Elimizde alǵash ret letsıtın maıy ShQO-da óndirilmek

Shyǵys Qazaqstan oblysynda maı tuqymyn qaıta óńdeý kólemi 900 myń tonnaǵa jetedi. Bul týraly oblys ákimi Ermek Kósherbaev aıtty, dep habarlaıdy Kazinform.

Ákimniń aıtýynsha, oblys maıly daqyldardy qaıta óńdeý boıynsha jetkilikti qýatqa ıe.

«Shyǵys Qazaqstanda maı óndiretin 12 kásiporyn bar. Qýaty 50 myń tonna bolatyn jańa «Altaı maı» zaýytyn iske qosý josparlanyp otyr. Buǵan deıin jumys istep turǵan jáne jańa kásiporyndardy eskersek, maı tuqymyn qaıta óńdeý kólemi 900 myń tonnaǵa jetedi. Ósimdik maıynyń eksporty 2 ese ósedi dep boljanyp otyr», - dedi E.Kósherbaev Ortalyq kommýnıkatsııalar qyzmetinde ótken baspasóz máslıhatynda.

Jaqynda Shanhaı qalasynda qazaqstandyq maı ónimderin jetkizý sharttaryna qol qoıyldy. Onyń ishinde shyǵysqazaqstandyq kásiporyndar da bar.

«Bizdiń oblys Qazaqstanda alǵash ret letsıtın óndirýdi qolǵa alyp otyr. Jylyna 4 myń tonna suıyq letsıtın óndirý úshin kúnbaǵys tuqymyn tereń óńdeýdi engizýde. Al 2025 jyldan bastap qurǵaq untaqty letsıtın shyǵarý josparlandy», - dedi Ermek Kósherbaev.

Jalpy oblysta agroónerkásiptik keshende 236,4 mlrd teńgege 37 joba iske asyrylyp jatyr.

Aıta keteıik, Ermek Kósherbaev elordada Shyǵys Qazaqstan oblysynyń áleýmettik-ekonomıkalyq damýy týraly esep berip jatyr.

Buǵan deıin óńir basshysy Shyǵys Qazaqstan oblysyndaǵy ortasha jalaqy 305 myń teńge ekenin aıtqan edi.

Sondaı-aq Shyǵys Qazaqstan oblysynda eki sý qoımasy jańǵyrtylady jáne jańa sý qoımasy salynady.