Elimizde ambýlatorııalyq deńgeıdegi dárilik zattar tizbesi jańartyldy

ASTANA. KAZINFORM — 2025 jyldan bastap Densaýlyq saqtaý mınıstrligi ambýlatorııalyq dárilik qamtamasyz etýdi jekelendirilgen josparlaý júıesin engizdi. Endi dárilik preparattarǵa degen qajettilik árbir patsıenttiń jeke derekteri men taǵaıyndalǵan emdeý terapııasynyń negizinde esepteledi.

dári
Foto: DSM

Bıyl dárilik qamtamasyz etý tizbesine 14 aýrýdy emdeýge arnalǵan 22 zamanaýı preparat engizildi.

Jańadan anyqtalǵan patsıentterdi dárilik preparattarmen qamtamasyz etý jáne emdeýdegi úzilisterdiń aldyn alý maqsatynda dárilik zattardyń azaıtylmaıtyn qory satyp alynatyn preparattardyń jyldyq jalpy kóleminiń 35%-yna deıin ulǵaıtyldy. Sonymen qatar dárilik preparattardy óńirler men medıtsınalyq uıymdardyń arasynda jedel qaıta bólý tetigi qarastyrylǵan.

Ambýlatorııalyq dárilik qamtamasyz etý sheńberinde 76 aýrý boıynsha 2,1 mln patsıent jalpy somasy shamamen 245 mlrd teńge bolatyn dárilik preparattarmen qamtamasyz etiledi.

Árbir patsıentti qajetti dárilik preparattarmen ýaqytyly qamtamasyz etý jáne emdeý kýrsynyń úzdiksizdigin saqtaý – basty basymdyqtardyń biri.

Qazaqstan aýrýhanalaryna 2027 jylǵa arnalǵan dáriler qashan jetkiziletinin jazǵan edik.