Pedagogterge arnalǵan alǵashqy psıhologııalyq qoldaý kabıneti ashyldy
ASTANA. KAZINFORM – Oqý-aǵartý mınıstrligi «Órleý» biliktilikti arttyrý ulttyq ortalyǵy pedagogterdiń turaqty kásibı damýyna, mentaldyq saýlyǵyna qamqorlyq jasaýǵa baǵyttalǵan mańyzdy bastamany iske qosty. Túrkistan jáne Aqtóbe oblystarynyń ortalyq fılıaldarynda alǵash ret pedagogterge arnalǵan psıhologııalyq qoldaý kabıneti ashyldy.
– Pılottyq joba muǵalimderdiń mentaldyq densaýlyǵyn qoldaýǵa, kásibı kúızelistiń aldyn alýǵa jáne stressti basqarýǵa múmkindik beredi, - delingen mınıstrlik habarlamasynda.
Kabınette kásibı psıholog jeke jáne toptyq keńes ótkizedi, relaksatsııa men art-terapııa sabaqtaryn uıymdastyrady, trenıngter men psıhologııalyq dıagnostıka júrgizedi.
Bul qyzmetterdi pedagogter «Órleý» ortalyǵynda biliktilikti arttyrý kýrstarynan ótý kezinde paıdalana alady. Jumys barysynda etıkalyq normalar, eriktilik jáne qupııalylyq qaǵıdattary qatań saqtalady. Aldaǵy ýaqytta osyndaı kabınetti elimizdiń basqa óńirlerinde de ashý josparlanyp otyr.
Buǵan deıin 7 myńǵa jýyq pedagog biliktilikti arttyrý kýrstarynan ótip jatqanyn jazǵanbyz.