Altsgeımer aýrýy dıagnozymen esepte turǵandar sany bes jylda 5 ese ósken
ASTANA. KAZINFORM — Qazaqstanda altsgeımer dıagnozymen esepte turǵandar sany 2021 jyly 677 bolsa, 2025 jyly olardyń sany 3 706-ǵa jetti. Bul týraly Densaýlyq saqtaý mınıstrligi Kazinform agenttiginiń resmı saýalyna bergen jaýabynda málimdedi.
Mınıstrlik dereginshe, sońǵy bes jyldaǵy kórsetkish mynadaı:
- 2021 jyly — 677 adam;
- 2022 jyly — 1 559 adam;
- 2023 jyly — 2 279 adam;
- 2024 jyly — 2 992 adam;
- 2025 jyly — 3 706 adam.
Osylaısha, bes jyl ishinde altsgeımer dıagnozymen esepte turǵandar sany 3 029 adamǵa artqan.
— Aýrýshańdyqtyń ósýi anyqtaý deńgeıiniń jaqsarýyna jáne medıtsınalyq kómektiń qoljetimdiliginiń artýyna baılanysty, — dep túsindirdi Densaýlyq saqtaý mınıstrligi.
Elimizde jylyna orta eseppen altsgeımer aýrýynyń 710 jaǵdaıy tirkeledi.
Altsgeımer kóbine 65 jastan keıin damıdy. Degenmen dert odan erte jasta da kezdesýi múmkin.
— Aýrý 65 jasqa deıin bastalsa, ol erte bastalatyn altsgeımer dep atalady. Qazir 65 jasqa tolmaǵan 742 adam osy dıagnozben dınamıkalyq baqylaýda tur, — delingen mınıstrlik jaýabynda.
Altsgeımer aýrýy dementsııanyń negizgi sebebi sanalady. Dúnıejúzilik densaýlyq saqtaý uıymynyń dereginshe, álemdegi dementsııa jaǵdaılarynyń shamamen 60–70%-yna osy dert sebep bolýy múmkin.
Buǵan deıin altsgeımer aýrýyna qandaı adamdar tózimdi keletini jazǵan edik.
Sondaı-aq qarapaıym qan analızi saý adamdarda altsgeımer aýrýynyń jasyryn qaýpin anyqtaı alady.
