Elimizde alǵash ret ósimdikterdi zııankesten qorǵaıtyn tsıfrlyq júıe engizildi
ASTANA. KAZINFORM – Qazaqstanda alǵash ret zııatkerlik feromondyq tuzaqtar men tsıfrlyq boljaý elementterine negizdelgen ósimdikterdi qorǵaý júıesi iske qosyldy.
Bul tehnologııa Almaty oblysyndaǵy «Dıqan» sharýa qojalyǵynyń alma baǵynda engizilip jatyr. Joba qytaılyq seriktestermen birlesip, J.Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýty tarapynan júzege asyrylyp jatyr.
Aýyl sharýashylyǵy mınıstrligi málimetinshe, júıe zııankesterdiń paıda bolýyn naqty ýaqyt rejıminde tirkep qana qoımaı, fıtosanıtarııalyq boljaý júrgizýge negiz qalyptastyrady. Zııatkerlik tuzaqtardan alynǵan málimetter avtomatty túrde onlaın rejımde jiberilip, zııankester taralýy qarqynyn baqylaýǵa jáne tsıfrlyq modelder negizinde jaǵdaıdyń damý barysyn boljaýǵa múmkindik beredi.
Bul fıtosanıtarııalyq táýekelderdi basqarýda qorǵanys sharalaryn keıinnen qoldaný tásilinen aldyn ala áreket etý júıesine kóshýge jaǵdaı jasaıdy. Sonyń nátıjesinde qorǵaý is-sharalaryn júrgizýdiń merzimi men qajettiligi dálirek anyqtalady.
Tsıfrlyq monıtorıngti engizý boljamdardyń dáldigin arttyryp, ónim shyǵyny qaýpin tómendetedi jáne ósimdikterdi qorǵaý quraldaryn tıimdi paıdalanýǵa múmkindik beredi.
Mańyzdysy, bul tehnologııa ámbebap sheshim retinde qarastyrylyp otyr. Bolashaqta ony tek baý-baqsha sharýashylyǵynda ǵana emes, sonymen qatar egistik jáne tehnıkalyq daqyldardy qosa alǵanda, basqa da aýyl sharýashylyǵy daqyldaryna beıimdeýge bolady. Bul Qazaqstannyń agroónerkásiptik kesheninde aýqymdy tsıfrlyq fıtosanıtarııalyq monıtorıng júıesin qalyptastyrady.
Eger synaq nátıjeleri sátti bolsa, bul júıeni elimizdiń barlyq óńirindegi sharýashylyqtarǵa engizýge bolady.
Ertis ormanynda Qyzyl kitapqa engen ósimdikter gúldep jatqanyn jazǵan edik.
