, kommertsııalyq tabysy 50 paıyzǵa artty.

Bul aptada «Qazaqstan» respýblıkalyq teleradıokorporatsııasynyń basqarma tóraǵasy taǵaıyndaldy. Bul qyzmetke Ernur Býrahan keldi. 

E. Kósherhanuly 1981 jyly 16 maýsymda Shyǵys Qazaqstan oblysynda dúnıege kelgen. Jýrnalıstıka salasynda 20 jyldan astam tájirıbesi bar. Sońǵy eki jylda Shyǵys Qazaqstan oblysy Іshki saıasat basqarmasynyń basshysy qyzmetinde boldy.

Rústem Muhtaruly Tóleýtaev «Kardıologııa jáne ishki aýrýlar ǵylymı-zertteý ınstıtýty» AQ Basqarma tóraǵasy. 

Ol 2006 jyly Novosibir memlekettik medıtsına ýnıversıtetiniń emdeý fakýltetin, 2007 jyly Novosibir oblystyq aýrýhanasynyń bazasynda jalpy hırýrgııa boıynsha ınternatýrany, 2009 jyly akademık Meshalkın atyndaǵy qanaınalym patologııasy ǴZI-da júrek-qantamyrlary hırýrgııasy boıynsha klınıkalyq ordınatýrany úzdik bitirdi. 2013 jyly Milano-Bicocca (Italııa) ýnıversıtetinde kardıohırýrgııa boıynsha magıstr dárejesin qorǵady.