Ushqyshsyz apparattar men lazer arqyly áýe kemesine kedergi jasaý qylmys dep tanyldy
ASTANA. KAZINFORM — Qazaqstanda áýe kemeleriniń ushý qaýipsizdigine lazerlik qurylǵylar nemese ushqyshsyz ushý apparattaryn baǵyttaý arqyly kedergi keltirgeni úshin qylmystyq jaýaptylyq engizildi. Jańa Qylmystyq kodeks normalary aýyr zardaptarǵa baılanysty 10 jylǵa deıin bas bostandyǵynan aıyrý jazasyn qarastyrady. Bul týraly Bas prokýratýranyń baspasóz qyzmeti málim etti.
2025 jylǵy 16 shildede Qylmystyq kodekske áýekemesin basqarýǵa lazerlik qurylǵylardy nemese ushqyshsyz ushý apparattaryn baǵyttaý arqyly kedergi keltirgeni úshin jaýaptylyqty kózdeıtin ózgerister engizildi (QK-niń 352-1-baby, 2025 jylǵy 16 qyrkúıekten bastap qoldanysqa engizildi).
Atalǵan bap qylmystyq teris qylyqtan bastap aýyr qylmysqa deıingi jaýaptylyqty kózdeıdi.
Sanktsııalar aýyr zardaptar týyndaǵan jaǵdaıda aıyppuldan bastap 10 jylǵa deıin bas bostandyǵynan aıyrýǵa deıingi jazalardy qamtıdy.
Bas prokýratýrada Kóliktegi polıtsııa departamenti, Іshki ister mınıstrliginiń Quqyq buzýshylyqtardyń aldyn alýdy úılestirý komıteti jáne Kólik mınıstrliginiń Azamattyq avıatsııa komıteti ókilderiniń qatysýymen vedomstvoaralyq keńes ótti.
— Onda áýe kemeleri qoný jáne bıiktikke kóterilý kezinde lazerlik qurylǵylarmen ushqyshtardy kóz qaryqtyrý faktileriniń aldyn alý jónindegi profılaktıkalyq jumystyń tıimdiligi máseleleri qaraldy, — delingen habarlamada.
Áýe kemelerine qatysty lazerlik qurylǵylardy qoldaný ushý qaýipsizdigine, jolaýshylar men ekıpaj músheleriniń ómiri men densaýlyǵyna naqty qaýip tóndiretini, sondaı-aq azamattyq avıatsııa úshin aýyr zardaptarǵa ákelýi múmkin ekendigi atap ótildi.
— Talqylaý qorytyndysy boıynsha avıatsııalyq qaýipsizdikti nyǵaıtýǵa, vedomstvoaralyq ózara is-qımyldyń tıimdiligin arttyrýǵa jáne jolaýshylar men áýe kemeleri ekıpajdarynyń ómiri men densaýlyǵyna qater tóndiretin quqyq buzýshylyqtardyń aldyn alýǵa baǵyttalǵan uıymdastyrýshylyq, profılaktıkalyq jáne quqyq qorǵaý sıpatyndaǵy sharalar kesheni ázirlendi, — dep habarlady quzyrly organnan.
Keńeske qatysýshylar jazanyń bultartpastyǵy qaǵıdatyn qamtamasyz etý maqsatynda árbir osyndaı fakt boıynsha qylmystyq ister qozǵalatyny, lazerlik sáýlelený kózderi bolýy yqtımal aýmaqtarda patrýldeý uıymdastyrylatyny, sondaı-aq kináli adamdardy ýaqtyly anyqtap, ustaý qamtamasyz etiletini jóninde ýaǵdalasty. Ushqyshtar men áýe kompanııalary áýekemeleri ekıpajdaryna áser etý faktileriniń barlyǵy týraly quqyq qorǵaý organdaryn habardar etýge baǵdarlandy.
— Osy áreket úshin qylmystyq jaýaptylyq 16 jastan bastalatynyn eskertemiz. Al osy jasqa tolmaǵan kámeletke tolmaǵandar quqyqqa qarsy áreketter jasaǵan jaǵdaıda, olardyń ata-analary nemese zańdy ókilderi kámeletke tolmaǵandardy tárbıeleý jáne olardyń minez-qulqyn baqylaý jónindegi mindetterdi tıisinshe oryndamaǵany úshin ÁQBtK-niń 127-baby boıynsha ákimshilik jaýaptylyqqa tartylýy múmkin, — dep eskertti prokýratýrdan.
Aıta keteıik, elimizde áýe ekıpajdaryna lazermen shabýyldaý jıilegen.
