Elimizde alǵash ret sporttyq delegatsııalardy jasaqtaýdyń biryńǵaı tártibi engizildi
ASTANA. KAZINFORM — Elimizde alǵash ret Olımpıada, Paralımpıada, Sýrdlımpıada jáne basqa da iri halyqaralyq jarystarǵa baratyn resmı sporttyq delegatsııalardyń quramyn jasaqtaýdyń biryńǵaı tártibi bekitildi.
Týrızm jáne sport mınıstrliginiń habarlaýynsha, buǵan deıin sportshylarmen birge jarystarǵa baratyn jattyqtyrýshylar, mamandar men ózge de ókilderdiń sanyna qatysty biryńǵaı talap bolmaǵan. Endi olardyń sany sportshylardyń sanyna, jarystyń deńgeıi men ereksheligine, sondaı-aq ulttyq quramanyń naqty qajettiligine qaraı belgilenedi.
Ókilderdiń úlesi myna formýla boıynsha esepteledi: ókilder sany / sportshylar sany × 100%.
Týrızm jáne sport mınıstrligi men Sport jáne dene shynyqtyrý isteri komıteti ókilderiniń sanyna da shekteý qoıylǵan.
— Jazǵy Olımpıadada mınıstrlik ókilderiniń úlesi 3%-dan, al komıtet ókilderiniń úlesi 2%-dan aspaıdy. Qysqy Olımpıadada bul kórsetkishter tıisinshe 10% jáne 8%-ǵa deıin jetedi. Bul qysqy ulttyq quramanyń sany jazǵy quramamen salystyrǵanda az bolýymen baılanysty. Sondyqtan ilesip júretin mamandardyń sany birdeı bolǵan jaǵdaıda, olardyń jalpy delegatsııadaǵy úlesi joǵary bolady, — delingen habarlamada.
Eń joǵary úles jattyqtyrýshylar quramyna qarastyrylǵan. Olardyń qataryna bas jáne aǵa jattyqtyrýshylar, jeke jattyqtyrýshylar, servıs-jattyqtyrýshylar men jattyqtyrýshy-keńesshiler kiredi. Mamandar sport túriniń basymdyǵy men júldege talasý múmkindigi eskerile otyryp irikteledi. Jazǵy Olımpıadada olardyń úlesi 86%-ǵa deıin, al qysqy Olımpıada men Paralımpıadada 100%-ǵa deıin jetýi múmkin. Bul keı jaǵdaıda sportshylar sanyna shaqqanda olarmen birge baratyn jattyqtyrýshylar men mamandar sany sportshylar sanyna teń bolýy múmkin degendi bildiredi.
Sonymen qatar birinshi toptaǵy múgedektigi bar sportshylarǵa ilesip júretin adamdar úshin de jeke norma belgilendi. Paralımpıada jáne basqa da keshendi halyqaralyq jarystarda olardyń úlesi 38%-ǵa deıin bolýy múmkin.
— Olardy delegatsııa quramyna engizý — byltyr kúshine engen «Dene shynyqtyrý jáne sport týraly» zań aıasyndaǵy reformalardyń taǵy bir nátıjesi. Sporttyq medıtsına mamandaryna da erekshe mán berilip otyr. Dárigerler, massajshylar jáne basqa da medıtsına qyzmetkerleriniń úlesi jazǵy Olımpıada delegatsııasynda 28%-ǵa deıin, al basqa jarystarda 23%-ǵa deıin bolýy múmkin. Ulttyq olımpıada, paralımpıada jáne sýrdlımpıada komıtetteri delegatsııa quramyna jazǵy oıyndarda 13%-ǵa deıin, al qysqy oıyndarda 40%-ǵa deıin óz ókilderin engize alady, — dep habarlady vedomstvo.
Olımpıadalyq daıarlaý ortalyqtary, sport federatsııalary jáne basqa da jaýapty uıymdar ókilderi úshin bul kórsetkish jazǵy Olımpıadada 12%-ǵa deıin, qysqy oıyndarda 20%-ǵa deıin belgilengen.
Buqaralyq aqparat quraldary ókilderi úshin kvota jazǵy Olımpıadada 6%, al qysqy oıyndarda 12% bolady.
Eske salaıyq, buǵan deıin Shotlandııanyń Glazgo qalasynda ótken World Boxing Atqarý komıtetiniń otyrysynda 2028 jyly Los-Andjeleste (AQSh) ótetin Olımpıada oıyndaryna joldama beretin boks týrnırlerin qabyldaıtyn elder bekitilgenin jazǵanbyz.
