Elimizde alǵash ret 3h3 basketboldan World Tour Masters týrnıriniń kezeńi ótedi
ALMATY. KAZINFORM – 13-14 shildede Almaty qalasy alǵash ret basketboldan 3h3 sanatyndaǵy World Tour týrnırin qabyldaıdy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Oǵan aldyn ala irikteýden ótken 12 halyqaralyq komanda qatysady. Uıymdastyrýshynyń World Tour Masters Almaty-2024 týrnırine óz tańdaýy boıynsha bir komandany (Wild Card dep atalatyn) engizý quqyǵynan basqa, Qazaqstan Respýblıkasy basketbol federatsııasy 2 komandany qosa alady. Ol kvotalar 15-16 maýsymda Atyraýda FIBA demeýshiligimen ótetin «Atyrau Quest» týrnıriniń jeńimpazdaryna beriledi. Qazaqstandyq komandalar bul týrnırge 3h3 basketboldan Qazaqstan chempıonatynyń kezeńderi arqyly joldama alady.
Byltyr 3x3 Almaty Quest basketbol týrnırine qatysqan FIBA Atqarýshy dırektory Aleks Sanches myrza jarystyń uıymdastyrylý jumysyna joǵary baǵa berdi jáne Almatynyń joǵary deńgeıdegi týrnırlerdi ótkizýge daıyn ekenine senim bildirdi. Sondaı-aq ol Qazaqstan basketbol federatsııasynyń FIBA-men birlesip, elimizde 3h3 basketbolyn tujyrymdamalyq damytý baǵytynda kóptegen jumys atqaryp jatqanyn atap ótti.
Nátıjesinde FIBA bıyl Qazaqstanǵa álemdik týr deńgeıindegi týrnır ótkizýdi senip tapsyrdy. Esińizge sala keteıik, World Tour deńgeıindegi týrnır FIBA-nyń basty oqıǵasy. «Almaty týry» maýsymnyń sońyndaǵy grand-fınal jolyndaǵy mańyzdy jáne joǵary deńgeıdegi týrnırlerdiń biri sanalady.
«FIBA barlyq daıyndyq protsesin muqııat qadaǵalaıdy jáne týrnırdi ótkizýge tikeleı qatysady. Biz shamamen 25 adamnan turatyn FIBA delegatsııasyn kútip otyrmyz. Árıne, biz FIBA-nyń kóshbasshylary Almatyǵa keletinine senemiz. Uıymdastyrýshylar Wild Card oıynyn arnaıy ashyq týrnırde berýdi uıǵardy. Ol eki irikteý formatynda Astana men Almatyda, sondaı-aq ońtústik astanamyzda ótetin fınaldyq kezeńinde anyqtaıdy. Bul týrnır 3x3 Road to Wild Card WT Almaty-2024 dep atalady jáne jaqyn arada jarııalanady. FIBA talaptary men týrnır erejelerine sáıkes keletin kez kelgen komanda qatysa alady. Jaqsy oınap, ádil jekpe-jekte jeńiske jetip, Álemdik týrǵa joldama alyńyz», – deıdi World Tour Masters Almaty-2024 uıymdastyrýshylary.
Aıta keteıik, 3h3 basketbol búginde eń serpindi damyp kele jatqan jáne áserli sport túrleriniń biri jáne ol jazǵy Olımpıada baǵdarlamasyna da engizilgen. Dúnıejúzilik týrdy Almatyda ótkizý – elimizde 3h3 basketboldyń damýyna serpin berip, qalanyń jáne elimizdiń sport tarıhynda qalady.
World Tour Masters Almaty-2024 uıymdastyrýshylary – Almaty qalasynyń ákimdigi, 3x3 Pilot Sports jobasynyń promoýteri. Týrnır Qazaqstan basketbol federatsııasynyń qoldaýymen ótedi.
