Elimizde alǵash ret «Ánshýaq» balalar ánderi festıvali ótedi
ASTANA. KAZINFORM – Elimizde alǵash ret Halyqaralyq balalardy qorǵaý kúnine arnalǵan «Ánshýaq» balalar ánderiniń festıvali ótedi. Bul týraly Oqý-aǵartý mınıstrliginiń baspasóz qyzmeti málimdedi.
Atalǵan is-shara – óskeleń urpaqtyń mádenı ómirindegi erekshe oqıǵa. Onyń basty maqsaty – halqymyzdyń ulttyq ereksheligi men rýhanı mádenıetin dáripteý.
Festıval aıasynda 1 aqpannan bastap elimizdiń túkpir-túkpirinde balalar ánderiniń chellendji bastalady. Oǵan 6 jastan 18 jasqa deıingi kez kelgen bala qatysa alady. Ol úshin TikTok áleýmettik jelisinde #ÁNShÝAQ ortaq heshteginiń astyna balalar ániniń jandy oryndalǵan beınesin júkteý qajet. Qorytyndysy 1 maýsymda Halyqaralyq balalardy qorǵaý kúninde shyǵarylady.
Sondaı-aq, osy kúni elimizdiń árbir eldi mekeninde Open Air formatynda kontsertter ótedi. Al elordanyń ózinde «Ánshýaq» festıvaliniń gala-kontserti ótedi.
«Festıvaldiń ereksheligi – elimizdiń rýhanı baılyǵyn pash etetin, eń bastysy, óskeleń urpaqtyń boıynda «Birtutas tárbıe baǵdarlamasy» tujyrymdamasyna engizilgen dástúrli tarıhı, rýhanı, mádenı qundylyqtar negizinde turaqty adamgershilik qasıetterdi dáripteýge baǵyttalǵan. Festıval elimizge degen maqtanysh sezimin oıatýǵa septigin tıgizedi degen senimdemiz», - dep atap ótti Tárbıe jumysy jáne qosymsha bilim berý departamentiniń dırektory Merýert Medetbekova.
Aıta ketý kerek, eń tanymal ánderdi oryndaýshylar óńir ákimderiniń respýblıkalyq gala-kontsertine joldama alady. Al oǵan qatysýshylar dıplomdarmen, baǵaly syılyqtarmen marapattalyp, «Baldáýren» ROO-ǵa joldama alady.
