Elimizde ana ólimi 6,7 ese, náreste ólimi 5,2 ese azaıdy
ASTANA. KAZINFORM – Táýelsizdik jyldarynda Qazaqstanda ana ólimi 6,7 ese, náreste ólimi 5,2 ese tómendedi. Bul týraly Densaýlyq saqtaý mınıstri Aqmaral Álnazarova Túrikmenstannyń Avaza qalasynda ótken Halyqaralyq áıelder konferentsııasynda málimdedi.
Osylaısha Qazaqstan ana men bala ólimin azaıtý baǵytyndaǵy Turaqty damý maqsattarynyń nysanaly kórsetkishterine merziminen buryn qol jetkizdi.
Aqmaral Álnazarova áıelder men balalardyń densaýlyǵy eldiń demografııalyq bolashaǵyn tikeleı aıqyndaıtynyn atap ótti.
– Búginde aldymyzda budan da kúrdeli mindet tur – árbir adamnyń ómirin saqtap, aldyn alýǵa bolatyn ólimge jol bermeý. Ol úshin zamanaýı dıagnostıka, júkti áıelderdi tıimdi baǵyttaý, joǵary tehnologııalyq medıtsınalyq kómekti damytý, medıtsınalyq kómektiń sapasyna turaqty aýdıt júrgizý jáne aýyr jaǵdaılarǵa jedel áreket etý qajet, – dedi mınıstr.
ıÝNISEF Qazaqstannyń balalar, náresteler jáne neonataldyq ólimdi tómendetý, vaktsınatsııalaý arqyly aldyn alýǵa bolatyn ınfektsııalardy qysqartý baǵyttaryndaǵy nátıjelerin, sondaı-aq alǵashqy medıtsınalyq-sanıtarııalyq kómek deńgeıindegi patronaj qyzmetiniń tıimdiligin atap ótken. Halyqaralyq uıym Qazaqstannyń tájirıbesin Ortalyq Azııa elderine paıdaly bolýy múmkin balalar densaýlyǵyn saqtaý salasyndaǵy ozyq tájirıbelerdiń biri retinde baǵalaıdy.
Qazirgi ýaqytta Qazaqstanda shamamen 6,9 mln bala turady. Bir jyl ishinde 329 myńnan astam bala dúnıege kelgen.
Mınıstr densaýlyq saqtaý júıesindegi áıelderdiń róline de toqtaldy. Búginde salada shamamen 84 myń dáriger jáne 196 myńnan astam orta medıtsına qyzmetkeri jumys isteıdi. Olardyń 80 paıyzdan astamy – áıelder.
Sonymen qatar Qazaqstandaǵy memlekettik qyzmetshilerdiń 55,8 paıyzyn áıelder quraıdy, olardyń 39,1 paıyzy basshylyq laýazymdarda qyzmet atqarady. Kvazımemlekettik sektordaǵy basshylyq laýazymdardaǵy áıelderdiń úlesi 46,8 paıyzǵa jetken.
7 qazanda Aqmaral Álnazarova Túrikmenstanda ótken «Beıbitshilikti saqtaýdaǵy jáne ornyqty damýǵa qol jetkizýdegi áıelderdiń róli» atty Halyqaralyq áıelder dıalogyna jáne «Demografııalyq protsester jáne ornyqty damý: zamanaýı mindetter men halyqaralyq tájirıbe» atty Halyqaralyq konferentsııaǵa qatysty.
Kezdesýde klımat pen densaýlyqtyń ózara baılanysyna da nazar aýdaryldy. Ekstremaldy ystyq, sý resýrstarynyń ózgerýi jáne basqa da klımattyq faktorlar halyq densaýlyǵyna jańa qaýip-qater týdyryp, densaýlyq saqtaý júıelerine qosymsha salmaq túsirip otyr.
Osyǵan baılanysty Qazaqstan óńir elderin tájirıbe almasýdan naqty birlesken is-qımyldarǵa kóshýge shaqyrdy. Onyń ishinde ana men bala densaýlyǵyn saqtaý baǵdarlamalaryn iske asyrý, ana men náreste óliminiń aldyn alý, úzdik medıtsınalyq tájirıbelermen almasý jáne kadrlar daıarlaý, áıelder densaýlyǵyn, tsıfrlyq tehnologııalar men joǵary tehnologııalyq medıtsınalyq kómekti damytý baǵyttary bar.
Aqmaral Álnazarova Qazaqstannyń áıelder men balalardyń densaýlyǵyn saqtaý jáne ornyqty damý máseleleri boıynsha Túrikmenstanmen jáne óńirdiń basqa memleketterimen yntymaqtastyqty jalǵastyrýǵa daıyn ekenin atap ótti.
Aıta keteıik, buǵan deıin Qazaqstanda sońǵy bes jyl ishinde ana ólimi 35 paıyzǵa azaıyp, náreste jáne perınataldyq ólim kórsetkishteri de tómendegeni habarlanǵan.
