Elimizde alma ımportyna tyıym salyndy: shekteý jemis tapshylyǵyna áser etpeı me
ASTANA. KAZINFORM — Aýyl sharýashylyǵy mınıstriniń mindetin atqarýshy 2026 jylǵy 1 qyrkúıekte «QR aýmaǵyna alma ákelýge tyıym salý týraly» buıryqqa qol qoıdy.
Qujatqa sáıkes, bıyl 3 qyrkúıek pen 31 jeltoqsan aralyǵynda Qazaqstanǵa barlyq kólik túrimen EAEO-ǵa múshe memleketterden jáne EAEO aýmaǵy arqyly basqa da elderden alma ákelýge tyıym salyndy.
Alaıda tyıym myna jaǵdaılardy qamtymaıdy:
• almany Qazaqstan aýmaǵy arqyly tranzıtpen tasymaldaý, onyń ishinde taýardy mejeli memleketi Qazaqstan bolmaǵan jaǵdaıda EAEO-ǵa múshe bir memlekettiń aýmaǵynan ekinshi múshe memlekettiń aýmaǵyna Qazaqstan arqyly tasymaldaý;
• 3 qyrkúıekke deıin jóneltýshi memlekette eksporttyq keden rásiminen ótkizilgen alma. Bul rette taýarlarǵa arnalǵan eksporttyq deklaratsııa, sondaı-aq atalǵan taýarlardyń 3 qyrkúıekke deıin jóneltilgenin rastaıtyn kólik qujattary usynylýy qajet. Al taýarlar kedendik tranzıt rásimimen tasymaldanǵan jaǵdaıda tranzıttik deklaratsııa usynylady;
• 3 qyrkúıekke deıin Qazaqstanǵa is júzinde ákelingen alma, onyń ishinde ýaqytsha saqtaýda turǵan taýarlar. Bul jaǵdaıda taýarlardyń Qazaqstan Respýblıkasynyń aýmaǵyna buıryq kúshine engenge deıin naqty ákelingenin rastaıtyn qujattar usynylýy tıis.
Mınıstrliktiń túsindirýinshe, bul shara qazaqstandyq óndirýshilerdi qoldaýǵa baǵyttalǵan. Ol otandyq ónimniń turaqty satylýyna yqpal etedi.
Buıryq 3 qyrkúıekten bastap kúshine endi.
Aıta keteıik, buǵan deıin Nedzvetskıı almasy nesimen erekshe ekenin jazǵanbyz.
