Qazaqstanda alǵash ret tek qana ǵalym áıelderge beriletin marapat taǵaıyndaldy
ASTANA. KAZINFORM — Halyqaralyq áıelder kúni qarsańynda Prezıdent janyndaǵy Ulttyq ǵylym akademııasy Qazaq ulttyq qyzdar pedagogıkalyq ýnıversıtetiniń ǵımaratynda saltanatty is-shara ótkizdi. Oǵan elimizdiń ár óńirinen kelgen jetekshi ǵalym áıelder qatysty.
Ǵalym áıeldermen kezdesý oflaın/onlaın formatynda ótti. Jıynǵa elimizdiń ár óńirinen 70-ten astam jetekshi ǵalym-áıelder qatysyp, Ulttyq ǵylym akademııasynyń Qurmet gramotasymen marapattaldy.
Ulttyq ǵylym akademııasynyń Prezıdenti A.Kúrishbaev óz sózinde elimizde Halyqaralyq áıelder kúni kóptegen jyldar boıy resmı mereke bolyp sanalyp kele jatqanyn jáne adamzattyń ádemi jaratylysy kóktemniń, sulýlyqtyń, náziktiktiń, rýhanı danalyqtyń kúni bolyp sanalatynyn erekshe atap ótti.
Sonymen qatar, dástúr boıynsha osy mereke aıasynda názik jandardyń saıası, ekonomıkalyq jáne áleýmettik salalardaǵy jetistikterin atap ótýdi qamtıdy.
A. Kúrishbaev ǵylymdy damytýda arýlardyń úlesi orasan zor ekendigin jáne ǵalymdardyń jalpy sanynyń 60%-ǵa jýyǵyn quraıtynyn atap ótti.
QR Prezıdentiniń janyndaǵy Ulttyq ǵylym akademııasy saltanatty jaǵdaıda Qurmet gramotasymen marapattalǵan ǵalym-áıelderdiń eńbegin baǵalap, otandyq ǵylymnyń odan ári damýyn yntalandyrý maqsatynda Qazaqstan men Ortalyq Azııanyń tuńǵysh áıel-akademıgi Naılıa Bazanova atyndaǵy alǵash ret ǵalym-áıelderge arnalǵan Ulttyq ǵylym akademııasynyń marapaty taǵaıyndaldy.
