Elimizde alǵash ret júzýden álem kýbogynyń kezeńi ótedi

ASTANA. KAZINFORM – Sıngapýrde ótip jatqan World Aquatics kongresinde Silk Road-2026 júzýden álem kýbogynyń kezeńderi ótetin qalalar jarııalandy. 

Ulttyq olımpıadalyq komıtettiń málimetinshe, birinshi kezeń Ázerbaıjan astanasy Bakýde ótedi. Odan keıin jarys Ózbekstannyń Tashkent qalasynda jalǵasady. Al sońǵy, úshinshi kezeńdi Astana qalasy qabyldaıdy. 

Aıta keteıik, Qazaqstan mundaı iri týrnırdi alǵash ret ótkizgeli otyr. Jarysqa Olımpıada oıyndarynyń, álem chempıonattarynyń jeńimpazdary men júldegerleri, sondaı-aq álem rekordshylary qatysady. 

Álem kýbogynyń barlyq kezeńiniń naqty ótetin ýaqyty keıinirek jarııalanady. 

Buǵan deıin 28 shilde — 3 tamyz aralyǵynda ótetin jarystardyń kestesin jarııalaǵan bolatynbyz.