Elimizde ana ólimi 32%-ǵa tómendedi
ASTANA. KAZINFORM – Qazaqstanda 2026 jyldyń alǵashqy 10 aıynda ana óliminiń kórsetkishi ótken jyldyń sáıkes kezeńimen salystyrǵanda 32%-ǵa azaıdy. Bul nátıjege ana men bala densaýlyǵyn qorǵaý júıesin jetildirý, aýrýlardy erte anyqtaý jáne medıtsınalyq kómektiń qoljetimdiligin arttyrý baǵytyndaǵy sharalar yqpal etti.
QR Densaýlyq saqtaý mınıstrligi baspasóz qyzmetiniń habarlaýynsha, elimizde reprodýktıvtik jastaǵy áıelderdiń densaýlyǵyn baqylaýǵa arnalǵan «Analar saýlyǵy» baǵdarlamasy júzege asyrylyp jatyr. Onyń negizgi maqsaty – qaýip faktorlaryn erte anyqtaý, áıelderdi ýaqtyly tekserýden ótkizý jáne yqtımal asqynýlardyń aldyn alý.
Baǵdarlama aıasynda bala týý jasyndaǵy áıelder salaýatty júktilikke daıyndalý úshin óz emhanasynda medıtsınalyq tekserýdiń 12 túrinen óte alady.
Sonymen qatar 37 emhana men 23 perınataldyq ortalyqta áıelder konsýltatsııalarynyń jumysy qaıta jandandy. Olardyń qyzmetimen 1 mıllıonnan astam áıel qamtyldy.
-Júktiliktiń 10 aptasyna deıin medıtsınalyq esepke turǵan áıelderdiń úlesi 18 paıyzdyq tarmaqqa artyp, 71%-ǵa jetti. Uryqtyń týa bitken damý aqaýlaryn erte anyqtaý úshin barlyq óńirdegi perınataldyq ortalyqtardyń janynan 19 «Bir kúndik klınıka» ashyldy. Qazir 100 myńnan astam júkti áıel dıagnostıkalyq tekserýden ótti. Prenataldyq skrınıngpen qamtý deńgeıi 8%-ǵa artty,-delingen habarlamada.
Sondaı-aq onda náreste dúnıege kelgennen keıin de medıtsınalyq baqylaý jalǵasatyny aıtylǵan.
Bul kezeńde patronaj, profılaktıkalyq tekserýler, vaktsınatsııa jáne balanyń densaýlyǵyn turaqty baqylaý sharalary júrgiziledi.
Osyǵan deıin Densaýlyq saqtaý mınıstri Aqmaral Álnazarova júkti áıelderge, jańa týǵan nárestelerge jáne bes jasqa deıingi balalarǵa medıtsınalyq baqylaý men kómek kórsetýdi kúsheıtýdi tapsyrǵan bolatyn.